რამდენმა ბავშვმა და მოზარდმა მიმართა 2018 წელს ფსიქოლოგიური დახმარების ცენტრს

2018 წელს, ქვეყნის მასშტაბით, მანდატურის სამსახურთან არსებულ ფსიქოლოგიური დახმარების ცენტრს 2 795-მა სკოლის მოსწავლემ მიმართა.

მანდატურის სამსახურში „ბათუმელებს“ უთხრეს, რომ წინა წლებთან შედარებით ფსიქოლოგებთან მოზარდების  მიმართვის რაოდენობა გაზრდილია. „2016 წელს ფსიქოლოგიური მომსახურების ცენტრში სულ 1593 ახალი  შემთხვევა იყო შესული, 2017 წელს კი, 2451 შემთხვევა“.

2016 წელს ბათუმში ფსიქოლოგიური დახმარების ცენტრს 371-მა ბავშვმა და მოზარდმა მიმართა. მაშინ ცენტრის ფსიქოლოგი ამბობდა, რომ ფსიქოლოგიური დახმარების ცენტრში ბავშვები და მოზარდები მანდატურის სამსახურის რეკომენდაციით მიდიან, თუმცა მშობლის თანხმობა აუცილებელია.

ფსიქოლოგიური დახმარების ცენტრი 6-დან 18 წლამდე ასაკის სკოლის მოსწავლეებს, მათი ოჯახის წევრებს, ასევე, პედაგოგებსა და მანდატურებსაც სთავაზობს მომსახურებას.

როგორც მანდატურის სამსახურში გვეუბნებიან, მიმართვის მოტივები სხვადასხვანაირია, მათ შორისაა: ბულინგი, ემოციური პრობლემები, დესტრუქციული ქცევა, კომუნიკაციის პრობლემები, აკადემიური სფეროს პრობლემები და ა.შ

უცნობია, ყველაზე მეტი მიმართვა რომელი რეგიონიდან იყო 2018 წელს, რადგან მანდატურის სამსახურმა, მოთხოვნის მიუხედავად ინფორმაცია არ მოგვაწოდა.

საქართველოს მასშტაბით ამ დროისთვის ფსიქოლოგიური დახმარების რვა ცენტრი ფუნქციონირებს. აქედან ორი ცენტრში მუშაობს თბილისში, თითო  ცენტრი – თელავში, რუსთავში, გორში, ქუთაისში, ფოთსა და ბათუმში.

ბავშვებისა და მოზარდების ფსიქოლოგიური დახმარების ცენტრი 2013 წელს შეიქმნა.

მთავარი ფოტო: „ბათუმელების“ არქივიდან. [მოსწავლეების ნახატები ფსიქოლოგიური დახმარების ცენტრში].

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com