ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის დეკანს, პროფესორ მარინე გიორგაძეს ვულოცავთ დაბადების დღის საიუბილეო თარიღს! გვინდა დიდი სიყვარული და პატივისცემა გამოვხატოთ მის მიმართ, ვუსურვოთ ჯანმრთელობა, წარმატებები და შემდგომი წინსვლა. ასევე საჯაროდ გამოვთქვათ ჩვენი გულწრფელი დამოკიდებულება და ვუამბოთ ჩვენი ქალაქის საზოგადოებას, თუ როგორი მრავალმხრივი ნიჭით დაჯილდოებული და ღირსეული პიროვნებაა ის.
თითქმის სამი ათეული წელია, რაც მარინე გიორგაძე მოღვაწეობს ბათუმის შოთა რუსთაველის სახელმწიფო უნივერსიტეტში. ის წლებია წარმატებით ხელმძღვანელობს ჰუმანიტარულ მეცნიერებათა ფაკულტეტს და დიდი პატივისცემით და სიყვარულით სარგებლობს სტუდენტებსა და კოლეგებში,როგორც აკადემიური დონის ინტელექტუალი, პროფესიონალი, გულისხმიერი კოლეგა, შესანიშნავი დეკანი და საიმედო მეგობარი. ის მართლაც გამორჩეული ქალბატონია თავისი ნიჭიერებით, გამჭრიახი გონებით, დახვეწილი იუმორით, უშუალობითა და გაწონასწორებული ხასიათით. მას არასოდეს ღალატობს ზომიერების გრძნობა, არის პრინციპული, უაღრესად შრომისმოყვარე და ობიექტური.
მარინა გიორგაძე სტუდენტებთან ერთად
განსაკუთრებით უნდა აღინიშნოს მარინე გიორგაძის ბრწყინვალე ორგანიზატორული ნიჭი. მისი ხელმძღვანელობით არაერთი საინტერესო და მაღალი დონის სამეცნიერო ღონისძიება ჩატარებულა უნივერსიტეტში, მათ შორის საერთაშორისო კონფერენციები „ჰუმანიტარული მეცნიერებები ინფორმაციულ საზოგადოებაში- I,II,II “ ორი სიმპოზიუმი ლექსიკოლოგიაში და სემიოტიკის საერთაშორისო კონფერენციები.
მის ღრმა ერუდიციაზე და ბრწყინვალე განათლებაზე მეტყველებს ის ფაქტი, რომ მარინე გიორგაძემ წარჩინებით დაამთავრა ივანე ჯავახიშვილის თბილისის სახელმწიფო უნივერსიტეტი კლასიკური ენების სპეციალობით. მშობლიური ენის გარდა იგი ფლობს 6 უცხოურ ენას: ფრანგულს, ინგლისურს, რუსულს, გერმანულს, ბერძნულს და ლათინურს. იგი ასწავლის ანტიკურ ლიტერატურას, მითოლოგიასა და ლათინურ ენას.
მარინე გიორგაძე არის 30-მდე სამეცნიერო პუბლიკაციის, მონოგრაფიისა და რამდენიმე სახელმძღვანელოს ავტორი. ის ათი მოგებული საგრანტო პროექტის ავტორი და მონაწილეა, ასევე აქტიურად არის ჩართული საერთაშორისო კონფერენციებსა და ტრენინგებში. მან დიდროს სტიპენდიით სტაჟირება გაიარა საფრანგეთში. ამჟამადაც იგი ერაზმუს + პროექტის ფარგლებში იმყოფება ნორმანდიაში, კერძოდ რუანის უნივერსიტეტში, სადაც ჩაატარა რამდენიმე ლექცია ფრანგულ ენაზე. მისი ძალისხმევით უნივერსიტეტში გაიხსნა ნეოგრეცისტიკის კაბინეტი, რომელიც მდიდარია ანტიკური ლიტერატურით. ქალბატონი მარინე არის რამდენიმე სამაგისტრო და წარმატებულად დაცული სადოქტორო თემის მეცნიერ-ხელმძღვანელი.
მარინე გიორგაძეს კარგად იცნობენ და დიდ პატივს სცემენ სამეცნიერო წრეები, როგორც საქართველოში, ასევე საზღვარგარეთ. ამას ადასტურებს ის ფაქტი, რომ იგი არჩეულია IEMCE-UNESCO ვიცე-პრეზიდენტად და ბიზანტიონოლოგთა საერთაშორისო ასოციაციის საქართველოს ეროვნული კავშირის გამგეობის წევრად. სწორედ მისი ავტორიტეტზე მიუთითებს ის ფაქტი, რომ წელს გადაწყდა, ბათუმში ჩატარდეს ბიზანტიოლოგიის მე-5 საერთაშორისო სიმპოზიუმი.
ქალბატონი მარინე არის ისევ ისეთი მშვენიერი,ისეთივე მიმზიდველი და საინტერესო პიროვნება, როგორც წლების წინ იყო, როცა სამეცნიერო კვლევითი ინსტიტუტიდან მოვიდა ჩვენთან. გვსურს გულწრფელად ვუსურვოთ მას ჯანმრთელობა, მხნეობა, წარმატებები და წინსვლა, რათა კვლავ ემსახუროს თავის ქვეყანას, ჩვეული ერთგულებითა და შემართებით.
რა თანამდებობაზეც არ უნდა იყოს ქალბატონი მარინე გიორგაძე, ერთი რამ ცხადია, რომ ის არის, არა მარტო ერთ-ერთი თვალსაჩინო სამეცნიერო და საზოგადო მოღვაწე, არამედ სტუდენტების უსაყვარლესი ლექტორი. მან არაერთი თაობა აღუზარდა ქვეყანას და, ასევე, ჰუმანიტარულ მეცნიერებათა ფაკულტეტისა და უნივერსიტეტის მრავალი წარმატებაც მნიშვნელოვანწილად არის დაკავშირებული მის გონივრულ მმართველობით უნარებთან და დახვეწილ პიროვნულ თვისებებთან.
პროფესორი მარინე გიორგაძე ჩვენი ქალაქისა და უნივერსიტეტის ერთ-ერთი ღირსეული წარმომადგენელი და სანიმუშო სახეა.
დიდი სიყვარულითა და პატივისცემით,
ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტი
