მოსამართლე ლევან გელოვანის აცილების მოთხოვნით ბათუმის საქალაქო სასამართლოსთან საპროტესტო აქცია იმართება. აქციაზე ბრალდებულ ზაალ ახვლედიანის ახლობლები შეიკრიბნენ. მას გამოძიება ქურდული სამყაროს წევრობას ედავება.
“მოსამართლემ 8 თვე დაუთმო პროკურატურას, ჩვენი მტკიცებულებების გამოსაკვლევად კი, მხოლოდ რამდენიმე დღე განსაზღვრა,” – ამბობს ადვოკატი პაატა ნაკაიძე.
მოსამართლე ლევან გელოვანმა ზაალ ახვლედიანს და ამ საქმის ფიგურანტ კიდევ 10 ბრალდებულს განაჩენი მაქსიმუმ 17 აპრილს უნდა გამოუტანოს. ამ დღეს წინასწარი პატიმრობის კანონით განსაზღვრული ვადა იწურება.
ადვოკატების თქმით, აქამდე მოსამართლე პროკურატურის მოწმეებს უსმენდა, ბრალდებულების მოწმეებისთვის კი, მხოლოდ ორი სხდომა გამოიყო.
“გვითხრა, რომ 8 აპრილს უკვე დასკვნითი სიტყვები უნდა წარვადგინოთ…” – დასძენს პაატა ნაკაიძე.
რამდენი მოწმე ჰყავს დასაკითხი დაცვის მხარეს? – ადვოკატის თქმით, მოწმე ბევრი არ არის, მაგრამ “მტკიცებულებების ხარისხიანად გამოკვლევისთვის” აღარ რჩება დრო.
“ჩვენ ამ მოსამართლის აცილებას რახანია ვითხოვთ, მაგრამ მოთხოვნა არ დააკმაყოფილეს. ეს არის მანტიაში გამოწყობილი პროკურორი, მას უვადოდ გამწესება სურს,” – ამბობს ზაალ ახვლედიანის კიდევ ერთი ადვოკატი, ფრიდონ სიხუაშვილი.
ზაალ ახვლედიანი ბრალს სრულად უარყოფს.
ამ საქმეში მთავარი მტკიცებულება სატელეფონო ჩანაწერია. პროკურატურის მიერ წარმოდგენილი ერთ-ერთი ჩანაწერის მიხედვით, ზაალ ახვლედიანი კონკრეტულ პირს ეუბნება, რომ ის ვალს – 45 ათას დოლარს ვეღარ დაიბრუნებს, რადგან საქმეში ქურდული სამყაროს ე.წ. ავტორიტეტი ჩაერია.
“გამოძიება ამას ამტკიცებს, მაგრამ მტკიცებულება აღარ არსებობს… ჩვენ წარმოვადგინეთ ალტერნატიული ექსპერტიზის დასკვნა, რომლის მიხედვითაც სახელმწიფო ექსპერტიზა ჩატარდა სუბიექტურად, იგი არ ეყრდნობა სამეცნიერო მეთოდებს და კვლევებს. საბოლოოდ, მოსამართლემ უნდა განსაზღვროს, ექსპერტიზის რომელი დასკვნა არის მისთვის სარწმუნო,” – განმარტავს ადვოკატი პაატა ნაკაიძე.
ამავე საქმეში მოწმეებმა მასობრივად შეცვალეს ჩვენებები. ადამიანები, რომლებმაც თავდაპირველად პოლიციელებს უთხრეს, რომ ქურდული სამყაროს წევრობის მუქარით თანხის მიტანას აიძულებდნენ, სასამართლოს იგივე აღარ დაუდასტურეს.
პროკურატურის მტკიცებით, მოწმეებს ჩვენებების შეცვლა აიძულეს, თუმცა ამ ეტაპზე არ არის დაწყებული გამოძიება, რაც დაადგენდა, ვინმეს ზეწოლით შეცვალეს ჩვენება დაზარალებულებმა და სად თქვეს მოწმეებმა სიმართლე – პოლიციაში, თუ სასამართლოში.
საპროტესტო აქციასთან დაკავშირებით ბათუმის საქალაქო სასამართლოში არაფერი განუმარტავთ.
მთავარი ფოტო: ქურდული სამყაროს წევრობაში ბრალდებულის მხარდამჭერი აქცია
