60 წლის მალხაზ ბაკურიძე ორ მცირეწლოვან შვილთან და მეუღლესთან ერთად ბათუმში ორსართულიან, კერძო სახლში ცხოვრობს, საიდანაც გამოსახლებით ემუქრებიან. მისი სახლი იპოთეკითაა დატვირთული და რთული სასესხო და საბანკო ოპერაციების შემდეგ, სადავო სახლის მფლობელი საბოლოოდ კერძო იპოთეკარი, საფრანგეთში მცხოვრები ქართველი, ლორანს კრისტიან ჩხაიძე აღმოჩნდა. ეს უკანასკნელი მისგან სახლის სანაცვლოდ 60 000 დოლარს ითხოვს, რაც ოჯახს არ აქვს.
„თავდაპირველად ჩემი და მოატყუა ერთ-ერთი ბანკის ერთ-ერთმა საკრედიტო ოფიცერმა – დას სასწრაფო სესხი სჭირდებოდა. ამ ოფიცერმა გამოატანინა მას ბანკიდან თანხა, 5000 მას მისცა, 2000 კი თავად დაიტოვა, მერე კი ქვეყნიდან წავიდა. ბოლოს აღმოჩნდა, რომ 10-12 ადამიანს გაუკეთა ასე. ბანკის ეს ვალი ბოლოს ისე გაიზარდა, რომ 25 000 დოლარის მარტო პროცენტი გვაქვს გადახდილი.
ბანკის ვალის დასაფარად სახლი უძრავი ქონების სააგენტოში იპოთეკით დავტვირთეთ და 50 000 გამოვიტანეთ. სააგენტომ კი, ეს ვალიც რომ ვერ დავფარეთ, თავის მხრივ სახლი აუქციონის წესით გადაუფორმა ლორანს კრისტიან ჩხაიძეს, რომელიც სახლიდან გამოსახლებით მემუქრება, ან 60 000 დოლარი უნდა გადავუხადო, ესაა სასამართლოს გადაწყვეტილება,“ – ამბობს მალხაზ ბაკურიძე.
მალხაზი ყოფილი პატიმარია. ორჯერ ნასამართლევი. საპატიმროში 4 წელი გაატარა ნარკოტიკების მოხმარების ბრალდებით. ამჯერად პირობითი სასჯელი აქვს და, შესაბამისად, არ აქვს ქვეყნის დატოვებისა თუ ავტომობილის მართვის უფლება.
პატიმრობამდ მალხაზ ბაკურიძის შემოსავლის ძირითადი წყარო ტაქსის მძღოლობა იყო, ახლა კი ეს საყრდენიც გამოეცალა. სახლის ეზოში ლიმნის ბაღი აქვს, იმედოვნებს, რომ 150-200 კილოგრამს მაინც დაკრეფს და ასე თავს ცოტა ხნით მაინც გაიტანენ. არავინ იცის რა იქნება 5 თვის შემდეგ, აპრილის თვეში. მალხაზ ბაკურიძემ მეუღლესთან და ორ მცირეწლოვან შვილთან ერთად ამ დროს უნდა დატოვოს მამისეული სახლი, როგორც მას აღსრულების ეროვნულმა ბიურომ აცნობა.
ყოფილი პატიმარი იურიდიულ დახმარებასა და კონსულტაციებს „დემოკრატიის ინსტიტუტისგან“ მიიღებს. ყოფილი პატიმრების გაძლიერების პროექტი სხვა სერვისებთან ერთად ამ ტიპის დახმარებასაც სთავაზობს, როგორც ყოფილ პატიმრებს, ასევე პრობაციონერებსა და მათ ოჯახის წევრებს.
„ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა” უზრუნველყოფს:
- ყოფილ პატიმართა ჯანმრთელობის მდგომარეობის გაუმჯობესების ხელშეწყობას
• იურიდიულ დახმარებას - ბენეფიციართა გადამისამართებას შესაბამისი პროფილის სამედიცინო დაწესებულებაში
• ბენეფიციართა დახმარებას (ადვოკატირებას), რომ ისარგებლონ კუთვნილი სამედიცინო შეღავათებით და შესაბამისი სახელმწიფო პროგრამებით - ყოფილი პატიმრების, პრობაციონერებისა და მათი ოჯახის წევრების მცირე სამეწარმეო ინიციატივების წახალისებას.
- სამიზნე ჯგუფების დასაქმების ხელშეწყობას
ზემოთ ჩამოთვლილი სერვისებით სარგებლობა შეუძლიათ ყოფილ პატიმრებს, პატიმართა ოჯახის წევრებს და პრობაციონერებს. ამისთვის მათ უნდა მიმართონ:
აჭარაში – დემოკრატიის ინსტიტუტს – ქ.ბათუმი ჭავჭავაძის ქ. №107, ტელ: (0422) 27 57 44
იმერეთში – აფხაზინტერკონტს / ქ.ქუთაისი ნინოშვილის ქ. №27, ტელ: (0431) 26 48 61
გურიაში – გურიის ახალგაზრდულ რესურსცენტრს /ოზურგეთი რუსთაველის ქ. №4, ტელ: (0496) 27 41 26
თანაზიარი – რუსთაველის ქ. №88 /ტელ: (0415) 22 10 78
მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“ ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.
