მინისტრი: დამამთავრებელი გამოცდების ჩატარებას თავად სკოლა უზრუნველყოფს



დღეს, 22 მარტს, განათლების მინისტრმა მიხეილ ბატიაშვილმა, პარლამენტში კიდევ ერთხელ ისაუბრა განათლების სფეროში დაგეგმილ რეფორმაზე. მინისტრმა დეპუტატების კითხვებს უპასუხა გამოსაშვებ და უმაღლესში მისაღებ გამოცდებთან დაკავშირებითაც.

მისი განცხადებით, სკოლის დამამთავრებელი და უმაღლესში მისაღები გამოცდების ერთდროულად ჩატარება არაეფექტური და არამიზნობრივია.

„არც ერთ ევროპულ ქვეყანაში არ არის დაწესებული ცენტრალიზებული სკოლის გამოსაშვები და უმაღლეს სასწავლებელში მისაღები გამოცდები ერთად  – ამგვარი დუბლირება არ გვხვდება არც ერთი ქვეყნის განათლების სისტემაში.

ცენტრალიზებულად ჩატარებული მაღალი რისკის მქონე მისაღები და გამოსაშვები გამოცდების ასეთი კომბინაცია არ არის დაწესებული რომელიმე სხვა ქვეყანაში.

2018 წელს OECD ექსპერტებმა ჩაატარეს საქართველოში განათლების შეფასების სისტემების კვლევა. მის შუალედურ ანგარიშში მოცემულია, რომ  სკოლის დამამთავრებელი და უმაღლესში მისაღები გამოცდების ერთდროულად არსებობა არაეფექტური და არამიზნობრივია“, – განაცხადა მიხეილ ბატიაშვილმა.

მინისტრმა განმარტება გააკეთა საატესტატო გამოცდების გაუქმებაზეც. მისი თქმით, გამოცდების გაუქმების მოტივი იყო ის, რომ ტესტების ჩაბარების შედეგები არ ასახავდა ეროვნული სასწავლო გეგმით გათვალისწინებული კომპეტენციების ფლობას და მოსწავლეების რეალურ შესაძლებლობებს.

ბატიაშვილი ზოგადი უნარების გამოცდის გაუქმებასაც შეეხო. „ზოგადი უნარების ტესტის სანაცვლოდ, რომელიც ყველაზე „დემოკრატიულ“ შერჩევის ინსტრუმენტად მიიჩნეოდა, ჩვენ გთავაზობთ ამ კომპონენტის ინტეგრირებას საგნობრივ ტესტებში. სხვა შემთხვევაში, საგნობრივი ტესტი არ არის სათანადო შეფასების ინსტრუმენტი. ასეთ პირობებში, ზოგადი უნარების ცალკე ტესტად გამოტანა და მისთვის განსაკუთრებული როლის მინიჭება გაუმართლებელია.“

ბატიაშვილის თქმით, საქართველოს მოსწავლეების შედეგები საერთაშორისო შეფასებებში ისევ დაბალია. ეროვნული შეფასებების შედეგების მიხედვით, მოსწავლეების უმეტესობას დაბალი კომპეტენციები აქვს. საერთაშორისო კვლევები ადასტურებს, რომ „სასკოლო გამოსაშვები გამოცდების შემოღებით განათლების სისტემაში არაფერი შეცვლილა სწავლა-სწავლების გაუმჯობესების კუთხით“.

მიხეილ ბატიაშვილის თქმით, სასკოლო შეფასებების რეფორმირება იმიტომ მიმდინარეობს, რომ გახდეს შედეგსა და განვითარებაზე ორიენტირებული. „სადიაგნოსტიკო ხასიათის ცენტრალიზებული შეფასებები განხორციელდება მე-6 და მე-10 კლასის – ორი მნიშვნელოვანი სასწავლო საფეხურის ბოლოს სხვადასხვა საგანში. მისი მიზანი იქნება, მეტი ინფორმაციის მიწოდება სკოლებისთვის მოსწავლეების ცოდნის, მოსწრების, მათი ძლიერი და სუსტი მხარეების შესახებ… იმისათვის, რომ გაუმჯობესდეს და უკეთესად დაიგეგმოს სწავლა-სწავლების პროცესი“.

ბატიაშვილის თქმით, სკოლის დამამთავრებელი გამოცდების ჩატარებას თავად სკოლა უზრუნველყოფს.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com