სიახლეები

ისრაელში ბათუმი 2018 წლის საუკეთესო ტურისტულ მიმართულებებს შორის დაასახელეს

13.02.2019 • 1039
ისრაელში ბათუმი 2018 წლის საუკეთესო ტურისტულ მიმართულებებს შორის დაასახელეს

აჭარის ტურიზმისა და კურორტების დეპარტამენტის ცნობით, ისრაელში წამყვანმა სამოგზაურო ვებგვერდმა  lametayel.co.il ბათუმი 2018 წლის 15 საუკეთესო ტურისტულ მიმართულებას შორის დაასახელა. 2018 წელს ბათუმის შესახებ ინფორმაციებს ვებგვერდის მილიონობით უნიკალურ მომხმარებლებს შორის ყველაზე დიდი წვმდომა და ძებნა ჰქონდა. ვებგვერდის წარმომადგენლებმა სპეციალური ჯილდო აჭარის ტურიზმის დეპარტამენტის წარმომადგენლებსა და საქართველოს ელჩს ისრაელში  თელავივის საერთაშორისო ტურისტულ გამოფენაზე გადასცეს.

პოპულარული სამოგზაურო ვებგვერდი Lametayel-ი მოგზაურობის  შესახებ 500 000 გვერდზე მეტ სამოგზაურო ინფორმაციას მოიცავს და მთავარი გვერდის გარდა ის 10 ვებგვერდს ფლობს, რომლებიც ცალკეულ ტურისტულ მიმართულებებზეა ფოკუსირებული. Lametayel-ს ისრაელში მოგზაურობასთან დაკავშირებით Google-ში ყველაზე  ხშირად ეძებენ. მას ყოველთვიურად საშუალოდ 1,3 მილიონამდე უნიკალური მომხმარებელი ჰყავს.

„2018 წელს 4 ავიაკოპანია ასრულებდა ფრენებს თელავივიდან ბათუმის მიმართულებით  და 55,3%-ით მეტი მოგზაური ესტუმრა რეგიონს ისრაელიდან.  ის, რომ წამყვანი სამოგზაურო ვებგვერდი ბათუმს 2018 წლის საუკეთესო ტურისტულ მიმართულებად ასახელებს, კიდევ ერთხელ მიუთითებს იმაზე, რომ აჭარის მიმართ ინტერესი ისრაელში დიდია, რაც, თავის მხრივ, აჭარის ტურიზმის დეპარტამენტის, ტურიზმის ეროვნული ადმინისტრაციისა და კერძო სექტორის აქტიური მუშაობის შედეგია,“ – განაცხადა აჭარის ტურიზმის დეპარტამენტის თავმჯდომარემ, სულხან ღლონტმა.

_________________

მთავარი ფოტო: აჭარის ტურიზმისა და კურორტების დეპარტამენტი 

გადაბეჭდვის წესი


ასევე: