დღეს, პირველ აპრილს, ბათუმის ევროპის მოედანზე სამოქალაქო აქტივისტებმა თბილისში დაღუპული მუშების გამო საპროტესტო აქცია გამართეს. აქციის მთავარი მოთხოვნაა, ხელისუფლებამ შექმნას ეფექტური მექანიზმი, რომელიც დაიცავს დასაქმებულთა უსაფრთხოებას.
მარიამ მუთიძე, სამოქალაქო აქტივისტი: „დღევანდელი აქციის გზავნილია, გვქონდეს ისეთი შრომითი კოდექსი, რომელიც იქნება ადამიანის უსაფრთხოების გარანტი. შეთანხმებული მოქმედება მთავრობასა და ბიზნესს შორის, რომელიც ადამიანის სიცოცხლეზე გადის, უნდა დამთავრდეს და ყველას უნდა შეგვეძლოს უსაფრთხო გარემოში მუშაობა. ასე აღარ შეიძლება გაგრძელება“.
აქცია მშრომელთა უფლებების დასაცავად ბათუმში.
მარიამ ქაჯაია: „უკვე ძალიან დაგვიანებულია, მაგრამ მაინც ძალიან მნიშვნელოვანია, რომ გამოფხიზლდეს მთავრობა, პარლამენტარები და ამოქმედდეს ძლიერი შრომის ინსპექცია, რომელიც არის იმის გარანტია, რომ მშრომელი ადამიანები აღარ დაიღუპებიან.
ბიზნესი არ იცავს და არც დაიცავს შრომის უსაფრთხოებას, თუ არ იქნება სახელმწიფოს ნება. სახელმწიფოს აკისრია ცენტრალური როლი ადამიანის უფლებების დაცვაში, მან უნდა აიძულოს ბიზნესი დაიცვას დასაქმებულები, მშრომელები“.
აქციის მონაწილეები მოითხოვენ ამოქმედდეს ეფექტური შრომითი ინსპექცია.
ანა მდინარაძე, საიას აჭარის ორგანიზაციის თავმჯდომარე: „ამ აქციით, პირველ რიგში, ხაზს ვუსვამთ იმას, რომ შემაშფოთებელია ის მდგომარეობა, რაც ქვეყანაშია შექმნილი შრომის უსაფრთხოების თვალსაზრისით. ამას ცალსახად ადასტურებს ამდენი გარდაცვლილი ადამიანი და კრიტიკულად მზარდი დინამიკა, რასაც ყოველდღიურად ვხედავთ.
ჩვენი მთავარი მოთხოვნაა, ქმედითი და ეფექტური შრომის ინსპექტირების მექანიზმი და ის, რომ მინიმუმამდე იყოს დაყვანილი პროფესიული დაავადებები, სამუშაო დროს ადამიანთა სიკვდილი.“
ევროპის მოედანზე შეკრებილი ადამიანები მშრომელთა უსაფრთხოებას მოითხოვენ.
ფოტო: ლელა დუმბაძის
ირაკლი ბაკურიძე, გამომცემლობა „წიგნები ბათუმში“: „ჩვენ ოჯახით ვართ დღეს წარმოდგენილები და ვეუბნებით არა მხოლოდ ხელისუფლების კონკრეტულ ჯგუფს, არამედ, ზოგადად, საზოგადოებას, რომ დაიცვან ადამიანების სიცოცხლე, რადგან ეს პრობლემა ბევრს გვეხება და მეტი სიფრთხილით უნდა მოვეკიდოთ ადამიანების სიცოცხლეს. არ არის აუცილებელი ჩვენს ახლო წრეს შეეხოს ტრაგედია, რომ მივხვდეთ, რამდენად მტკივნეულია ეს. უნდა შეჩერდეს ქაოტური მშენებლობებიც და ესეც დაარეგულირებს ალბათ ამ პრობლემას“.
„ხელისუფლება გამოფხიზლდი“, – საპროტესტო აქცია მშრომელთა უფლებების დასაცავად.
მარიამ იობიძე: დღეს გამოვედით მშრომელთა უფლებების დასაცავად და გვინდა ვკითხოთ ხელისუფლებას, როდემდე უნდა გაგრძელდეს ადამიანების გამიზნულად ხოცვა. უნდა ამოქმედდეს ისეთი მექანიზმი, რომელიც დაიცავს შრომის უფლებას“.
