„საერთო მტრის წინაშე ყველამ უნდა დაივიწყოს წყენა“ – არჩილ ხაბაძის საარჩევნო სტრატეგია 

„ჩვენი გვარდია დიდია, ყველა წყენა გვერდით უნდა გადავდოთ და გავერთიანდეთ, რომ მეორე ტურში დავდოთ სასურველი შედეგი“, – ამ მიზნით აჭარის მთავრობის ყოფილი თავმჯდომარე, საქართველოს პარლამენტის წევრი, არჩილ ხაბაძე ბათუმში ამომრჩეველთან შეხვედრებს მართავს. ამომრჩეველთან შეხვედრებს ქობულეთში მართავს აჭარის  მთავრობის კიდევ ერთი ყოფილი თავმჯდომარე ზურაბ პატარაძეც.

რა სტრატეგიით აპირებს „ძველი და ახალი, გაერთიანებული დიდი გვარდია“ არჩევნების მოგებას, ამაზე არჩილ ხაბაძეს ვკითხეთ.

ბატონო არჩილ, როგორც გავიგეთ „ქართული ოცნების“ ბათუმის შტაბის ერთ-ერთი ხელმძღვანელი იქნებით და კოორდინირებას გაუწევთ შტაბის მუშაობას ბათუმში. გვითხარით, რას აპირებთ?

პირდაპირი მნიშვნელობით ვერ ვიტყვით, რომ შტაბში კონკრეტული პოზიცია ან პირდაპირი დავალება მაქვს, მაგრამ ბატონ ზურაბ პატარაძესთან და თორნიკე რიჟვაძესთან ერთად მთავარი დღეს არის, მოვახდინოთ ძალების კონცენტრირება ერთი მიმართულებით, რომ მაქსიმალურად ყველა, სადაც სისუსტე იყო, გამოვიჩინოთ ჩვენი გამოცდილება და რესურსები – ეს არის მთავარი მოტივი. ვინ სად იქნება, ეს უფრო მეორეხარისხოვანია, სადაც საჭირო იქნება, თითოეული იქ დავდგებით. მთავარია, კოორდინირებას მოქმედი თავმჯდომარე თავისი რესურსებით გაუძღვება და ჩვენ სადაც ვიქნებით საჭირო,  სისტემის დალაგებაში თუ კოორდინაციის ამაღლებაში, თუ მოსახლეობასთან შეხვედრებში, ამ რესურსს ჩვენ მთლიანად გამოვიყენებთ.

საჭიროა მოქმედი მხარდამჭერებისა და ჩვენი ძველი მოქმედი გვარდიის გაერთიანება, ასევე ყველაფრის უკან გადადება, რომ ჩვენ ჩვენს ამომრჩევლამდე მივიტანოთ ის ყველაფერი, რაც გვიკეთებია ამ ექვსი წლის განმავლობაში თითოეულს და ერთად.

რატომ დასჭირდა პარტიას არჩევნების წინ მიიტანოს ამომრჩეველთან სათქმელი თუ რას აკეთებს, ამ დრომდე ამომრჩეველთან კომუნიკაცია გაწყვეტილი იყო? – თქვენ ასევე ახსენეთ სიტყვა სისუსტე, რა იგულისხმეთ?

მე მინდა დავაფიქსირო, რომ 28 ოქტომბრის არჩევნების შედეგები მთლიანად საქართველოში და მათ შორის აჭარაში იყო მანიშნებელი, რომ ჩვენ სადღაც შეცდომები დავუშვით, სადღაც არ მივაქციეთ ყურადღება პრობლემებს და მივიღეთ ეს შედეგი. მხედველობაში მაქვს მთლიანად ექვსი წლის მუშაობა, ეს იქნება საინვესტიციო მიმართულება, ბიზნესთან დამოკიდებულება თუ ნებისმიერი სხვა. მათ შორის შტაბში მენეჯერული პრობლემებიც – ეს ყველაფერი იყო გამოსასწორებელი. ჩვენ გავერთიანდით, ერთად შევიკარით, ყველამ გადადო სხვა საქმიანობა. ბატონი ზურა ჩამობრძანდა აზერბაიჯანიდან, ჩვენ აქ ვართ, საქართველოში და ჩავებით ბოლომდე, რომ გამოვასწოროთ ეს სისუსტეები და ნაკლოვანებები რაც არის – დავუდგეთ გვერდით პარტიას, ეს არჩევნები უნდა მოვიგოთ და დავდოთ შედეგი.

