კვირის ამბები,მთავარი,სიახლეები

საფრანგეთში მცხოვრები ქართველების საჩუქარი ბავშვებს ყოფილი 25-ე ბატალიონის დასახლებიდან

14.01.2019 • 8665
საფრანგეთში მცხოვრები ქართველების საჩუქარი ბავშვებს ყოფილი 25-ე ბატალიონის დასახლებიდან

„ქართველები საფრანგეთში“ – ამ ასოციაციის ფინანსური დახმარებითა და „თავისუფალ ჟურნალისტთა სახლის“ ორგანიზებით, ხელვაჩაურში, ფრიდონ ხალვაშის მეცხრე შესახვევში, ყოფილი 25-ე ბატალიონის ტერიტორიაზე მცხოვრებმა 229 ბავშვმა დღეს, 14 იანვარს, პერსონალური საახალწლო საჩუქარი მიიღო.

„დღეს რა ვჭამოთ? – ბავშვები 25-ე ბატალიონიდან“ – ამ სათაურით სტატია „ბათუმელებმა“ გასული წლის ოქტომბერში მოამზადა. სტატიის გამოქვეყნების შემდეგ, „ბათუმელებს“ დაუკავშირდნენ ასოციაცია – „ქართველები საფრანგეთში“ წარმომადგენლები. სწორედ აქედან დაიწყო საქველმოქმედო აქციის ორგანიზება, რომელმაც მასშტაბური ხასიათი მიიღო.

ასოციაციას დასახლებაში მცხოვრები ბავშვების სახელობითი სია გადაეცა. ამ სიის მიხედვით, საფრანგეთში მცხოვრებმა ქართველებმა შეაგროვეს ტანსაცმელი, საყოფაცხოვრებო ნივთები და ბათუმში, 25-ე ბატალიონის ტერიტორიაზე მცხოვრები ბავშვებისთვის გამოაგზავნეს. საფრანგეთში მცხოვრებმა ქართველებმა ამ საჩუქრებთან ერთად გამოაგზავნეს თანხაც, რითაც ბავშვებისთვის წიგნების, სათამაშოებისა და ჰიგიენური საშუალებების შეძენა მოხერხდა.

ასოციაცია “ქართველები საფრანგეთშის” მიერ ორგანიზებული საქველმოქმედო აქციის ფარგლებში საჩუქარი 229 ბავშვს გადაეცა

„აქციაში მონაწილეობა საფრანგეთში მცხოვრებმა 100-მდე ადამიანმა მიიღო. უღრმესი მადლობა ყველა მათგანს, არ არსებობს მცირე და დიდი წვლილი, მათ გარეშე ეს აქცია არ იარსებებდა. უღრმესი მადლობა ყველას შეტანილი წვლილისთვის. განსაკუთრებული მადლობა, “ბათუმელებს” და „თავისუფალ ჟურნალისტთა სახლს“, ასევე “ქართველები საფრანგეთში” ასოციაციის გულშემატკივარს თბილისში, თეო ლორთქიფანიძეს. მათ თავდაუზოგავი და უანგარო შრომა გასწიეს, რათა 229 ბავშვს განსაკუთრებული საჩუქარი მიეღო საახალწლოდ,“ – ამბობს სალომე საძაგლიშვილი, ასოციაცია „ქართველები საფრანგეთშის“ წარმომადგენელი.

ყოფილი 25-ე ბატალიონის ტერიტორიაზე მცხოვრები ბავშვებისთვის განკუთვნილი საჩუქრები

ასოციაცია „ქართველები საფრანგეთშის“ აქტივობების მიზანია საფრანგეთში მცხოვრებ ქართველთა ინტეგრირება საფრანგეთში და საქართველოში მყოფ ქართველებთან ურთიერთობის შენარჩუნება.

„თავდაპირველად, საფრანგეთში მცხოვრებ ქართველს, ზაზა ფუტკარაძეს გაუჩნდა იდეა შეექმნა ჯგუფი ფეისბუქზე, საფრანგეთში მცხოვრები ქართველებისთვის. დღეს ჯგუფი 17 000 წევრს ითვლის.

2016 წლიდან “ქართველები საფრანგეთში” ასოციაციად დავარეგისტრირეთ და ეს სივრცე უამრავი ადამიანისთვის არის ინფორმაციის გაცვლა-გამოცვლის, დახმარების, საფრანგეთში ინტეგრირების საშუალება. ასოციაციის ხელშეწყობით საფუძველი ჩაეყარა მნიშვნელოვან აქტივობებს საფრანგეთსა და საქართველოში, მაგალითად, პარიზში არალეგალურად მყოფ ქართველებს ფრანგული ენის სწავლების უფასო კურსს უტარებს ფრანგი პედაგოგი, ქართველ შშმ პირებს უფასოდ ემსახურება ტაქსი პარიზში, ასევე, თარჯიმნის უფასო მომსახურება და სხვ.

ასოციაციას ჰყავს მნიშვნელოვანი პარტნიორი გადამზიდავი კომპანია „იბერია სერვისი”, რომელიც უსასყიდლოდ აგზავნის ასოციაციის ტვირთს საქართველოში. საქველმოქმედო აქციები უკვე ჩავატარეთ: ხევსურეთში, კახეთში, აჭარაში, იმერეთში, თბილისში, ქართლში და არასდროს არ გავჩერდებით“, – ამბობს სალომე საძაგლიშვილი.

“თავისუფალ ჟურნალისტთა სახლის” თანამშრომლები ანაწილებენ სახელობით საჩუქრებს 229 ბავშვისთვის

ასეთ სახლებში ცხოვრობენ ბავშვები ყოფილი 25-ე ბატალიონის ტერიტორიაზე

ასეთ სახლებში ცხოვრობენ ბავშვები ყოფილი 25-ე ბატალიონის ტერიტორიაზე

გადაბეჭდვის წესი


ასევე: