მეზღვაური აბდულ მომენ იქბალ აჰსანი ირწმუნება, რომ ბათუმის საერთაშორისო აეროპორტში უსაფრთხოების თანამშრომლებმა გაქურდეს და მისი კუთვნილი 6 200 ამერიკული დოლარი მიითვისეს.
აბდულ მომენ იქბალ აჰსანი სინგაპურულ კომპანია MTM Ship Management Pte-ს კუთვნილ სატვირთო გემ STRATEGIC VISION-ზე, უფროს მექანიკოსად მუშაობდა. აჰსანს კომპანიასთან კონტრაქტი დაუმთავრდა. მას შემდეგ, რაც 28 ოქტომბერს, STRATEGIC VISION ბათუმის პორტში შემოვიდა, მან გემი დატოვა და ბათუმიდან დაკას, ბანგლადეშის დედაქალაქის მიმართულებით გაფრინდა. როგორც მეზღვაური ამბობს, ის აეროპორტში გაქურდეს.
“გემის დატოვების შემდეგ ვიყიდე ბილეთი და გავფრინდი დაკას მიმართულებით. ფრენა მქონდა ბათუმის საერთაშორისო აეროპორტიდან, 28 ოქტომბერს, 17:45 საათზე, რეისით TK-393. ჩექინის დროს, დაახლოებით დღის 4 საათზე, ორმა ოფიცერმა გამიყვანა ცალკე ოთახში, ჩხრეკისათვის. ოფიცრებმა არ მომცეს ნებართვა, ოთახში შემეტანა ჩემი ხელბარგი – პატარა, ტყავის შავი ჩანთა, ჩანთა დარჩა ოფიცრების მეთვალყურეობის ქვეშ. უსაფრთხოების ოფიცრებმა ჩემი ჩხრეკა არასაჭიროდ დიდხანს გააგრძელეს. მე ვერ შევძელი მაშინვე აღმომეჩინა, რომ ჩემი ჩანთიდან, რომელიც უსაფრთხოების ოფიცრების მეთვალყურეობის ქვეშ იყო, გაქრა 6 200 დოლარი.
ბანგლადეშიდან ვცადე დაკავშირება ბათუმის პოლიციასთან და შევატყობინე აეროპორტის უსაფრთხოებასაც. პოლიციამ არ მიპასუხა. სხვა ოფიციალური უწყებებიდანაც არავინ დამხმარებია.
თუ უსაფრთხოების სამსახური დეტალურად შეისწავლის ვიდეო კამერებს 15:30 დან 16 საათამდე, ისინი აუცილებლად იპოვიან იმ ადამიანებს, ვინც იყო ამ კრიმინალურ აქტში ჩართული. ეს არ არის პირველი შემთხვევა, რომელიც მოხდა ბათუმის აეროპორტში. ეს რეგულარული სცენარია და არანაირი რეაქცია არ მოჰყოლია აქამდე აეროპორტის ხელმძღვანელობის მხრიდან,“ – წერს მეზღვაური აბდულ ასანი წერილში, რომელიც მან civil.ge-ს გაუგზავნა.
საზღვაო საიტ Marinetraffic-ის მონაცემებით, გემი STRATEGIC VISION ბათუმის პორტში ნამდვილად შემოვიდა 2018 წლის 28 ოქტომბერს, 10:30 საათზე.
გემს ქართული კომპანია საზღვაო სააგენტო “სოფმარი” ემსახურებოდა. “სოფმარის” აგენტი-ექსპედიტორი ლევან ქათამაძე “ბათუმელებთან” დეტალურად იხსენებს 28 ოქტომბერს, თუ როგორ გააცილა ბანგლადეშელი მეზღვაური ბათუმის აეროპორტში.
“ამ პიროვნებას [აბდულ მომენ იქბალ აჰსანს] კონტრაქტი დაუმთავრდა ბათუმის პორტში, გემი იყო შემოსული და შეიცვალა ეკიპაჟი. ეს ასე ხდება მსოფლიოს ნებისმიერ პორტში. თავისი ბარგი ყველაფერი თან ჰქონდა, არ მოუშორებია ხელიდან. ჩვენმა სააგენტომ უზრუნველყო მისი ტრანსპორტირება ბათუმის აეროპორტამდე. აეროპორტში რომ მივედით, რაც ჩასაბარებელი იყო ბარგი ჩააბარა, დაიტოვა ხელბარგი მხოლოდ. შემდეგ ჩაუტარებიათ დამატებითი შემოწმება, ჩხრეკის სახით. როგორც ის ამბობს, კონტროლი რომ გავიარე და დავჯექი თვითმფრინავში, ამის შემდეგ ჩემი თანხა იკარგებაო,“ – გვითხრა ლევან ქათამაძემ.
მისივე თქმით, “სოფმარის” კომპეტენცია არ არის, ჰქონდეს ინფორმაცია, თუ რა თანხა აქვს მეზღვაურს გემიდან ჩამოსვლისას. მათი მოვალეობა მეზღვაურების აეროპორტამდე ტრანსფერია. ლევან ქათამაძე ამბობს, რომ მსგავსი ინცინდენტი მის კომპანიას აქამდე არ ჰქონია.
ბათუმის საერთაშორისო აეროპორტს ოპერირებას “ტავ ჯორჯია” უწევს, უსაფრთხოებაზე კი შსს-ს საპატრულო სამსახური ზრუნავს. “ბათუმელები” დაუკავშირდა შსს-ს სამინისტროს.
“სამინისტროში შემოსულია აღნიშნული პიროვნების წერილი, მიმდინარეობს მისი შესწავლა, რასაც მოყვება შესაბამისი სამართლებრივი რეაგირება და ოფიციალურად ეცნობება წერილის ავტორს,” – გვითხრეს საქართველოს შინაგან საქმეთა სამინისტროში.
