რატომ შეწყდა წითელას საწინააღმდეგო აცრები ბსუ-ში



წითელას საწინააღმდეგო აცრები ბათუმის რუსთაველის სახელმწიფო უნივერსიტეტში გუშინ, 31 იანვარს, დღის მეორე ნახევარში მოულოდნელად შეწყდა. ვაქცინაცია უნივერსიტეტში დღესაც უნდა გაგრძელებულიყო. აჭარის საზოგადოებრივი ჯანდაცვის ცენტრის განმარტებით, კამპანია იმიტომ შეწყვიტეს, რომ ქალაქის პოლიკლინიკებში ხალხი მომსახურების გარეშე დარჩა.

ჯანდაცვის სამინისტრო ირწმუნება, რომ სტუდენტების დაინტერესება იყო მცირე, თავად უნივერსიტეტს კი არ აქვს ინფორმაცია, რის გამო შეწყდა წითელას საწინააღმდეგო ვაქცინაცია – უნივერსიტეტი ისევ სთხოვს სტუდენტებს მოწმობას, რაც დაადასტურებს, რომ აცრა ნამდვილად აქვთ ჩატარებული.

გუშინ, 31 იანვარს, ბათუმის სახელმწიფო უნივერსიტეტის სტუდენტი, ქეთევან ბერიძე მოულოდნელად გარდაიცვალა. საზოგადოებრივი ჯანდაცვის ცენტრის ინფორმაციით, ეს სტუდენტი წითელაზე აცრილი არ ყოფილა.

„სტუდენტის გარდაცვალების შესახებ მას შემდეგ გავიგეთ, როცა ჩვენ უნივერსიტეტიდან წამოვედით. ეს არანაირად არ უკავშირდება აცრების შეწყვეტას,“ – გვითხრა ნინო ნიჟარაძემ, აჭარის ჯანმრთელობისა და სოციალური დაცვის მინისტრის მოადგილემ. დაავადებათა კონტროლის ცენტრის ინფორმაციით, ქეთევან ბერიძეს ბოლო პერიოდში არც რომელიმე კლინიკისთვის მიუმართავს.

„რომ მიემართა კლინიკისთვის წითელას სიმპტომით, ავტომატურად შემოვიდოდა მონაცემი ჩვენთან“, – გვითხრეს დაავადებათა კონტროლის ცენტრში.

ქეთევან ბერიძის გარდაცვალების შემდეგ გამოძიება სისხლის სამართლის კოდექსის 115-ე მუხლით დაიწყო. ამ ეტაპზე ექსპერტიზის შედეგები ცნობილი არ არის.

რატომ შეწყდა მოულოდნელად აცრების კამპანია უნივერსიტეტში?

„ძალიან დიდი მიმართვიანობა იყო თვითონ კლინიკებში და ხალხი იყო უკმაყოფილო. ბუნებრივია, ჩვენ ბრიგადები მოვხსენით დაწესებულებებიდან და მათ უჩერდებოდათ სამუშაო საათები. ჩვენ უნივერსიტეტში დავაანონსეთ და დავწერეთ განცხადება, რომ ნებისმიერ კლინიკაში შეუძლიათ აცრა და შესაბამისი ცნობის უპრობლემოდ მიღებაც,“ – აღნიშნეს აჭარის საზოგადოებრივი ჯანდაცვის ცენტრში.

აჭარის ჯანდაცვის მინისტრის მოადგილე, ნინო ნიჟარაძე ამბობს, რომ მათ სტუდენტთა რიგი უნივერსიტეტში არ მიუტოვებიათ და პრობლემა იყო სტუდენტების მხრიდან დაბალი მიმართვიანობა.

„რეალურად, ახლა არის უნივერსიტეტში დასვენების პერიოდი. გარდა ამისა, სტუდენტებს სჭირდებათ ცნობა, რასაც ჩვენ უნივერსიტეტში ვერ გავცემდით. მათ მაინც მოუწევდათ კლინიკაში მოსვლა ცნობის ასაღებად. შესაბამისად, სტუდენტებმა მიიღეს ინფორმაცია. ამ აქციას უფრო ჰქონდა საინფორმაციო ხასიათი“, – აღნიშნა ნინო ნიჟარაძემ.

აჭარის საზოგადოებრივი ჯანდაცვის მონაცემებით, 30 იანვარს ბათუმის სახელმწიფო უნივერსიტეტში 221-მა სტუდენტმა გაიკეთა წითელას საწინააღმდეგო აცრა. 31 იანვარს კი, დაახლოებით 100-მა.

მთავარი ფოტო საზოგადოებრივი ჯანდაცვის ცენტრი, ბსუ-ში ვაქცინაციის პროცესი

 

 

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი