ბათუმი,მთავარი,სიახლეები

აჭარაში ინვესტორებს ორ წელში 20 მილიონი ლარის და 2 მილიონი დოლარის ჯარიმა აპატიეს

02.02.2019 • 3448
აჭარაში ინვესტორებს ორ წელში 20 მილიონი ლარის და 2 მილიონი დოლარის ჯარიმა აპატიეს

აჭარის მთავრობა მიმდინარე წელსაც გააგრძელებს იმ ინვესტორების „წახალისებას“ დარიცხული ჯარიმებისგან გათავისუფლებით, რომლებიც ნაკისრ ვალდებულებებს მათივე მიზეზით ვერ შეასრულებენ და დამატებით დროს მოითხოვენ. ადრე ინვესტორს ჯარიმის გადახდისგან მხოლოდ ვალდებულების შესრულების პირობით ათავისუფლებდნენ, შემდეგ საბანკო გარანტიასაც სთხოვდნენ. ჯერ უცნობია, როგორ დარეგულირდება ეს საკითხი 2019 წელს.

 ფინანსთა და ეკონომიკის სამინისტროში „ბათუმელებს“ განუცხადეს, რომ აჭარის მთავრობა მუშაობს ახალი წესის შემუშავებაზე, რომელიც ამ საკითხს დაარეგულირებს.

2017 და 2018 წლებში 39 იურიდიული და კერძო პირი, რომლებმაც სახელმწიფო ქონების შეძენის თუ სარგებლობის სანაცვლოდ, ნაკისრი ვალდებულებები ვერ შეასრულა, აჭარის მთავრობამ ჯამში 20 167 860 ლარისა და 2 108 003 აშშ დოლარის ჯარიმის გადახდისგან გაათავისუფლა.

აჭარის ფინანსთა და ეკონომიკის სამინისტროსგან მოწოდებული ინფორმაციით, ყველა მათგანს მიეცა დამატებითი ვადა და ისინი ჯარიმის გადახდისგან ვალდებულების შესრულების პირობით გათავისუფლდნენ.

იმ ქონების უმეტესობა, რომელსაც ჯარიმისგან გათავისუფლებული კომპანიები თუ კერძო პირები ფლობენ, აჭარის მთავრობამ სხვადასხვა დროს პირდაპირი მიყიდვის ფორმით გაასხვისა. არის ქონება, რომელიც პირობებიანი აუქციონის ფორმით გაიყიდა და არის იჯარა/უზუფრუქტით გაცემული ქონებაც.

2017-2018 წლებში ვალდებულების შესრულების პირობით:

14 901 820 ლარისა და 1 362 087 აშშ დოლარის გადახდისგან გაათავისუფლეს ის მესაკუთრეები, რომლებსაც აჭარის მთავრობამ  სხვადასხვა დროს ავტონომიური რესპუბლიკის ქონება პირდაპირი მიყიდვის ფორმით გადასცა;

160 277 ლარისა და 745 916 აშშ დოლარის ჯარიმის გადახდისგან გაათავისუფლეს მესაკუთრეები, რომლებსაც აჭარის ქონება პირობებიანი აუქციონის ფორმით აქვთ შეძენილი;

5 105 763 ლარის ჯარიმა კი არ გადაახდევინეს იმათ, ვისაც აჭარის ქონება იჯარა/უზუფრუქტის ხელშეკრულებებით აქვთ გადაცემული და რომლებსაც ეს ჯარიმა ვალდებულებების შეუსრულებლობისთვის ჰქონდათ დაკისრებული.

„ჩვენ ვცდილობთ კარგი პირობები შევუქმნათ ინვესტორებს, რომლებიც მოდიან მოლაპარაკებებზე. ჩვენ არ გვაწყობს დაჯარიმებული ინვესტორი, შესაბამისად, შეჩერებული მშენებლობები. მთავარია, მან საქმე ბოლომდე მიიყვანოს. ეს არ არის ჩამოწერილი თანხა, ეს გაყინული ფულია და თუ დათქმულ ვადაში პირობას ვერ შეასრულებს ინვესტორი, ჯარიმა ისევ ამოქმედდება. თუ შეასრულებს, აღარ დაჯარიმდება. თვითონაც კმაყოფილი დარჩება და სახელმწიფოც“, – ასეთი განმარტება „ბათუმელებმა“ აჭარის ფინანსთა და ეკონომიკის სამინისტროსგან ჯერ კიდევ ხუთი წლის წინ მოისმინა

სამინისტროში დღესაც განმარტავენ, რომ ეს არის ის თანხა, რომელსაც ინვესტორი აუცილებლად გადაიხდის, თუ ვალდებულებას არ შეასრულებს.

2018 წლის სექტემბერში აჭარის მთავრობამ მიიღო განკარგულება [„საინვესტიციო საქმიანობის ხელშესაწყობად რიგი ღონისძიებების განხორციელების შესახებ“], რომლის მიხედვითაც ინვესტორს, რომელიც მთავრობას ნაკისრი ვალდებულებების გადავადებას სთხოვდა, უნდა წარედგინა საბანკო გარანტია, იმის დასადასტურებლად, რომ ნამდვილად აქვს მას ფინანსური რესურსი ხელშეკრულებით გათვალისწინებული ვალდებულებების ბოლომდე მისაყვანად.

აღნიშნული განკარგულება 2019 წლის პირველ იანვრამდე მოქმედებდა:

2018 წლის ბოლოს აჭარის მთავრობის თავმჯდომარემ ერთ-ერთ გასვლით სხდომაზე ასევე განაცხადა, რომ აჭარაში ბევრ გაყინულ სამშენებლო პროექტთან დაკავშირებით ინვესტორებთან შედგა მოლაპარაკება. მათ შორის იყო ბათუმის ცენტრში „ბაბილონ თაუერის“ მშენებარე პროექტი, რომელიც წლების განმავლობაში ვერ დასრულდა.

გადაბეჭდვის წესი


ასევე: