მთავარი,სიახლეები

თორნიკე რიჟვაძე არჩევნების შედეგებზე: რიგ საკითხებზე ჩვენ დაგვაგვიანდა რეაგირება

31.10.2018 • 2323
თორნიკე რიჟვაძე არჩევნების შედეგებზე: რიგ საკითხებზე ჩვენ დაგვაგვიანდა რეაგირება

საპრეზიდენტო არჩევნების შედეგებზე კომენტარი აჭარის მთავრობის თავმჯდომარემ, თორნიკე რიჟვაძემ დღეს, მთავრობის სხდომის შემდეგ გააკეთა. თორნიკე რიჟვაძე მიიჩნევს, რომ პირველივე ტურში მმართველმა პოლიტიკურმა ძალამ არა იმის გამო ვერ გაიმარჯვა, რომ მთავრობა ცუდად მუშაობას, არამედ იმიტომ, რომ კომუნიკაციის პრობლემა არსებობდა და ამომრჩევლამდე ინფორმაცია ვერ მივიდა. თორნიკე რიჟვაძემ აქცენტი ამომრჩევლის მობილიზების აუცილებლობაზე გააკეთა და რამდენჯერმე გაიმეორა, რომ „ნაციონალური მოძრაობა“ ქვეყნისთვის საფრთხეა.

„პირველ ტურში ხელისუფლების მიერ მხარდაჭერილმა კანდიდატმა ვერ შეძლო მოეპოვებინა 50 პროცენტზე უფრო მეტი. თუმცა დარწმუნებული ვარ, მეორე ტურში ქართველ ხალხთან ერთად ვიზეიმებთ გამარჯვებას, რომელიც ასახავს იმ არჩევანს, რომელიც უნდა გაკეთდეს, ერთი მხრივ, თავისუფალ და ევროპულ განვითარებას შორის და მეორე მხრივ, ძალადობრივ და ავტოკრატიულ რეჟიმს შორის. დარწმუნებული ვარ, ქართველი ხალხი არჩევანს გააკეთებს ჩვენი ქვეყნის უკეთესი განვითარებისთვის,“ – განაცხადა თორნიკე რიჟვაძემ.

აჭარის მთავრობის თავმჯდომარეს „ბათუმელებმა“ ჰკითხა, მისი აზრით, კონკრეტულად რა გახდა მოსახლეობის უკმაყოფილების საგანი, სად ვერ იმუშავა სათანადოდ აჭარის მთავრობამ? – თორნიკე რიჟვაძემ გვითხრა: „არის რიგი საკითხები, რომლებზეც, სამწუხაროდ, დაგვაგვიანდა რეაგირება“.

კითხვის დაზუსტების შემდეგ, მან თქვა, რომ პრობლემაა სოციალური ფონი, თუმცა არ დაუზუსტებია, ხელისუფლების რა კონკრეტული ნაბიჯები არ მოეწონა ხალხს. თორნიკე რიჟვაძემ ვრცლად ისაუბრა იმაზე, რომ მოსახლეობასთან კომუნიკაციისა და ამომრჩევლის მობილიზების პრობლემა არსებობდა და მეორე ტურამდე ეს შეიცვლება.

„პირველ ტურში ვერ შევძელით მხარდამჭერების მობილიზება, რომლებიც „ქართულ ოცნებას“ ჰყავს და მეორე ტურისთვის ჩვენ შევძლებთ მაქსიმალურ მობილიზაციის, მაქსიმალური კომუნიკაციის ხარჯზე იმ შედეგის მიღწევას, რომელიც არა მარტო „ქართული ოცნებისთვის“ არის მნიშვნელოვანი, არამედ ჩვენი ქვეყნის განვითარებისთვის… საერთო შედეგებს თუ შეხედავთ, ბათუმში იგრძნობა, რომ ჩვენ ვერ შევძელით იმ მხარდაჭერის მოპოვება, რომელსაც ველოდებოდით. ეს, ალბათ, არის იმის ბრალი, რომ იმ აქტივის, იმ მხარდაჭერის მობილიზება პირველ ტურში ვერ მოვახერხეთ… ეს ნაწილობრივ მიანიშნებს, რომ არის გარკვეული სახის ჩავარდნები, მაგრამ ამავდროულად არის მუნიციპალიტეტები, სადაც მართლა დამაჯერებლად ვლიდერობთ და მეორე ტურისთვის ის კონკრეტული ხარვეზები იქნება აღმოფხვრილი,“ – აღნიშნა თორნიკე რიჟვაძემ.

რა სახის მობილიზების პროცესს გეგმავს „ქართული ოცნება“ და ხომ არ მოსთხოვენ ისევ მხარდამჭერების სიებს სკოლებისა და საბავშვო ბაღების პედაგოგებს? – თორნიკე რიჟვაძეს „აჭარის ტელევიზიის“ ჟურნალისტმა შეახსენა, რომ ამ კუთხით ვიდეომტკიცებულებები დაიდო ბათუმში არჩევნებამდე რამდენიმე დღით ადრე.

„ამაზე არ გავაკეთებ კომენტარს. ასეთი სიების მომზადებას კატეგორიულად გამოვრიცხავ,“ – მოკლედ უპასუხა შეკითხვას აჭარის მთავრობის თავმჯდომარემ.

„ფიქრობთ, რომ პრობლემა ხელისუფლების საქმიანობა კი არ არის, არამედ ამომრჩევლის მობილიზება და კომუნიკაცია?“ – „ბათუმელების“ მორიგ კითხვაზე თორნიკე რიჟვაძემ თქვა, რომ „ქართული ოცნების“ შეცდომები ნაკლებად აწუხებს მოსახლეობას.“

„მიამიტობა იქნება, ვთქვა, რომ მთავრობას, რომელიც 6 წელია ხელისუფლებაშია, შეცდომა არ დაუშვია, თუმცა არჩევანზე როცა მიდგება საქმე, ჩვენი შეცდომები იმ სხვა არჩევანთან მიმართებაში, რომელიც ჩვენს მოქალაქეებს შესთავაზეს, ეს ჩვენი შეცდომები ნაკლებად არის, ნაკლებად აწუხებს მოსახლეობას,“ – გვიპასუხა მან.

 

გადაბეჭდვის წესი


ასევე: