მთავარი,სიახლეები

40 ათასი ლარი საბაგიროს დემონტაჟისთვის მწვანე კონცხზე

06.11.2018 • 2384
40 ათასი ლარი საბაგიროს დემონტაჟისთვის მწვანე კონცხზე

ბათუმის ბოტანიკურმა ბაღმა მწვანე კონცხზე მდებარე საბაგირო გზის დემონტაჟისთვის  ტენდერი ხელახლა გამოაცხადა. დემონტაჟისთვის 40 ათასი ლარია გათვალისწინებული. ახალი საბაგირო გზის აშენებას აქ ბიძინა ივანიშვილის კომპანია „ბიზნეს დეველოპმენტი“ გეგმავს, რომელიც ყოფილი აგრარული უნივერსიტეტის ადგილზე კომპლექს „მაგნოლიას“ აშენებს, რომლის პროექტის ინიციატორი და ინვესტორიც ასევე ბიძინა ივანიშვილია. კომპანია 49 წლით მწვანე კონცხის პლაჟსაც ითხოვდა.

ძველი საბაგირო გზის დემონტაჟისთვის ხელახალი ტენდერის გამოცხადება მას შემდეგ გახდა საჭირო, რაც პირველად გამოცხადებული ტენდერი არ შედგა, დემონტაჟზე გაცემულ ნებართვას კი ვადა გაუვიდა.

საქართველოს ეკონომიკისა და მდგრადი განვითარების სამინისტროს ტექნიკური და სამშენებლო ზედამხედველობის სააგენტოს მიერ ხელახლა გაცემულ დემონტაჟის ნებართვას ამჯერად ვადა 2018 წლის 31 დეკემბრის ჩათვლით აქვს. სატენდერო პირობებით კი, საბაგირო გზის დემონტაჟი გამარჯვებულთან ხელშეკრულების გაფორმებიდან 2018 წლის 20 დეკემბრამდე უნდა დასრულდეს. ტენდერში წინადადებების მიღება 14 ნოემბერს შეწყდება.

დემონტაჟის შედეგად მიღებული ლითონის [ჯართის] წონა 8816 კილოგრამი იქნება. საიდანაც ზღვით [ბარჟით] გასატანია 5216 კგ, ხოლო სახმელეთო გზით – 3140 კგ ლითონი. რაც შეეხება ბეტონს, ზღვით გასატანი იქნება 36,9 ტონა, ხოლო ხმელეთით – 73,5 ტონა. უშუალოდ ბაგირის სავარაუდო წონა არის 3200კგ. ბაგირზე დაკიდული სკამების სავარაუდო რაოდენობა კი – 45 ცალი.

ბათუმის მერიაში აცხადებენ, რომ ახალი საბაგირო გზის მშენებლობის ნებართვასაც საქართველოს ეკონომიკისა და მდგრადი განვითარების სამინისტრო გასცემს. სამინისტროში „ბათუმელებს“ უთხრეს, რომ მათთვის მწვანე კონცხზე საბაგირო გზის მშენებლობის ნებართვისთვის ამ დრომდე არავის მიუმართავს.

საბაგირო მწვანე კონცხზე / ფოტო „ბათუმელები“

 

გადაბეჭდვის წესი


ასევე: