მთავარი,სიახლეები

კერძო პირებს 568 365 ლარს თვითნებურად დაკავებულ მიწაში გადაუხდიან – ბათუმის ზოოპარკი

14.02.2019 • 3324
კერძო პირებს 568 365 ლარს თვითნებურად დაკავებულ მიწაში გადაუხდიან – ბათუმის ზოოპარკი

ბათუმის ზოოპარკის გადასატანად 13 ოჯახს ნახევარ მილიონზე მეტი ლარის კომპენსაციას გადაუხდიან. 568 365 ლარი ბათუმის 2019 წლის ბიუჯეტის შემოსულობებში უნდა აისახოს, შემდგომში „ახალი ზოოპარკის მშენებლობისთვის განსაზღვრული მიწის ნაკვეთების თვითნებურად დამკავებელი პირებისათვის საკომპენსაციო თანხის გასაცემად“.

ბათუმის მერია ამ თანხას აჭარის ბიუჯეტიდან ელოდება. ბათუმის ზოოპარკის გადატანაზე გადაწყვეტილების მიღების დროს კი ოფიციალურად ითქვა, რომ ზოოპარკის გადატანას ბიუჯეტის ფული არ დასჭირდებოდა და მთლიანად ფონდი „ქართუ“ დააფინანსებდა.

„საკრებულოს მიერ საკითხის დამტკიცების შემდეგ საკომპენსაციო თანხა [ჯამში 568 ათას 362 ლარი. 1კვმ – 7 ლარი] უნდა აისახოს ბიუჯეტში, რის შემდეგაც დაიწყება თანხების გაცემა. საკომპენსაციო თანხა 13 ოჯახზე გაიცემა, რის შემდეგაც დაიწყება ტერიტორიის გამოთავისუფლება ზოოპარკის მოწყობის მიზნით“, – გვითხრეს დღეს ბათუმის მერიაში.

აჭარის მუნიციპალიტეტებში განსახორციელებელი პროექტების ფონდიდან ბათუმის მერია ჯამში 3 446 352 ლარს ელოდება.

იმ პროექტის მიხედვით, რაც საკრებულომ უნდა დაამტკიცოს, აღნიშნული თანხის გადანაწილებას ქალაქის მერია შემდეგნაირად გეგმავს:

[checklist]

  • 1 999 987 ლარი – ანბანის კოშკის მიმდებარე ტერიტორიის სარეაბილიტაციო სამუშაოები
  • 878 000 ლარი – ლერმონტოვის ქუჩაზე N96-ის მიმდებარედ საბავშვო ბაღის მშენებლობა
  • 568 365 – ახალი ზოოპარკის მშენებლობისთვის განსაზღვრული მიწის ნაკვეთების თვითნებურად დამკავებელი პირებისათვის საკომპენსაციო თანხის გასაცემად

[/checklist]

თანხის ასეთი გადანაწილება „საბოლოო ჯამში გააუმჯობესებს ქ. ბათუმის მოსახლეობის სოციალურ-ეკონომიკურ მდგომარეობას“, – აღნიშნულია პროექტის განმარტებით ბარათში. პროექტის ავტორი ბათუმის მერიაა.

საკითხს ქალაქის საკრებულო უახლოეს სხდომაზე განიხილავს, საბოლოო გადაწყვეტილებას კი [თანხის გამოყოფაზე] აჭარის მთავრობა მიიღებს.

რატომ უხდის ბათუმის მერია მიწის „თვითნებურად დამკავებელ პირებს“ კომპენსაციას? – „ამ ოჯახებს მიწის ნაკვეთები ფაქტიურ მფლობელობაში აქვთ და იყენებენ სასოფლო-სამეურნეო დანიშნულებით [მოჰყავთ სასოფლო-სამეურნეო კულტურები]“, – მოგვწერეს მერიიდან.

ბათუმის ზოოკუთხის გადატანის შესახებ განცხადება ბათუმის მერმა, ლაშა კომახიძემ, ფეისბუქით 2018 წლის 5 აპრილს გაავრცელა. მისი თქმით, ბათუმის ზოოკუთხე ბოტანიკურ ბაღთან ახლოს უნდა გადავიდეს.

ბათუმის მერიის მიერ მომზადებული განკარგულების პროექტში აღნიშნული იყო, რომ ახალი ზოოპარკის მშენებლობა დაბა ჩაქვში, ასევე, ბათუმის ცენტრალური პარკიდან მისი გადატანა, საბიუჯეტო დანახარჯებს არ გამოიწვევდა და საჭირო თანხას ფონდი „ქართუ“ გაიღებდა.

ახალი ზოოპარკის მშენებლობისთვის ტერიტორიის განსაზღვრისა და მშენებლობასთან დაკავშირებით, დაგეგმილი პროექტი ბათუმის საკრებულოს 2018 წლის 11 აპრილის სხდომაზე განიხილეს. „როგორც სხდომაზე ითქვა, ბათუმის ცენტრალური პარკიდან ზოოკუთხის გადატანა და ახალი ზოოპარკის მშენებლობა საბიუჯეტო დანახარჯებს არ გამოიწვევს. საჭირო თანხას ფონდი „ქართუ“ გაიღებს. ეს ფონდი უზრუნველყოფს, ასევე, უცხოელი სპეციალისტების ჩართვას ახალი ზოოპარკის პროექტირებასა და  მშენებლობაში,“ – აღნიშნული იყო საკრებულოს მიერ გავრცელებულ ინფორმაციაში.

„ბათუმელები“ დაინტერესდა, ზოოპარკის გადატანისთვის საკომპენსაციო თანხის გარდა, საჭიროა თუ არა დამატებითი ხარჯები ბიუჯეტიდან.

„რაც შეეხება ხარჯებს, ფონდი „ქართუ“ უზრუნველყოფს საპროექტო-სახარჯთაღრიცხვო დოკუმენტაციის შედგენისა და ზოოპარკის მშენებლობის დაფინანსებას,“ – მოგვწერეს ბათუმის მერიიდან.

რას უპირებს მერია იმ ადგილს ცენტრალურ პარკში, სადაც დღეს ზოოკუთხეა განთავსებული?

„…გაჟღერდა, კომახიძე ცდილობს ზოოპარკის გადატანასო. დიახ, ვცდილობ იმიტომ, რომ იქ მცხოვრები ოჯახებისთვის უკვე აუტანელია სუნი და ხმაური. გარდა ამისა, იქ მყოფი ცხოველებისთვის აუტანელია იმ პირობებში ყოფნა, ამიტომ ჩვენ ძალიან ინტენსიურად ვმუშაობთ, რომ მოვძებნოთ შესაბამისი გარემო. აქვე მინდა შიში მოვუხსნა ყველას – იქ არ აშენდება კორპუსები. იქ იქნება მხოლოდ და მხოლოდ რეკრეაციული ზონა, რომელსაც ექნება კომერციული დატვირთვა. მე ვგულისხმობ კაფე-ბარებს, ატრაქციონებს და სხვა საშუალებებს“, – განაცხადა ბათუმის მერმა ლაშა კომახიძემ, 2018 წლის მარტში გამართულ ერთ-ერთ შეხვედრაზე.

გადაბეჭდვის წესი


ასევე: