მთავარი,სიახლეები

ორი 5-სართულიანი კორპუსი აშენდა, ორი კიდევ აშენდება – „იაფი სახლი“ ბათუმში

02.04.2019 • 3418
ორი 5-სართულიანი კორპუსი აშენდა, ორი კიდევ აშენდება – „იაფი სახლი“ ბათუმში

ხელმისაწვდომი საცხოვრისის, იგივე „იაფი სახლის“ პროგრამის ფარგლებში, ბათუმში, ჯავახიშვილის N78ა-ს მიმდებარედ, ორი ხუთსართულიანი სახლის მშენებლობა დასრულდა. კორპუსები, სადაც ყველა ბინა გარემონტებულია, ქალაქის მერია 15 აპრილამდე ჩაიბარებს. ორივე კორპუსში, ჯამში, ერთ-ორ-და სამოთახიანი 40 ბინაა. სახლები კომპანია „მტმ“-მ ააშენა, რომელთანაც ხელშეკრულება 2 349 999 ლარზე იყო გაფორმებული.

იმავე მისამართზე კიდევ ორ ხუთსართულიან საცხოვრებელ სახლს ამჯერად ტენდერში გამარჯვებული შპს „ქრიათივ იმფრეშენს კავკასუსი“ 2 317 747 ლარად ააშენებს. კომპანიასთან ხელშეკრულება 2019 წლის 22 მარტს გაფორმდა. ამ კორპუსების მშენებლობა 2020 წლის 23 მარტს უნდა დასრულდეს.

სახლების [„ა“ და „ბ“ კორპუსების] მშენებლობაზე ბათუმის მერიის საქალაქო ინფრასტრუქტურისა და კეთილმოწყობის სამმართველომ ტენდერი მიმდინარე წლის თებერვალში გამოაცხადა. სატენდერო თანხა 2 461 751 ლარი იყო.

ტენდერში „ქრიათივ იმფრეშენს კავკასუსი“ და „გ“ და „დ“ კორპუსების მშენებლობაზე წინა ტენდერში გამარჯვებული „მტმ“ მონაწილეობდა [„მტმ“-ის დასახელებული თანხა იყო 2 349 999 ლარი, ზუსტად იგივე, რაც ამ კომპანიამ წინა ტენდერში დაასახელა].

მეორე ტენდერში გამარჯვებული „ქრიათივ იმფრეშენს კავკასუსი“ ბათუმში რეგისტრირებული კომპანიაა, რომლის 100% წილის მფლობელი და დირექტორი სულხან გოგიბერიძეა.

რა გამოცდილება აქვს ამ კომპანიას? – ტენდერის გვერდზე ატვირთულია „ქრიათივ იმფრეშენს კავკასუს“-ის მიერ 2016-2018 წლებში შესრულებული ძირითადი სამუშაოების ნუსხა: მცხეთის სოფელ წილკანში, ლუდსახარში ქარხნის მშენებლობა; თბილისში, კიბერნეტიკის ინსტიტუტის შენობის სამშენებლო სამუშაოები; ლოპოტას ტბაზე სასტუმრო კომპლექსის სამშენებლო სამუშაოები; ივენთ ჰოლ „რესპუბლიკის“ და რესტორან „ანდროპოვის ყურების“ არქიტექტურული და მოწყობის სამუშაოები თბილისში.

„იაფი სახლის“ პროგრამის ფარგლებში, ბათუმის მერია კორპუსების მშენებლობასთან ერთად 1 644 341 ლარის ამოღებასაც ცდილობს, რაც ამ პროგრამის გამო ქალაქის ბიუჯეტმა იზარალა. მერია ამ თანხის ანაზღაურებას სასამართლოში „ბაზისბანკისგან“ ითხოვს.

საქმე იმაშია, რომ „იაფი სახლის“ მშენებლობაზე გამოცხადებულ ტენდერში გამარჯვებული კომპანია „კონვენტ ჯორჯია“ 2016 წელს, მას შემდეგ გაუჩინარდა, როცა მერიას მისთვის ავანსად 1 430 342 ლარი უკვე გადარიცხული ჰქონდა. შესაბამის ტენდერში წარდგენილი საბანკო გარანტია ფორმალურად ავიზირებული იყო სს „ბაზისბანკის“ მიერ. გარანტორი კი ბრიტანული კომპანია POINT BANK Ltd-ი იყო.

თბილისის საქალაქო სასამართლოში მოსამზადებელი სხდომა 2019 წლის 2 აპრილსაა ჩანიშნული, თუმცა ამავე სხდომაზე ბათუმის მერიამ დამატებითი ვადის დაწესება უნდა მოითხოვოს შესაბამისი მტკიცებულებების წარსადგენად.

რატომ ედავება „ბაზისბანკს“ ბათუმის მერია და რა მტკიცებულებების მოძიებაზეა საუბარი, ამ საკითხზე დეტალურად ნახეთ ბმულზე: 1,6 მილიონი ლარის ზარალი ბიუჯეტს – ბათუმის მერია „ბაზისბანკს“ სასამართლოში უჩივის

ბათუმის მერიამ „იაფ სახლში“ ბინების გადასაცემად კრიტერიუმებიც შეიმუშავა, თუმცა მასში კვლავ ცვლილებები შეაქვს, რაც საკრებულომ უნდა დაამტკიცოს.

„იმის გათვალისწინებით, რომ კრიტერიუმების შემუშავების დროს პროგრამის ბენეფიციართა მიერ ყოველთვიურად გადასახდელი თანხები დაანგარიშებულია 2016 წლის მდგომარეობით, ამ დროისთვის მიმდინარეობს თანხების დღეის მდგომარეობით დაანგარიშება,“ – აღნიშნულია მერიიდან საკრებულოში გადაგზავნილ დოკუმენტში.

კრიტერიუმებთან დაკავშირებით  მეტი ინფორმაციის სანახავად გადადით ბმულზე: რა იცვლება „იაფი სახლის“ კრიტერიუმებში და ვინ ისარგებლებს პროგრამით

 

მთავარი ფოტო: ტერიტორია სადაც „იაფი სახლები“ უნდა აშენდეს და უკვე აშენებული 2 კორპუსი. ფოტო „ბათუმელების“ არქივიდან

გადაბეჭდვის წესი


ასევე: