აჭარის მთავრობა საკრებულოსთან კვადროციკლების მფლობელებს უშუამდგომლებს



“აჭარის მთავრობა საკრებულოსთან გვიშუამდგომლებს, რომ იქ გაიმართოს მორიგი შეხვედრა,”- თქვა აჭარის მთავრობის აპარატში გამართული შეხვედრის შესახებ ორგანიზაცია “ადამიანის უფლებებისთვის” ხელმძღვანელმა, თამაზ ბაკურიძემ.

კვადროციკლების რამდენიმე მფლობელს აჭარის მთავრობის აპარატის უფროსი არჩილ ჩიქოვანი დახურულ კარს მიღმა, საპროტესტო აქციის შემდეგ შეხვდა.

“დაძაბული საუბარი იყო, საბოლოო უარი არ არის ნათქვამი… შევთანხმდით,  არგუმენტაცია, რაც გაქვთ, განვიხილავთო. ჩვენ მოვითხოვეთ საჯარო განხილვა. შემდეგი შეხვედრა იქნება იმ საკრებულოში, სადაც მიიღეს ეს გადაწყვეტილება,”- აღნიშნა თამაზ ბაკურიძემ.

თამაზ ბაკურიძის თქმით, მას მთავრობოს აპარატში ასევე უთხრეს, რომ ელექტრომობილების აკრძალვის ინიციატივა შინაგან საქმეთა სამინისტროდან გამოგზავნილმა წერილმა განაპირობა – სტატისტიკის მიხედვით, კვადროციკლებით მოძრაობის დროს სხეულის დაზიანების შემთხვევებმა იმატა.

კვადროციკლების მფლობელები საკრებულოს ახალ გადაწყვეტილებას აპროტესტებენ, რომლის მიხედვითაც ბულვარში კვადროციკლებით გადაადგილება პირველი მაისიდან აიკრძალება. აკრძალვის ინიციატორი ბულვარის ადმინისტრაცია იყო.

კვადროციკლების მფლობელებმა დღეს, 20 მარტს, მოითხოვეს, ამ სეზონზე მუშაობის უფლება მიიღონ. ისინი პირობას დებენ, რომ კვადროციკლების რაოდენობას 1200-დან 300-მდე შეამცირებენ და ასევე, შეზღუდავენ ელექტრომობილების გადაადგილების სიჩქარეს.

 

ნეტგაზეთის მასალების სხვა გამოცემებში გადაბეჭდვის წესი
ავტორი