აჭარიდან შეკვეთილში მრავალწლოვანი ხეების გატანა განახლდა



ქობულეთის მუნიციპალიტეტის სოფელ ციხისძირიდან მრავალწლოვანი ხე გადააქვთ, რომელიც რამდენიმე დღეა რკინიგზასთან, ბობოყვათის რეზიდენციის მოპირდაპირედ დგას. ხე სოფელ შეკვეთილში, იმ ტერიტორიაზე გადააქვთ, სადაც მილიარდერი ბიძინა ივანიშვილი დენდროლოგიურ პარკს აშენებს. ამ პარკისთვის ათეულობით სხვადასხვა სახეობის მრავალწლოვანი ხე გაიტანეს აჭარიდან.

ხეს, რომელიც ახლა რეზიდენციასთანაა, ბობოყვათის პლაჟიდან შეკვეთილში ზღვით გადაიტანენ. პლაჟამდე მისასვლელი გზა რკინაბეტონის ფილებით უკვე მოწყობილია. მოწყობილია რკინიგზაზე გადასასვლელიც. ამ გზით არაერთი ხე გადაიტანეს.

ქობულეთის მუნიციპალიტეტის სოფელ ზენითში ბიძინა ივანიშვილის პარკში გადასატანად 5 მრავალწლოვანი ხე 2018 წლის ადრე გაზაფხულზე ამოთხარეს. ეს ხეები ამ დრომდე არ გაუტანიათ. როგორც მაშინ ითქვა, ხეები გზის სივიწროვის გამო ვერ გაჰქონდათ. ზაფხულის განმავლობაში კუსტარულად მოწყობილი სარწყავი სისტემით გადასატანად გამზადებულ ხეებს ყოველდღიურად რწყავდნენ. მიუხედავად ამისა, როგორც ადგილობრივი მცხოვრებლები ამბობენ, ერთი ხე ხმება.

აჭარის გზების დეპარტამენტმა ალამბარი-ზენითის მიმართულებით გზის რეკონსტრუქციის სამუშაოები დაიწყო, რაც მაშინ ოპოზიციამ გააპროტესტა და პროკურატურასაც მიმართეს.

აჭარიდან მრავალწლოვანი ხეები ოზურგეთის მუნიციპალიტეტის სოფელ შეკვეთილში, ზღვისპირას, იმ ტერიტორიაზე გადააქვთ, რომელიც შპს „ურეკი რეზიდენსის“ საკუთრებაშია. ამ ტერიტორიაზე მილიარდერი, ყოფილი პრემიერ-მინისტრი და დღეს უკვე მმართველი პარტიის თავმჯდომარე, ბიძინა ივანიშვილი დენდროლოგიურ პარკს აშენებს.

კომპანია „ურეკი რეზიდენსი“ ბიძინა ივანიშვილმა 2016 წლის ივლისში დააფუძნა. 2017 წლის იანვარში კომპანიის წილის 100% თავის შვილს, ბერა ივანიშვილს 4 მილიონ ლარად მიჰყიდა. ბერა ივანიშვილი დღეს „ურეკი რეზიდენსის“ ერთადერთი მფლობელია.

მრავალწლოვანი ხე ბობოყვათის რეზიდენციასთან / ხე შეკვეთილში გადააქვთ / 22.01.2019 / ფოტო: „ბათუმელები“

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com