6 წლის ბიჭი ეზოში თამაშობდა, როცა კარიერზე მომხდარი აფეთქების შედეგად დაიღუპა

ქედაში, სოფელ დოლოგანში, ქვის კარიერზე მომხდარი აფეთქების შედეგად 6 წლის ბიჭი დაიღუპა. როგორც “ბათუმელებს” ქედის მერის მოადგილემ უთხრა, ბავშვი ბიძის ეზოში თამაშობდა, როცა კარიერზე აფეთქება მოხდა, კარიერიდან ასხლეტილი ქვა ბავშვს მოხვდა, რის შედეგადაც ბიჭი ადგილზე გარდაიცვალა. აფეთქების ადგილი ეზოდან დაახლოებით სამასი მეტრითაა დაშორებული.

შემთხვევა ჭინკაძეების უბანში მოხდა.

შინაგან საქმეთა სამინისტროს ინფორმაციით, ბავშვს ქვა მოხვდა და  მიყენებული დაზიანებების შედეგად ადგილზე გარდაიცვალა.

შსს-ს ცნობით, დანიშნულია ექსპერტიზა, ხოლო კომპანიის ხელმძღვანელები დაბარებული არიან დაკითხვაზე.

შს სამინისტროს ინფორმაციით, გამოძიება 240-ე მუხლის მეორე ნაწილით მიმდინარეობს: სამთო-სამშენებლო ან სხვა სამუშაოს წარმოებისას უსაფრთხოების წესის დარღვევა, რამაც ადამიანის სიცოცხლის მოსპობა გამოიწვია – ისჯება შინაპატიმრობით 6 თვიდან ორ წლამდე ან თავისუფლების აღკვეთით ორიდან ხუთ წლამდე.

ნეტგაზეთის მასალების სხვა გამოცემებში გადაბეჭდვის წესი

ავტორი