ჭაობის დასახლებაში 19 ქუჩის შესაკეთებლად 8 მილიონი ლარი დაიხარჯება – ტენდერი



ჰ. აბაშიძის, ლუკა ასათიანის, ვაჟა-ფშაველას, აჭარისწყლის შესახვევი, ბაგრატიონის ჩიხი, გონიოს, თ. გორგილაძის, ლადო ასათიანის ჩიხი, ლუკა ასათიანის შესახვევი, მ. ვარშანიძის შესახვევი, პ. მელიქიშვილის ჩიხი, ლ. გელაძის, პ. მელიქიშვილის მე-2 შესახვევი, ნ. გვარიშვილის, ს. ხიმშიაშვილის ქუჩის N109-113, ურეხის ქუჩა, ურეხის ჩიხი, დ. თავდადებულის შესახვევი, მ. ვარშანიძის 1-ლი შესახვევი – ეს ბათუმის იმ ქუჩების ჩამონათვალია, რომელთა რეაბილიტაციის დაწყებას და კეთილმოწყობას ქალაქის მერია 2019 წელში გეგმავს.

შესაბამისი სამუშაოების შესყიდვაზე ბათუმის მერიის ა[ა]იპ საქალაქო ინფრასტრუქტურისა და კეთილმოწყობის სამმართველომ ტენდერი უკვე გამოაცხადა. შესყიდვის სავარაუდო ღირებულება 8 385 492 ლარია. წინადადებების მიღება 2019 წლის 6 თებერვალს დაიწყება და 11 თებერვალს შეწყდება. ტენდერი აუქციონის გარეშე ტარდება.

პირობის თანახმად, სამუშაოების სრული შესრულება უნდა განხორციელდეს 450 კალენდარული დღის განმავლობაში, ტენდერში გამარჯვებულთან ხელშეკრულების გაფორმებიდან.

თუ რა მოცულობის სამუშაოები უნდა ჩატარდეს აღნიშნულ ქუჩებსა თუ ცალკეულ მონაკვეთებში, მოცემულია ტენდერის ტექნიკურ პირობებში.

სატენდერო პირობებში ასევე აღნიშნულია:

  • „თითოეულ ობიექტზე სამუშაოები უნდა განხორციელდეს მას შემდეგ, რაც ტენდერში გამარჯვებული პრეტენდენტი შემსყიდველის მხრიდან მიიღებს წერილობით შეტყობინებას სამუშაოების დაწყების თაობაზე, რომელშიც განსაზღვრული იქნება სამუშაოების დაწყების კონკრეტული თარიღი და სამუშაოების შესრულების კონკრეტული ვადა კონკრეტულ ქუჩაზე ან მონაკვეთზე;
  • ტენდერში გამარჯვებულ მიმწოდებელს უნდა შეეძლოს სამუშაოების დაწყება ერთდროულად მინიმუმ ორ და მაქსიმუმ სამ ობიექტზე შემსყიდველის მხრიდან წერილობითი შეტყობინების მიღებიდან;
  • შემსრულებელს საკუთარი სურვილის შესაბამისად შეუძლია სამუშაოების წარმოება ერთდროულად სამზე მეტ ობიექტზე, ანუ სამშენებლო სარეკონსტრუქციო სამუშაოებს დაქვემდებარებულ ობიექტებზე სამუშაოების დაწყების მაქსიმუმის ციფრი შემსრულებელი ორგანიზაციის მხრიდან შეზღუდული არ არის“.

შესრულებული სამუშაოების საგარანტიო პერიოდი შეადგენს 24 თვეს საბოლოო მიღება-ჩაბარების აქტის გაფორმებიდან; საგარანტიო პერიოდის განმავლობაში ხარვეზის გამოვლენის შემთხვევაში კი მიმწოდებელი ვალდებულია შემსყიდველის მიერ დადგენილ ვადაში მოახდინოს გამოვლენილი ხარვეზის აღმოფხვა ისე, რომ შესრულებული სამუშაოები სრულ შესაბამისობაში იყოს ხელშეკრულებით გათვალისწინებულ პირობებთან.

– – – – – –

„ჭაობის დასახლებაში“ კიდევ ერთი, გიორგი ბრწყინვალის ქუჩის კეთილმოწყობისთვის ქალაქის 2019 წლის ბიუჯეტში 6 471 900 ლარია გათვალისწინებული.

ამ თემაზე: 6,4 მილიონი ლარი ბათუმში გიორგი ბრწყინვალის ქუჩის მოსაწესრიგებლად – ტენდერი

ამავე დასახლებაში სხვა, 8 ქუჩის კეთილმოწყობაზე ტენდერი ბათუმის მერიის კეთილმოწყობის სამმართველომ 2018 წლის ივლისშიც გამოაცხადა. შესყიდვის სავარაუდო ღირებულება 6 მილიონ 587 866 ლარი იყო. ბაგრატიონის შესახვევი, გურამიშვილის ქუჩა, გურამიშვილის შესახვევი, მელიქიშვილის I შესახვევი, ოსტროვის I შესახვევი, სააკაძის ქუჩა, სააკაძის შესახვევი, ჩოლოყაშვილის II შესახვევი. სამუშაოები იმ მიზეზის გამო ვერ დაიწყო, რომ ბათუმის საქალაქო სასამართლომ ეს ტენდერი შეაჩერა.

ამ თემაზე: ბათუმში 8 ქუჩის კეთილმოწყობა გადაიდო – სასამართლომ მერიის ტენდერი შეაჩერა

 

მთავარი ფოტო: ჰ. აბაშიძის ქუჩა ბათუმში / ფოტო „ბათუმელების“ არქივიდან.
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com