უფროსი მასწავლებელი: გარედაკვირვებაზე რეგისტრაციის შესაძლებლობა არ მეძლევა



„ბათუმელებს“ ერთ-ერთი საჯარო სკოლის პედაგოგი დაუკავშირდა, რომელიც აცხადებს, რომ მიმდინარე წელს დაგეგმილი აქვს სტატუსის შეცვლა, რისთვისაც დაგროვებული აქვს ყველა საჭირო აქტივობა (11+2 კრედიტქულა), თუმცა, პედაგოგის თქმით, გარედაკვირვებაზე დასარეგისტრირებლად მას შესაძლებლობა არ ეძლევა.

„გარედაკვირვებაზე უნდა დავრეგისტრირებულიყავი 2018 წლის სექტემბერში, მაგრამ რადგან ამ დროისთვის რამდენიმე აქტივობის შეფასება არ იყო დასრულებული, ვერ დავრეგისტრირდი.

ამჟამად მაქვს ყველა საჭირო კრედიტქულა იმისთვის, რომ გარედაკვირვება გავიარო, თუმცა რეგისტრაციის გასავლელად ველი არ გაიხსნა. იმედი მაქვს, დარეგისტრირების შესაძლებლობას მომცემენ, რომ წლის ბოლოს სტატუსის შეცვლა შევძლო. თუ ვერ დავრეგისტრირდი, ჩემი დაგროვებული კრედიტები გაუქმდება და შრომა წყალში ჩამეყრება“, – ამბობს პედაგოგი, უფროსი მასწავლებელი, რომელსაც დაგეგმილი აქვს მიმდინარე წელს, წამყვანი მასწავლებლის სტატუსი მიიღოს.

მასწავლებელთა პროფესიული განვითარების ეროვნული ცენტრის ხელმძღვანელის მოადგილის, მანანა რატიანის განმარტებით, თუკი შეფასების ჯგუფს პედაგოგი შეფასებული არ ჰყავდა, რეგისტრაციის ველი არ გაიხსნებოდა.  „აქტივობები კი უნდა ყოფილიყო 2018-2019 სასწავლო წლის დაწყებამდე განხორციელებული“.

მანანა რატიანის თქმით, გარედაკვირვების გარეშე მასწავლებელი სტატუსს ვერ შეიცვლის. „შეფასებას როცა გაივლის, ეს აისახება ოქმში, ამის შემდეგ სექტემბერში გამოცხადებულ გარედაკვირვებაში შეძლებს მონაწილეობის მიღებას. ჩვენ ვეცადეთ ყველას კონკრეტული შემთხვევა გაგვეთვალისწინებინა, სამართლიანად მოვქცეოდით მათ, ვინც უკვე მზადაა წინსვლისთვის“, – ამბობს რატიანი.

გუშინ, პირველ თებერვალს, მასწავლებელთა პროფესიული განვითარების ეროვნული ცენტრის ხელმძღვანელი აპირებდა სქემაში დაგეგმილი ცვლილებების პრეზენტაციას, თუმცა პრეზენტაცია არ შედგა. ცენტრის ხელმძღვანელი ბერიკა შუკაკიძე მხოლოდ საჯარო სკოლების დირექტორებს შეხვდა, სადაც კრედიტქულებთან დაკავშირებით განაცხადა, რომ მასწავლებლებს, რომელთაც კარიერული წინსვლა დაწყებული აქვთ, სასწავლო წლის ბოლომდე შეძლებენ სტატუსის ამაღლებას.

„სტატუსს ინარჩუნებენ უფროსი, წამყვანი და მენტორი მასწავლებლები, მათი წინსვლა ნებაყოფლობითია. პრაქტიკოს მასწავლებელს, რომელიც 2019-2020 სასწავლო წლის დასაწყისისთვის წარმატებით დააგროვებს წინსვლისთვის საჭირო კრედიტქულების რაოდენობას, ენიჭება უფროსი მასწავლებლის სტატუსი.

იმ უფროს მასწავლებლებს, რომლებსაც 2019-2020 სასწავლო წლის დასაწყისისთვის დასრულებული ექნებათ შიდა შეფასების პროცესები და წინსვლისთვის, მხოლოდ გარე დაკვირვება ექნებათ დარჩენილი, მათ მიეცემათ უფლება 2019 წლის ბოლომდე გაიარონ გარე დაკვირვება“. თუმცა 21 იანვარს, ბერიკა შუკაკიძე ამბობდა, რომ სქემა შეიცვლება და მასწავლებლებს სტატუსის შეცვლა, გამოცდების ჩაბარების საფუძველზე შეეძლებოდათ.

შუკაკიძის თქმით, საზოგადოების მაღალი ინტერესიდან გამომდინარე, სქემის განახლებულ ვერსიაზე მსჯელობა მაღალი ჩართულობით მიმდინარეობს. „საბოლოო ვერსიის მასშტაბურ პრეზენტაციამდე სამუშაო ჯგუფი პროფესიულ წრეებთან არაერთ შეხვედრას გამართავს“, – ნათქვამია განცხადებაში, რომელსაც მასწავლებელთა პროფესიული განვითარების ცენტრი ავრცელებს.

მთავარი ფოტო: სკოლის დირექტორები ბერიკა შუკაკიძესთან შეხვედრაზე

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com