„მინდია ლავასოღლის მე-7 დაწესებულებაში შევხვდი, 2014 წელი იქნებოდა,“ – მიმართა ადვოკატს ექსპერტმა, ეთერ კუნელაშვილმა. შსს-ს ექსპერტს შეკითხვა ლავასოღლისთან შეხვედრის შესახებ ადვოკატმა სოლომონ კოჩალიძემ დაუსვა.
ექსპერტმა ეთერ კუნელაშვილმა ხმების ექსპერტიზა ჩაატარა „ქურდული სამყაროს წევრობის საქმეზე“ და დღეს, 19 მარტს, მოწმის სახით დაიკითხა დისტანციური წესით. ამ საქმეზე ექსპერტი ბოლო მოწმე იყო. რამდენიმე დღეში სასამართლომ განაჩენი უნდა გამოიტანოს.
ქურდული სამყაროს წევრობისა და ქუჩურ გარჩევებში მონაწილეობის ბრალდებით სამართალდამცველებმა 11 პირი გასული წლის 17 ივლისს ბათუმში დააკავეს. საქმის მასალების მიხედვით, ბრალდებულები ემუქრებოდნენ დაზარალებულებს, სცემდნენ და დიდი ოდენობით თანხას სძალავდნენ ქურდული „ობშიაკის“ შესავსებად. საქმის მასალებში არის კიდევ ერთი საინტერესო დეტალიც – კანონიერ ქურდობაში ბრალდებულები „დაზარალებულებს ემუქრებოდნენ სახელის გამტეხი ცნობების გავრცელებით“.
ექსპერტიზის დასკვნა ამ საქმეში მთავარ მტკიცებულებად განსაკუთრებით მას შემდეგ იქცა, როცა ბრალდების მხარის რამდენიმე მოწმემ ჩვენება შეცვალა – მოწმეებმა მოსამართლეს არ უთხრეს ის, რაც მანამდე პოლიციელებთან თქვეს. მოწმეებმა აღარ დაადასტურეს, რომ ბრალდებულები „ქურდული სამყაროს წევრობის“ სახელით ფულს სთხოვდნენ.
ექსპერტიზის დასკვნაზე ადრეც ამახვილებდნენ ყურადღებას ადვოკატები. მათი მტკიცებით, დასკვნები გაყალბებულია, რადგან ბრალდებულების სატელეფონო საუბარს, რომლის ჩანაწერი საათობით გრძელდება, სამ დღეში ვერცერთი ექსპერტი ვერ გამოიკვლევდა. ადვოკატების თქმით, საქმეში სულ 297 აუდიო ფაილია.
საქმის მასალების მიხედვით, შინაგან საქმეთა სამინისტროს ექსპერტს სატელეფონო ჩანაწერები მიაწოდეს და იმ სასამართლო სხდომების ელექტრონული ვერსია, სადაც ბრალდებულების ხმები ისმის.
„ხმის იდენტიფიცირებას არ სჭირდება ბევრი დრო… დაახლოებით 10-წამიანი ჩანაწერი საკმარისია, ამის გამოკვლევა პროგრამულად ხდება. ამ შემთხვევაში მოხდა ხმის იდენტიფიცირება და არა მეტყველების. მეტყველების იდენტიფიცირებას სადღაც 3-წუთიანი ჩანაწერი სჭირდება… ამისთვის საკმარისი მასალა სასამართლოს ელექტრონული სხდომიდან წარმოდგენილი არ იყო,“ – განმარტა ექსპერტმა, ეთერ კუნელაშვილმა.
მეტყველების ექსპერტიზას, ხმის ექსპერტიზისგან განსხვავებით, ლინგვისტი ამზადებს და ის პროგრამაზე დამოკიდებული არ არის.
ექსპერტს აღარ დასჭირვებია ლავასოღლის სასამართლოს სხდომის ჩანაწერი, მასთან წარსულში უშულო შეხვედრის და ხმის ნიმუშის აღების გამო.
ექსპერტის მტკიცებით, ყველა შემთხვევაში დადასტურდა ის, რომ ბრალდებულების ხმებია იმ სატელეფონო ჩანაწერებში, რაც პროკურატურამ სასამართლოში წარადგინა.
მინდია ლავასოღლი ამ დრომდე სხდომებს არ ესწრება. ის ძებნილია.
დღევანდელ სხდომას არც ივანე გიგიაძე დასწრებია ჯანმრთელობის მდგომარეობის გამო. სასამართლო სხდომა კი პროტესტის ნიშნად კიდევ ერთმა ბრალდებულმა, შოთა კეკელიძემ დატოვა. მან მოსამართლე დაადანაშაულა პროკურატურის მხარდაჭერაში – ვიდრე ექსპერტის დაკითხვა დაიწყებოდა, ადვოკატებმა მოითხივეს, ექსპერტი სასამართლო დარბაზში ფიზიკურად მისულიყო. ამ შუამდგომლობის დაკმაყოფილებაზე მოსამართლე ლევან გელოვანმა უარი თქვა, რადგან ექსპერტი თბილისში იმყოფება და მოწმის დაკითხვის ფორმის შერჩევა მხარეს შეუძლია.
მოსამართლეს კითხვა დაუსვა ბრალდებულმა ზაალ ახვლედიანმაც:
„თქვენ უვადოდ ხართ უკვე დანიშნული?“ – იკითხა ბრალდებულმა.
„არა, არ ვარ უვადოდ“, – მიმართა ბრალდებულს მოსამართლემ.
„ალბათ, ჩვენი საქმის შემდეგ მოგცემენ….“ – ჩაილაპარაკა ბრალდებულმა. რეპლიკა მოსამართლემ აღარ შეიმჩნია.
მოწმეს კიდევ ერთი კითხვა დაუსვა ლავასოღლის ადვოკატმა:
„იქნებ, ნასვამი იყო ლავასოღლი ამ სატელეფონო საუბრის დროს, ან იმიტაციას სხვა ახდენდა?“ – იკითხა სოლომონ კოჩალიძემ.
„ეს შესამჩნევი იქნებოდა… არ დაფიქსირებულა, მოხვდებოდა ესეც დასკვნით ნაწილში“ – თქვა ექსპერტმა.
ექსპერტის დაკითხვა დღეს, დღის 2 საათზე დაიწო და ამ დრომდე [16:35] გრძელდება.
