სახელშეცვლილი „გაბრაზებული ბათუმელები“ ამჯერად აჭარის ტელევიზიას უბრაზდებიან


„აჭარის ტელევიზიის“ წინააღმდეგ, დემოკრატიული ჩართულობის ცენტრში, საზოგადოებამ – „ბათუმელთა დარბაზი“ ბრიფინგი გამართა. ეს საზოგადოება საპრეზიდენტო არჩევნების დროს შეიქმნა. მაშინ საზოგადოებას „გაბრაზებული ბათუმელები“ ერქვა.

„ამბები არის დაუბალანსებელი… ტელევიზია უნდა მოემსახუროს ხალხის ინტერესს და არა ცალკეული ადამიანების, ოპოზიციის მიზნებს“, – განაცხადა ბრიფინგზე ვალერი მოქერიამ.

საზოგადოების წევრებმა გააპროტესტეს, თუ რატომ გაუშვა ტელევიზიამ საინფორმაციო გამოშვების ბოლოს ქობულეთში ნახევარმილიარდიანი ინვესტიციის ანონსი.

„როცა ქვეყანაში უმუშევრობა ასე პრობლემაა, დიდი სიხარულით უნდა შუქდებოდეს ასეთი ამბავი… ისტორიას არ ახსოვს ასეთი ძლიერი პროექტი,“ – ამბობს გივი ყენია, საზოგადოების წევრი.

აჭარის საზოგადოებრივი მაუწყებლის საინფორმაციო სამსახური დაუბალანსებლობაში დაადანაშაულა ნანა მეგრელიძემ, საზოგადოება „ბათუმელთა დარბაზის“ კიდევ ერთმა წევრმა. მან ვერ მოიყვანა კონკრეტული მაგალითი, რაც ამას დაადასტურებდა.

რატომ ერევა ორგანიზაცია არხის სარედაქციო დამოუკიდებლობაში, ან თუკი ბალანსის პრობლემა არსებობს, რატომ არ მიმართავს „ბათუმელთა დარბაზი“ ჟურნალისტური ეთიკის ქარტიას? – საზოგადოების წევრები ამ კითხვებმა გააღიზიანა.

„ჩვენ ტრასფარენტებითაც მივალთ ტელევიზიასთან, თუკი ჩვენს მოთხოვნებს არ გაითვალისწინებენ,“ – თქვა გივი ყენიამ.

„ბათუმელთა დარბაზის“ წევრებს „ბათუმელებმა“ ასევე ჰკითხა, რა აქტივობა ჰქონდა ამ საზოგადოებას საპრეზიდენტო არჩევნების დროს და რა გამორიცხავს იმას, რომ დღევანდელი ბრიფინგიც „ქართული ოცნების“ დაკვეთა არ არის?

„მართალია, მოვიკოჭლებთ, რომ არ ვჩანვართ… აქტივობა არ უნდა გვქონოდა,“ – აღნიშნა გიგი ყენიამ.

„ჩვენ „ქართული ოცნების“ მხარდამჭერები კი არ ვიყავით, გაბრაზება გამოვხატეთ, რადგან საზოგადოება არჩევნებზე არ მოვიდა… რაც შეეხება აქტივობას, ბოლოს პლატონ გიგინეიშვილისთვის ბიუსტის გაკეთება მოვითხოვეთ. ასევე გავმართეთ შეხვედრა კარბამიდის ტერმინალზე,“ – გვიპასუხა ვალერი მოქერიამ.

„გაბრაზებული ბათუმელები“ – ეს მოძრაობა ბათუმში საპრეზიდენტო არჩევნების პირველი ტურის შემდეგ ჩამოყალიბდა. მაშინ მოძრაობა უარს ეუბნებოდა „ნაციონალურ მოძრაობას“, დაუშვებლად მიაჩნდა ოპოზიციის დაბრუნება ხელისუფლებაში და მხარს უჭერდა „ქართული ოცნების“ მიერ მხარდაჭერილ კანდიდატს.

 

ნეტგაზეთის მასალების სხვა გამოცემებში გადაბეჭდვის წესი
ავტორი