სახელმძღვანელოების გრიფირებაზე სამინისტრომ ახალი კონკურსი გამოაცხადა

საქართველოს განათლების სამინისტრო საბაზო და საშუალო საფეხურების სახელმძღვანელოების გრიფირების კონკურსს აცხადდებს.

2018 წელს კონკურსი მე-7 კლასის სახელმძღვანელოების გრიფირებაზე გამოცხადდება, 2019 წელს  – მე-8 და მე-9 კლასების სახელმძღვანელოების გრიფირებაზე, ხოლო 2020 წელს, ეროვნული სასწავლო გეგმის საშუალო საფეხურის მიმდინარე რევიზიის დასრულების შემდეგ, კონკურსი საშუალო საფეხურის სახელმძღვანელოებზე.

სკოლამდელი და ზოგადი განათლების განვითარების დეპარტამენტის უფროსის, მარიამ ჩიქობავას განცხადებით, ახალი კონკურსის პირობები პროცესის დასაწყისშივე ცხადი და მკაფიო იქნება ყველასთვის და „ადგილი არ ექნება გზადაგზა განხორციელებულ არსებითი ხასიათის ცვლილებებს“. ჩიქობავას თქმით, გამომცემლებთან და სხვა დაინტერესებულ პირებთან კონსულტაციების შემდეგ დამტკიცდება რეცენზირების წესი, ასევე, შეფასების შინაარსობრივი და ტექნიკური კრიტერიუმები.

მისივე თქმით, „წინა გრიფირებისგან განსხვავებით, შემფასებლების შერჩევის პროცესი  სრულიად გამჭვირვალე იქნება და სახელმძღვანელოებს შეაფასებს არა დამატებითი კომისია, გამსწორებელთა მხოლოდ ერთი ჯგუფი“.

განათლების სამინისტროს ინფორმაციით, სახელმძღვანელოები შეფასდება რამდენიმე მიმართულებით: ეროვნულ სასწავლო გეგმასთან შესაბამისობა; შინაარსობრივი გამართულობა; სტრუქტურული გამართულობა; ენობრივი გამართულობა; სამართლებრივ და ეთიკურ ნორმებთან შესაბამისობა; მდგრადი განვითარების პრინციპებთან შესაბამისობა.

„განათლების სისტემაში  მიმდინარე რეფორმის საფუძველზე, ახალ ეროვნულ სასწავლო გეგმაში განსაკუთრებული აქცენტი არა მხოლოდ შინაარსის დამახსოვრებაზე, არამედ მის კრიტიკულ გააზრებაზე, კვლევითი, შემოქმედებითი და თანამშრომლობითი უნარების განვითარებაზეა გაკეთებული.

შესაბამისად, ამ კომპონენტებთან ერთად, გრიფირების პროცესში განსაკუთრებული ყურადღება დაეთმობა სახელმძღვანელოების ხარისხის უზრუნველყოფას. მნიშვნელოვანია, რომ სახელმძღვანელოების ავტორებისთვის მოთხოვნები მკაფიო  იყოს,“ –  განაცხადა მარიამ ჩიქობავამ ბრიფინგზე.

გრიფირების პროცედურაში შესული ცვლილებების მიხედვით, სახელმძღვანელოების წერისთვის გამომცემლებს უფრო მეტი დრო ექნებათ, მხოლოდ მე-7 კლასის სახელმძღვანელოსთვის – 4 თვეზე მეტი.

„ასევე მეტი დრო დაიხარჯება თავად ავტორებზე. კერძოდ, მათთვის ინტენსიურად ჩატარდება საგნობრივი კონსულტაციები, კონკრეტული საგნის სტანდარტის გააზრებისა და შეფასების კრიტერიუმების გაგება-გააზრებისთვის. ავტორებისთვის თემატურ სამუშაო შეხვედრებს ჩაატარებენ სამთავრობო და არასამთავრობო ორგანიზაციების წარმომადგენლებიც, რადგან სამინისტროსთვის მნიშვნელოვანია, რომ მათთვის არც ერთი კითხვა არ დარჩეს პასუხგაუცემელი,“ – აღნიშნა მარიამ ჩიქობავამ.

მისივე თქმით, მნიშვნელოვანია ისიც, რომ რაოდენობრივად შემცირდა შინაარსობრივი კრიტერიუმები, რომლებიც უფრო მოქნილი, მკაფიო და ეროვნულ სასწავლო გეგმაზე ორიენტირებული გახდა.

________________

ფოტოზე: მარიამ ჩიქობავა 

 

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com