„კომპანიამ გაგვაცურა, პროკურატურა არ რეაგირებს“ – მოქალაქეები თანხის დაბრუნებას ითხოვენ

აჭარაში ათეულობით მოქალაქე პროკურატურისგან თაღლითობის ფაქტზე რეაგირებას ითხოვს. დღეს, 8 ნოემბერს, ისინი „დემოკრატიული ჩართულობის ცენტრში“ აპირებენ  შეხვედრას ორგანიზაციის – „ჩვენი უფლებებისთვის“ ხელმძღვანელთან, თამაზ ბაკურიძესთან. მოქალაქეები კონკრეტული კომპანიისგან თანხის დაბრუნებას ითხოვენ და შეხვედრაზე უნდა დაგეგმონ, რა გზით დაიწყონ სამართლებრივი დავა.

„წლის დასაწყისში ჩავრიცხე კომპანია HD Forex-ის ანგარიშზე 5 ათასი დოლარი, ზოგმა მეტი, ზოგმა – ნაკლები ჩარიცხა… ეს იყო საბროკერო კომპანია. გვითხრეს, რომ თანხას თუ ჩავდებდით, ამით საფონდო ბირჟები ისარგებლებდნენ და ჩვენ ყოველთვიურ სარგებელს მივიღებდით. თავდაპირველად მართლაც დაირიცხა მოგება 200 დოლარი, ზოგჯერ სამასიც იყო, მაგრამ ამის გამოტანის უფლებას არ გვაძლევდნენ, კომპანიას დასტური უნდა მოეცა, რომ თანხა აგეღო… მე არ მიცდია მოგების გამოტანა, მაგრამ სხვამ რომ სცადა, უთხრეს, რა გეჩქარება, დაგროვდეს კარგად, არ გირჩევნიაო? შექმნილი იყო თბილისის  და ბათუმის ტრეიდერთა ჯგუფები. სექტემბერში ამ ჯგუფში დაწერა კომპანიის დირექტორმა, რომ გაკოტრდა. მას შემდეგ ტელეფონებს აღარ პასუხობენ, პროკურატურას სექტემბერშივე მივმართეთ, მაგრამ ამ დრომდე არც დაუკავებიათ ვინმე და არც თანხას გვიბრუნებენ. მე, პენსიონერმა ქალმა მოვახერხე და შევიტანე 5 ათასი, ვიფიქრე, დავეხმარები რაღაცით ოჯახს-მეთქი და ასე დამემართა,“ – გვითხრა ერთ-ერთმა დაზარალებულმა, რომელსაც ვინაობის გამხელა არ სურს.

დაზარალებულების თქმით, ათეულობით ადამიანი ამ გზით ბათუმსა და თბილისში დაზარალდა.

გაწყებულია თუ არა გამოძიება თაღლითობის ფაქტზე, პროკურატურას ამ საკითხზე კომენტარი „ბათუმელებისთვის“ ჯერჯერობით არ მოუწოდებია.

 

ნეტგაზეთის მასალების სხვა გამოცემებში გადაბეჭდვის წესი


ავტორი