მთავარი,სიახლეები

ბორჯომის პარკში იყიდება სუვენირები, რომლებზეც პუტინია გამოსახული – მოქალაქე

31.03.2019 • 2568
ბორჯომის პარკში იყიდება სუვენირები, რომლებზეც პუტინია გამოსახული – მოქალაქე

ფეისბუკმომხმარებელი ანა მაცაბერიძე სოციალური ქსელის პირად გვერდზე ბორჯომში გადაღებულ ფოტოებს აქვეყნებს. ფოტოებზე ჩანს სუვენირები, ეგრეთ წოდებული მაცივრის დეკორატიული მაგნიტები, რომლებზეც ვლადიმერ პუტინის ფოტოა გამოსახული წარწერით – „А Я ВТИХАРЯ ПЬЮ БОРЖОМИ“.

ანა მაცაბერიძე წერს: „ეს სუვენირები ვნახე ბორჯომის პარკის შესასვლელში კვირას. როცა გამოველაპარაკე გამყიდველებს და ვკითხე, ასეთ სუვენირებს რატომ ყიდით, სირცხვილი და ქვეყნის უპატივცემულობაა-თქო, იცით რა მიპასუხეს? ასეთ ახალგაზრდა გოგოს ეს საკითხი არ უნდა გაღელვებდეს და არც უნდა ბრაზდებოდეო. რუსი ტურისტები რომ მოდიან, არ უნდა ვასიამოვნოთო? მაშინ საერთოდ რაღას ჩამოდიანო. ერთმა ქალმა მითხრა: შვილო, მე სომეხი ვარ, მაგრამ აზერები ძალიან მიყვარს, ეს მხოლოდ პოლიტიკააო. რუსებზე მეტად საქართველო არავის უყვარსო. როცა ხურვალეთი და ზოგადად, ოკუპაცია ვუხსენე, ერთმანეთს ირონიულად გადახედეს და ჩაილაპარაკეს – „ბიჭო, გაიგე ხურვალეთში რა ამბები ყოფილაო?“ კიდევ მითხრეს, შენნაირი ახალგაზრდა ამ თემაზე არ უნდა ბრაზდებოდე, ეს ხომ მხოლოდ მარკეტინგული გათვლააო“.

ბორჯომის ცენტრალური პარკი საზოგადოებასთან ურთიერთობის სამსახურში ამ საკითხზე sknews.ge-ს განუმარტეს, რომ მსგავსი სუვენირები ცენტრალურ პარკში არ იყიდება და მათზე დატანილი პარკის ფოტოც ადმინისტრაციის საკუთრება არ არის. „ჩვენ არ გვაქვს უფლება მოვითხოვოთ ამ სუვენირების აღება. კერძო პირები არიან და ყიდიან. გარდა მაგისა, თეფშები და სხვა ნივთებიც არის, სადაც დატანილია პარკის ფოტოები, თუმცა მათგან ჩვენი ფოტო არცერთია“, – განმარტეს ბორჯომის ისტორიული პარკის საზოგადოებასთან ურთიერთობის სამსახურში.

ბორჯომი არ არის პირველი ადგილი საქართველოში, სადაც ოკუპანტი ქვეყნიდან შემოსულ ტურისტებს, განწყობის შესაქმნელად, არაერთ „ინოვაციას“ სთავაზობენ. გასულ შემოდგომაზე, მაგალითად, ბათუმის ბულვარში, ერთ-ერთ რესტორანზე გამოფინეს რუსეთის დროშა, მაგრამ ინფორმაციის გავრცელების შემდეგ დროშა მალევე ჩამოხსნეს. ასევე, ფართო განხილვის თემა იყო, რესტორნების პფლეილისტში რუსული მუსიკის შეტანა. თუმცა აქამდე არ ყოფილა შემთხვევა, თავად ვლადიმერ პუტინის გამოსახულებიანი სუვენირები რომ გაეყიდათ საქართველოში – ყოველ შემთხვევაში, ამის შესახებ მედიაში არ ყოფილა ინფორმაცია.

 

ჭიქები, რომლებიც, მოქალაქის თქმით, ბორჯომის პარკში პუტინის გამოსახულებიან სტიკერებთან ერთად იყიდება

გადაბეჭდვის წესი


ასევე: