ფინანსთა და ეკონომიკის სამინისტროს განცხადება ქედაში მომხდარ ტრაგედიაზე

აჭარის ფინანსთა და ეკონომიკის სამინისტრო ქედაში მომხდარ ტრაგედიაზე განცხადებას ავრცელებს:

„წინასწარი ინფორმაციით, ქედის რაიონის სოფელ დოლოგანში (სოფ.ჭინკაძეები), ქვის მოპოვების სამუშაოებს შპს “სტრუიკ გრუპ ჯორჯია” ახორციელებდა. სამუშაოების წარმოების პროცესში განხორციელდა აფეთქებითი მეთოდის გამოყენება, რა დროსაც მოხდა ტრაგიკული შემთხვევა. სამუშაოების განმახორციელებელი პირი ვალდებული იყო სამუშაოები ეწარმოებინა შესაბამისი ბურღვა-აფეთქებითი ნებართვის საფუძველზე. კერძო კომპანიის მიერ ქვა-ღორღის მოპოვების სამუშაოების დროს მომხდარი აფეთქების შედეგად 2012 წელს დაბადებულ გ.ო.-ს ქვა მოხვდა, რომელიც მიყენებული დაზიანების გამო ადგილზე გარდაიცვალა,“ – ნათქვამია განცხადებაში. 

სამინისტროში აცხადებენ, რომ მათ მიერ აღნიშნულ კომპანიაზე ბურღვა-აფეთქებითი სამუშაოების ნებართვა არ იყო გაცემული.

ქედაში, სოფელ დოლოგანში, ქვის კარიერზე მომხდარი აფეთქების შედეგად 6 წლის ბიჭი დღეს, 31 ოქტომბერს, დაიღუპა. თვითმხილველთა თქმით, ბავშვი ბიძის ეზოში თამაშობდა, როცა კარიერზე აფეთქება მოხდა, კარიერიდან ასხლეტილი ქვა ბავშვს მოხვდა, რის შედეგადაც ბიჭი ადგილზე გარდაიცვალა. აფეთქების ადგილი ეზოდან დაახლოებით სამასი მეტრითაა დაშორებული.

მომხდარ ფაქტს შინაგან საქმეთა სამინისტრო იძიებს.  გამოძიება სსკ-ის 240-ე მუხლის მე-2 ნაწილით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც ადამიანის სიცოცხლის მოსპობა ან სხვა მძიმე შედეგი გამოიწვია.

 

 

ნეტგაზეთის მასალების სხვა გამოცემებში გადაბეჭდვის წესი

ავტორი