რა ღირს სახანძრო უსაფრთხოების სისტემის გამართვა შენობაში, ამაზე ზუსტი პასუხი არავის აქვს. კანონი 15 მეტრამდე სიმაღლის და უფრო მაღალ შენობებზე ოდნავ განსხვავებულ მოთხოვნას აწესებს. სპეციალისტის განმარტებით, რომელიც ამ მიმართულებით მუშაობს, მნიშვნელოვანია საზოგადოებრივი დაწესებულების დანიშნულება, აქ მომუშავე ადამიანების ოდენობა და ისიც, თუ რამდენად ბევრია ამ შენობაში ადვილად აალებადი ნივთი, კედელი, ტიხარი ან რაიმე სხვა. შესაბამის მომსახურებას, შემდეგ კი მისი გამართულობის პერიოდულ შემოწმებას ლიცენზირებული კომპანიები უზრუნველყოფენ.
15 მეტრამდე შენობებზე, სადაც საზოგადოებრივი დაწესებულებაა, დამონტაჟებული, უნდა იყოს კვამლის ავტომატურად აღმომჩენი სისტემა, იგივე ავტომატური სახანძრო სიგნალიზაცია, ასევე ცეცხლმაქრები, საევაკუაციო გეგმა და გასასვლელების მანიშნებლები. – ამ ყველაფრით უზრუნველყოფილია აჭარის გარემოს დაცვის სამმართველოს სამსართულიანი შენობა.
სამმართველოს პრესსამსახურის ინფორმაციით, სამივე სართული აღჭურვილია ხანძარსაწინააღმდეგო სისტემით, დამონტაჟებულია, როგორც დაკვამლიანების აღმომჩენი სისტემა, გამართულ მდგომარეობაშია ასევე ცეცხლმაქრებიც – ამ მომსახურებაში სამმართველომ 4830 ლარი გადაიხადა. ფასში შედის, როგორც საჭირო მოწყობილობების შეძენა-მონტაჟი, ასევე, მისი შემოწმება და თანამშრომლების დატრენინგებაც.
აჭარის მთავრობის ერთ-ერთ ადმინისტრაციულ შენობაში საევაკუაციო გეგმა, გასასვლელების მანიშნებლები და დაკვამლიანების აღმომჩენი სისტემა უკვე დამონტაჟებულია, თუმცა აჭარის ფინანსთა და ეკონომიკის სამინისტრო ოთხსართულიანი შენობისთვის, სადაც ფინანსთა და ეკონომიკის, ჯანდაცვისა და სოფლის მეურნეობის სამინისტროებია განთავსებული, ამ მომსახურების სრულყოფის მიზნით, დამატებით ტენდერის გამოცხადებას კიდევ აპირებს. ამისთვის დაახლოებით 30 000 ლარია გათვალისწინებული.
სკოლების დირექტორების ინფორმაციით კი, მათ ეს მომსახურება 10 000 ლარამდე დაუჯდათ.
მაღალსართულიანი სასტუმროებისთვის, სრული აღჭურვა და შესაბამისი მომსახურების ფასი 100 000 დოლარს აჭარბებს.
იმ შემთხვევაში, თუ საზოგადოებრივ დაწესებულება არ გამართავს სახანძრო უსაფრთხოების სისტემას, ქონების მესაკუთრეს გაფრთხილების შემდეგ დააჯარიმებენ.
დეტალური ინფორმაცია:
საზოგადოებრივი შენობების სახანძრო უსაფრთხოებაზე შემოწმება დაიწყო – ახალი წესები
