როგორ დავგეგმოთ ბათუმის მერთან შეხვედრა ინტერნეტით

ბათუმის მერი ლაშა კომახიძე აცხადებს, რომ მოსახლეობასთან უშუალო კომუნიკაციის მიზნით შეიქმნა ვებგვერდი, რომლის მეშვეობითაც მოქალაქეები მერთან შეხვედრას თვითონვე დაგეგმავენ. პროგრამის სახელწოდებაც სწორედ ასე ჟღერს – „დაგეგმე მერთან ვიზიტი ონლაინ“. თუმცა, ეს ვებგვერდი, ჯერჯერობით, მოქალაქეებისთვის ხელმისაწვდომი არ არის.

როგორც ბათუმის მერი განმარტავს, ახალი ინსტრუმენტი საშუალებას მისცემს ნებისმიერ მოქალაქეს, ინტერნეტის მეშვეობით დაგეგმოს შეხვედრა მერთან.

„მერთან შეხვედრის თარიღის შესახებ მოქალაქე ინფორმაციას საკუთარ მობილურ ტელეფონზე სმს-ს შეტყობინების სახით მიიღებს. არა მერიის რომელიმე სამსახურისაგან, არა თანაშემწისგან, არა სხვა ვინმე ადამიანისგან, არამედ უშუალოდ ჩემგან“, – ამბობს ლაშა კომახიძე.

მისი თქმით, იმისათვის, რომ მერთან შეხვედრა დაგეგმოთ, საჭიროა შეხვიდეთ ვებგვერდზე, შეავსოთ თქვენი მონაცემები და დაწეროთ, თუ რა საკითხზე გსურთ მერთან შეხვედრა.

„ამ პროექტის შექმნა განაპირობა იმან, რომ ყველა ადამიანს აქვს სურვილი თავისი პრობლემა უშუალოდ გაუზიაროს ქალაქის მერს. მიუხედავად ყოველდღიური შეხვედრებისა, მიუხედავად ადმინისტრაციულ ერთეულში ყოველ ორშაბათს მოსახლეობასთან შეხვედრისა, მე ვგრძნობ, რომ არის საჭიროება და ამისთვის შეიქმნა ეს ინსტრუმენტი“, – ამბობს ბათუმის არჩეული მერი, ლაშა კომახიძე.

მერიის წლის ანგარიშის პრეზენტაციის დროს, რომელიც 26 ნოემბერს გაიმართა, ლაშა კომახიძემ განაცხადა, რომ ახალი პროექტის – ვებგვერდის პრეზენტაცია რამდენიმე დღეში გაიმართებოდა.

თუმცა, დღეს „ბათუმელებს“ მერიაში უთხრეს, რომ პრეზენტაციის კონკრეტული თარიღი, ჯერჯერობით, უცნობია. „ამჟამად მერი ბრიუსელში იმყოფება და იქედან ჩამოსვლის შემდეგ გადაწყდება ეს საკითხი“, – გვითხრეს მერიაში.

მერმა 26 ნოემბერს, პრეზენტაციაზე კიდევ ერთი ონლაინპორტალის idea.batumi.ge შესახებ ისაუბრა. მისი თქმით, აღნიშნულ ვებგვერდზე მოქალაქეებს შეუძლიათ თავიანთი იდეების, მოსაზრებების წარდგენა, რომელსაც მოწონების შემთხვევაში მერია აუცილებლად გაითვალისწინებს.

ახალი პორტალის ამოქმედების შესახებ ლაშა კომახიძემ მერიის წლის ანგარიშის პრეზენტაციისას განაცხადა.

 

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com