ნაკლოვანებებს ახსენებთ, მაგრამ არავინ აკონკრეტებს თუნდაც ყველაზე მეტად რაზე გაგიბრაზდათ ამომრჩეველი. რა არის ის საკითხები, რომლებიც, თქვენი აზრით, გამოსასწორებელია?

რამდენიმე კომპონენტს გამოვყოფ, რასაც ჩვენი ამომრჩეველი ყოველთვის აფიქსირებდა და „ქართული ოცნებიდან“ ელოდებოდა რეაქციას. ეს, პირველ რიგში, იყო სამართლიანობის აღდგენა, რაშიც ალბათ ჩვენი სისუსტე გამომჟღავნდა, სათანადო ყურადღება შეიძლება არ მიექცა ამას. ამასთან დაკავშირებით სადღაც 3-ათასამდე განცხადება იყო შემოსული. როგორც მახსოვს, ექვსასამდე დაკმაყოფილდა. ბევრისთვის იყო ალბათ ეს საკითხი პრობლემატური, იმ რეჟიმის პერიოდში განაწყენებული და დაჩაგრული ადამიანების მოთხოვნები დასაკმაყოფილებელია.

ასევე შემიძლია გამოვყო, რომ ის მთავარი მიმართულებები, რაც გაკეთდა „ოცნების“ პერიოდში, მოსახლეობამდე ბოლომდე არ არის მიტანილი, გამოსასწორებელია. პიარს ვგულისხმობ, ამდენი ინფრასტრუქტურული პროექტი დავიწყეთ, შემოვლითი გზა, ესტაკადა ბათუმამდე, ხულო-ადიგენის გზა გაკეთდა, რაც გააკეთა მთავრობამ და „ოცნებამ“, ბოლომდე არ არის მიტანილი მოსახლეობამდე.

როგორც პარლამენტარმა მინდა აღვნიშნო, რომ 13 ნოემბერს გვექნება მესამე მოსმენა პარლამენტში და ვაპირებთ გამკაცრებას იმ მუხლებისა, რაც არის ნარკოტიკებთან დაკავშირებით და ასევე  პარტიის გადაწყვეტილებაა, მარიხუანის კულტივაციასთან დაკავშირებით კანონპროექტის უკან გაწვევის საკითხი.

ისევ ვამბობ, რომ გვქონდა კომუნიკაციის პრობლემა ამომრჩეველთან. ბატონი ბიძინას პარტიაში დაბრუნების შემდეგ ნელ-ნელა გამოსწორდება ყველაფერი, მათ შორისაა საკადრო ამბებიც, ეს ყველაფერი  უნდა გამოსწორდეს და მოსახლეობამ უნდა გაგვიგოს.

ბევრი პოსტი წავიკითხეთ შერიგებაზე, ყოფილი თანამდებობის პირი მერაბ ნაგერვაძე შემიძლია დაგისახელოთ მაგალითად – ამ ადამიანებს გულისხმობთ, როცა ძველ გვარდიას ახსენებთ?

კი ბატონო, მენეჯმენტის კუთხით ზუსტად ამას გამოვყოფდი, იყო პრობლემა, რომ ჩვენი ამომრჩეველი ვერ მივიყვანეთ საარჩევნო ყუთებამდე. იყო სხვა ფსიქოლოგიური მომენტიც, რომ მაინც გაიმარჯვებს მმართველი პარტია და ჩემი ერთი ხმა არ იქნება გადამწყვეტი და ასე შემდეგ, ნიჰილიზმი ნამდვილად იყო.

2013 წლიდან 2018-ის ჩათვლით ვინც გუნდიდან განაწყენებული გავიდა რაღაც პრეტენზიებით, სამართლიანად, სუბიექტურად თუ ობიექტურად, ზუსტად ეს არის მთავარი, რომ დღეს გავერთიანდეთ საერთო ოპონენტების წინააღმდეგ. დღეს გამოიკვეთა ისევ ორი ძალა – ეს არის „ქართული ოცნება“ და „ნაციონალური მოძრაობა“. შესაბამისად, საერთო მტრის წინაშე ყველამ უნდა დაივიწყოს ყველა წყენა და ისე როგორც 2012 წელს, უნდა მოხდეს გაერთიანება.

ფოტო „ბათუმელების“ არქივიდან

ნეტგაზეთის მასალების სხვა გამოცემებში გადაბეჭდვის წესი


ავტორი