ლოს ანჯელესში ზაზა ხალვაშის „ნამეს” პირველი ჩვენება გაიმართება

დღეს, 7 ნოემბერს, აშშ-ში, ლოს ანჯელესში „ოსკარისა“ და „ოქროს გლობუსის“ კამპანიის ფარგლებში ზაზა ხალვაშის ფილმის, „ნამეს“ პირველი, ოფიციალური ჩვენება გაიმართება.

ეროვნული კინოცენტრის ცნობით, დამატებით ორ ჩვენებას 11-15 ნოემბერს EFP (European Film Promotion) გაუწევს ორგანიზებას. ჩვენებებს ამერიკის კინოაკადემიის წევრები, კინოფესტივალის წარმომადგენლები, ცნობილი უცხოური გამოცემების ჟურნალისტები და საერთაშორისო ბაიერები დაესწრებიან.

„ნამეს“ მსოფლიო პრემიერა ტოკიოს საერთაშორისო კინოფესტივალზე 2017 წელს შედგა.

აჭარის მთიანეთში გადაღებული ფილმი ოსკარისა და ოქროს გლობუსის საუკეთესო უცხოენოვანი ფილმის ნომინაციისთვის იბრძოლებს. კონკურსის ამ ნომინაციაზე წელს ოთხმოცზე მეტი ქვეყნიდან წარადგენენ ფილმებს.

„ნამეს“ პირველ, ოფიციალურ ჩვენებაზე დღეს ამერიკაში ფილმის რეჟისორი, ზაზა ხალვაში და მთავარი როლის შემსრულებელი, მარისკა დიასამიძე წარადგენენ.

ოსკარის ნომინანტთა სია 2019 წლის იანვარში გახდება ცნობილი, ოქროს გლობუსის ნომინანტებს კი 2018 წლის დეკემბერში გამოავლენენ.

 


მთავარ ფოტოზე: კადრი ფილმიდან „ნამე”

ამავე თემაზე:

ცისნამი – შიშთან ბრძოლაში გამარჯვებული გოგო ზაზა ხალვაშის ფილმიდან „ნამე”

 

ნეტგაზეთის მასალების სხვა გამოცემებში გადაბეჭდვის წესი

ავტორი
თამუნა ნერგაძე არის "ბათუმელების" რეპორტიორი 2017 წლის ოქტომბრიდან