მთავარი,სიახლეები

დევნილი დედა-შვილი: შემწეობა მოგვიხსნეს, 80 ლარით გვიწევს თავის გატანა

14.02.2019 • 1688
დევნილი დედა-შვილი: შემწეობა მოგვიხსნეს, 80 ლარით გვიწევს თავის გატანა

„დევნილობისთვის დედა-შვილს ერთად 80 ლარს გვაძლევენ. ამ თვეში კი, მარტო გაზის ფული 51 ლარი გვაქვს გადასახდელი, ამდენი არასდროს მოსულა,“ – ამბობს ბათუმში, ჩოლოყაშვილის 84-ში მცხოვრები გაიანე ავჯიანი. აქ მდებარე კორპუსში რამდენიმე დევნილი და სოციალურად დაუცველი ოჯახი ცხოვრობს. ბუნებრივი აირის გასული თვის – იანვრის საფასურს გაიანეს მეზობლებიც აპროტესტებენ.

გაიანე ავჯიანს სხვა პრობლემაც აქვს – ის სოციალურ შემწეობას ვერ იღებს. შემწეობის შეწყვეტის მიზეზი კი, შვილის დროებითი სამსახური გახდა. დედა-შვილი ამბობს, რომ ორივეს ჯანმრთელობის სხვადასხვა პრობლემა აწუხებს. გაიანეს და ედგარს სოციალური შემწეობის მიღება 2016 წელს შეუწყდათ, როცა ედგარმა მუშაობა დაიწყო.

„მე წლების განმავლობაში ბათუმში ავტობუსის კონდუქტორად ვმუშაობდი,“ – განაგრძობს თხრობას გაიანე, – „მერე ეს სისტემა გააუქმეს და კონტროლიორები არიან ახლა. მე აღარ შემეძლო, სულ ფეხზე უნდა იდგე და სახლში წამოვედი… ორი წლის წინ ჩემმა შვილმა დაიწყო მუშაობა ელექტროტექნიკის ერთ-ერთ მაღაზიაში. მუშაობა დაიწყო თუ არა, შემწეობა მოგვიხსნეს. ახლა ჩემი შვილიც აღარ მუშაობს, სოციალურ სააგენტოს ხელახლა მივმართე, მაგრამ დახმარებას აღარ გვაძლევენ… 80 ლარი მარტო წამლებში არ მყოფნის. ნახეთ, ჩემი მაცივარი, იქ მხოლოდ წამლებია…“

სოციალური დახმარების სააგენტოში გვითხრეს, რომ ეს ოჯახი ბოლოს გასული წლის დეკემბერში გადამოწმდა და ოჯახის სოციალური მდგომარეობა 122 ათასი ქულით შეფასდა. სოციალური სააგენტოს მიერ მოპოვებული მონაცემებით, გაიანეს შვილი ისევ დასაქმებულია, ხოლო ამ ქულების მიხედვით ოჯახი შემწეობას ვერ მიიღებს. სოციალური სააგენტოს განმარტებით, სააგენტომ შემოსავლების ერთიან ბაზაში გადაამოწმა ოჯახის მდგომარეობა, სადაც ედგარის სამსახური ისევ ფიქსირდება.

სოციალურმა მუშაკმა ჩვენთან საუბრის დროს ასევე აღნიშნა, რომ თუკი ედგარი აღარ მუშაობს, მან სააგენტოში სამსახურიდან გათავისუფლების შესახებ ცნობა უნდა წარადგინოს.

გაიანე ავჯიანს იმის დასაზუსტებლად დავუკავშირდით, თუ რატომ ვერ მოხერხდა სააგენტოში სამსახურიდან გათავისუფლების ცნობის წარდგენა: „მივმართეთ იმ კომპანიას და ბოლოს პარასკევისთვის დაგვპირდნენ ცნობის მოცემას… მოხსნით უცებ ხსნიან და ცნობას არ გაძლევენ,“ – გვითხრა მან.

განახლება: გაიანე ავჯიანი დაგვიკავშირდა დღეს, 23 მაისს და შეგვატყობინა, რომ სოციალური დაცვის სააგენტოდან 110 ათასი ქულა მიიღო და მისი ოჯახი შემწეობას ისევ ვერ მიიღებს. „არ ვიცი, რატომ მოვიდა ამხელა ქულა. მივედი და მითხრეს, ჩვენ არ ვიცით, პროგრამა ითვლისო… ჩემი შვილი რომ აღარ მუშაობს, ეს ცნობა წარვადგინე, მაგრამ ახლა მე ვმუშაობ ავტობუსში კონდუქტორად კვირაში ორი დღე, ჩემი ხელფასი 160 ლარია. ისეთი ქულა მაინც მოეცათ, რომ უფასო სასადილოთი მესარგებლა…“ – გვითხრა გაიანემ.

„ჩვენ არ ვიცით, პროგრამა ითვლის…“ – აღნიშნა სოციალური მომსახურების სააგენტოს ბათუმის ორგანიზაციის უფროსის მოადგილემ, ვაჟა ფუტკარაძემ. მისი განმარტებით, გასაჩივრების მექანიზმი არ არსებობს, ხოლო ოჯახს მხოლოდ ერთი წლის შემდეგ შეუძლია სააგენტოში განაცხადის შეტანა.

 

 

 

სოციალური სახლი ბათუმში, ჩოლოყაშვილის ქუჩაზე

 

გადაბეჭდვის წესი


ასევე: