„ბათუმის ოფისის აქტივობის განსაკუთრებით ეშინიათ, ეს არის პოლიტიკური დევნა…“ – მიიჩნევს „ერთიანი ნაციონალური მოძრაობის“ წევრი ლევან ანთაძე. მას ვკითხეთ, თუ რა გახდა მათი აზრით პარტიის ბათუმის ორგანიზაციის წევრების პოლიციის განყოფილებაში დაბარების მიზეზი და ხომ არ უკავშირდება ეს ამბავი მიხეილ სააკაშვილის მიერ გაკეთებულ განცხადებას ბათუმში „ალტერნატიული მთავრობის“ ჩამოყალიბებაზე.
„აი, ეს არის ნამდვილი ახალი ხელისუფლება საქართველოში: ჭკვიანები, ლამაზები, მომართულები, პატრიოტულები… ლევანთან ერთად ვზივარ ოკეანის გადაღმა. ძალიან კრეატიული აზრია ეს ალტერნატიული მთავრობა და ალტერნატიული მერი იმიტომ, რომ რეალურად ჩვენს საქართველოს არ ჰყავს ახლა ხელისუფლება. რეალურად არის რაღაც ჯგუფი, რომელიც დაეპატრონა ქალაქს, ქვეყანას და თამაშობენ სახლობანას… ესენი თამაშობენ მთავრობანას, ზოგმა წარმოიდგინა, რომ მერია,“ – მიმართა მიხეილ სააკაშვილმა ბათუმის პარტიულ ოფისში შეკრებილებს ვიდეოჩართვის დროს.
ენმ-ს წევრის, ლევან ანთაძის თქმით, ეს ჩართვა გუშინწინ, ანუ 30 იანვარს შედგა. ჩართვის ამსახველი ვიდეო თავად მიხეილ სააკაშვილის ფეისბუქგვერდზეცაა გამოქვეყნებული. ვიდეოდან არ ჩანს, კონკრეტულად ვინ წარმოადგენს აჭარაში „ალტერნატიული მთავრობას“. მიხეილ სააკაშვილი მადლობას უხდის პარტიის ბათუმის ორგანიზაციას აქტიურობისთვის და პირველი სხდომის თარიღსაც ასახელებს. საქართველოს მესამე პრეზიდენტი ამბობს, რომ პარტიის წევრები კონკრეტულ პროექტებს წარმოადგენენ, რომლებსაც სოციალურ ქსელში მოსახლეობა ხმას მისცემს.
„გააკეთეთ თქვენი პროექტები… გთავაზობთ, რომ პირველი სხდომა აჭარის ალტერნატიული მთავრობის და ბათუმის მერიის ჩაატაროთ აქედან ორ კვირაში. წარმოადგინეთ კონკრეტული პროექტები და მე ჩაგერთვებით… ამას „რუსთავი 2“ გააშუქებს იმედია და „იუთუბზე“ დავდებთ,“ – ამბობს მიხეილ სააკაშვილი.
ლევან ანთაძის თქმით, ალტერნატიული პროექტების იდეა პარტიის ბათუმის ორგანიზაციის ახალგაზრდულ ფრთას ეკუთვნის, რასაც პარტიის ლიდერმაც დაუჭირა მხარი.
„თანამდებობისთვის არ შექმნილა ეს ალტერნატიული მთავრობა. ამ ეტაპზე ასეა. საუბარია გუნდზე, რომელიც პროექტებს მოამზადებს და გააცნობს საზოგადოებას,“ – გვითხრა ლევან ანთაძემ.
შინაგან საქმეთა სამინისტროს ამ დრომდე არ გაუვრცელებია კონკრეტული ინფორმაცია ენმ-ს ბათუმის ორგანიზაციის წევრების დაკავების შესახებ. შსს-ს ინფორმაციით, პირადი ცხოვრების ამსახველი კადრების შერნახვის და გავრცელების ბრალდებით 16 პირი დააკავეს.
მთავარი ფოტო მიხეილ სააკაშვილის ფეისბუქგვერდიდან
