კულტურა,მთავარი,სიახლეები

როგორ აღინიშნება წიგნის საჯაროდ კითხვის მსოფლიო დღე ბათუმში

01.02.2019 • 2234
როგორ აღინიშნება წიგნის საჯაროდ კითხვის მსოფლიო დღე ბათუმში

საქართველოს წიგნის გამომცემელთა და გამავრცელებელთა ასოციაციის ინიციატივით საქართველოში პირველ თებერვალს, უკვე მეოთხედ აღინიშნება წიგნის საჯაროდ კითხვის მსოფლიო დღე.

წიგნის გამომცემელთა და გამავრცელებელთა ასოციაციის ინფორმაციით, ღონისძიება წელს სამ დღეს გასტანს და 1-დან 3 თებერვლის ჩათვლით მთელი საქართველოს მასშტაბით 80-მდე ლიტერატურულ აქტივობას გააერთიანებს.

პროექტში მონაწილეობას მიიღებს 50-ზე მეტი ორგანიზაცია და 60-მდე ავტორი. თბილისის გარდა შეხვედრები და სხვადასხვა ლიტერატურული აქტივობები დაგეგმილია საქართველოს თხუთმეტამდე ქალაქში, დაბასა და სოფელში. წელს პირველად წიგნის საჯაროდ კითხვის მსოფლიო დღეს შემოუერთდებიან საზღვარგარეთ მცხოვრები ქართული დიასპორების წარმომადგენლები.

წიგნის საჯაროდ კითხვის მსოფლიო დღესთან დაკავშირებით ბათუმში ღონისძიებები გაიმართება:

  • მაღაზია „სანტა ესპერანსაში“ დღეს, საღამოს შვიდიდან 9 საათამდე ბათუმელ მკითხველებს მთარგმნელი ქარდა ქარდუხი უმასპინძლებს. მისამართი:  ბათუმი, მერაბ კოსტავას 34.
  • მაღაზიაში „წიგნები ბათუმში“, დღეს, საღამოს 7 საათზე, სტუმარი ჟურნალისტი ლალი ბერძენიშვილი იქნება, რომელიც თავის მიერ შერჩეულ წიგნს წაიკითავს და ლიტერატურაზე ისაუბრებს.  მისამართი: ბათუმი, მემედ აბაშიძის 60.

„წიგნები ბათუმში“ წელს სხვა აქტივობასაც გეგმავს. დღეს, პირველ თებერვალს, გამომცემელი მარიამ კორინთელი და ქართველი ავტორი, პრემია „საბას“ გამარჯვებული ზურა აბაშიძე ფერიის ბავშვთა სახლის აღსაზრდელებს ესტუმრებიან, წაიკითხავენ წიგნებიდან ამონარიდებს, ისაუბრებენ თარგმანებსა და თანამედროვე ქართველ და უცხოელ ავტორებზე.

წიგნის საჯაროდ კითხვის დღე კი საქართველოში, თბილისში, 12:00 საათზე, გალაკტიონ ტაბიძის მემორიალურ ბინა-მუზეუმში „არტისტული ყვავილების“ კითხვით გაიხსნება, რომელიც მიეძღვნება გალაკტიონ ტაბიძის გარდაცვალებიდან 60 წლის თავს და ასევე, კრებულის – „არტისტული ყვავილების“ გამოცემიდან 100 წლის იუბილეს.

წიგნის საჯაროდ კითხვის მსოფლიო დღის აღნიშვნა 3 თებერვალს, 18:00 საათზე, საქართველოს მწერალთა სახლში დასკვნითი ღონისძიებით შეჯამდება, სადაც მკითხველს ლაშა ბუღაძესთან, პაატა შამუგიასთან და ზვიად კვარაცხელიასთან შეხვედრის საშუალება მიეცემა. ისინი ლიტერატურასა და ადამიანის უფლებებზე ისაუბრებენ. წიგნის საჯაროდ კითხვის მსოფლიო დღის დასკვნით ღონისძიებაზე გამოვლინდება და დაჯილდოვდება წლის წიგნის ქომაგი.

გადაბეჭდვის წესი