ქობულეთს ბათუმის ნაგავსაყრელი ნარჩენების უფასოდ განთავსებაზე უარს ეუბნება



ბათუმის ნაგავსაყრელი უარს ამბობს ქობულეთის მუნიციპალიტეტის ტერიტორიაზე შეგროვებული ნარჩენების უსასყიდლოდ შეტანაზე და „ქობულეთის სანდასუფთავებას“ ფულის გადახდას სთხოვს. ქობულეთში შეგროვებული ნარჩენების განთავსებაზე უარს აცხადებენ ფოთისა და ოზურგეთის სოფელ მერიის მუნიციპალური ნაგავსაყრელები.

„2019 წლის პირველი თებერვლიდან დაგვიდგა საჭიროება გავაფორმოთ ხელშეკრულება ბათუმის ნაგავსაყრელთან, რადგანაც მოვახდინოთ ნარჩენების შეტანა. წინააღმდეგ შემთხვევაში ვერ მოხერხდება ვერსად ნაგვის გატანა და წარმოშობს დიდ პრობლემებს მუნიციპალიტეტის ტერიტორიაზე დასუფთავებასთან დაკავშირებით.“ – აღნიშნულია „ქობულეთის სანდასუფთავების“ იმ განაცხადში, რომლითაც ის შესყიდვების სააგენტოს გამარტივებულ შესყიდვაზე თანხმობას სთხოვს.

„ქობულეთის სანდასუფთავების“ გათვლებით, მომდევნო 11 თვეში დაახლოებით 21 700 კუბური მეტრი ნარჩენების გატანას გეგმავენ და ამ ნარჩენების ბათუმის ნაგავსაყრელზე განთავსებისთვის 41 230 ლარი იქნება საჭირო.

„ქობულეთის სანდასუფთავებას“ არ გააჩნია ნაგავსაყრელი, სადაც  მუნიციპალიტეტის მასშტაბით შეგროვებულ ნაგავს განათავსებს, ამიტომ უკვე 2 წელია ნაგავი ოზურგეთის, ფოთისა და ბათუმის ნაგავსაყრელებზე გააქვთ.

„ქობულეთის მუნიციპალიტეტში მიმდინარეობს ახალი გადამამუშავებელი ევროპული სტანდარტების ნაგავსაყრელის მშენებლობა [სოფელ ცეცხლაურთან – ავტ.], რომელიც მოემსახურება დასავლეთ რეგიონს, ამიტომ დროებითი ნაგავსაყრელის მოსაწყობად ტერიტორიის გამოყოფა [ამ ახალი ნაგავსაყრელის გახსნამდე] ვერ მოხერხდა, რადგანაც ქობულეთი არის ტურისტული ზონა და ტერიტორიის ნახევარი არის დაცული ტერიტორიების ნუსხაში შესული,“ – აღნიშნულია შესყიდვების გვერდზე.

ბათუმის ნაგავსაყრელი, რომელიც ადლიაში მდებარეობს, აუცილებლად დასახურია, რაც ცეცხლაურში ახალი ნაგავსაყრელის მშენებლობამდე ვერ ხერხდება.

ბათუმის მერიის შპს „სანდასუფთავებაში“ განაცხადეს, რომ ბათუმის ნაგავსაყრელს ოპერირებას ტენდერში გამარჯვებული კერძო კომპანია, შპს „სევერი“ უწევს. შესაბამისად, „ქობულეთის სანდასუფთავებამ“ ნარჩენების ბათუმის ნაგავსაყრელზე განთავსებისთვის თანხა შპს „სევერს“ უნდა გადაუხადოს.

 

მთავარი ფოტო: გადავსებული ურნები ქალაქ ქობულეთში / ფოტო „ბათუმელების“ არქივიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com