გერმანია, სავარაუდოდ, ბათუმში 25 საბავშვო ბაღის ენერგოეფექტურად გარდაქმნას დააფინანსებს

ბათუმის მერიის ინფორმაციით, პროექტი, რომელიც ჯერ კიდევ მოსამზადებელ ეტაპზეა, ითვალისწინებს სხვადასხვა უახლესი ტექნოლოგიის ტესტირებას, ძირითადად, საბავშვო ბაღების ენერგოეფექტურად გარდაქმნას. გერმანიასა და საქართველოს შორის ფინანსური თანამშრომლობის პროგრამის ფარგლებში, პროექტს გერმანიის რეკონსტრუქციის საკრედიტო ბანკი [KFW] დააფინანსებს.

ბათუმის მერმა, ლაშა კომახიძემ, დღეს, 27 დეკემბერს, საკრებულოს სხდომაზე დააზუსტა, რომ „ეს იქნება გრანტი, ყოველგვარი პროცენტების გარეშე.“

პროექტის მოსამზადებელ ეტაპზე შეარჩიეს 25 ბაღი და  კულტურული მემკვიდრეობის ერთი ძეგლი. KFW -ის კონსულტანტებმა მოამზადეს დაინტერესებული მხარეებისა და ბათუმის მერიის ინსტიტუციონალური შესაძლებლობების კვლევა.

მერიის ინფორმაციით, KFW-თან ერთად შეხვედრები გაიმართა პროექტის ყველა შესაძლო დაინტერესებულ მხარესთან, შემდეგ კი მოამზადეს საპროექტო წინადადება, რომელიც გერმანიის რეკონსტრუქციის ბანკმა, გერმანიის მთავრობას დაფინანსების დამტკიცების მიზნით უნდა წარუდგინოს. მერიის ინფორმაციით, საპროექტო წინადადება უკვე გაგზავნილია.

დაფინანსების შემთხვევაში გათვალისწინებულია ხუთი მილიონი ევროს გამოყოფა გრანტის სახით. ამ თანხით ჩატარდება 25 საბავშვო ბაღის შენობის ენერგოეფექტურად გარდაქმნისთვის შესაბამისი ინფრასტრუქტურულ-სარეაბილიტაციო სამუშაოები.

რაც შეეხება ბათუმის ბიუჯეტს – მერიის ინფორმაციით, 2019 წელს ლერმონტოვისა და ხიმშიაშვილის ქუჩების მიმდებარედ [ფერაძის ქუჩაზე] N27 საბავშვო ბაღის საძირკველს გაამაგრებენ და შენობას სარეაბილიტაციო სამუშაოებს ჩაუტარებენ. სამუშაოები შესრულდება სკოლამდელი აღზრდისა  და განათლების ქვეპროგრამით – „საბავშვო ბაღების შენობების მშენებლობა და კაპიტალური რეაბილიტაცია“.

გარდა ამისა, ა(ა)იპ „საქალაქო ინფრასტრუქტურისა და კეთილმოწყობის სამმართველოს“ უკვე მომზადებული აქვს ერთი საბავშვო ბაღის მშენებლობისა და ორის ბაღის სარეაბილიტაციო სამუშაოების საპროექტო-სახარჯთაღრიცხვო დოკუმენტაცია.

მომავალ წელს დაგეგმილია:

• ლერმონტოვის N96-ის მიმდებარედ საბავშვო ბაღის მშენებლობა
• აღმაშენებლის ქუჩაზე N10 საბავშვო ბაღის სარეაბილიტაციო სამუშაოები
• ვაჟა-ფშაველას ქუჩაზე N14 საბავშვო ბაღის სარეაბილიტაციო სამუშაოები