სასტუმრო „ინტურისტ პალასმა“ სამსახურიდან დაახლოებით 50 თანამშრომელი გაუშვა. თამარ მრევლიშვილი, სასტუმროს ადამიანური რესურსების მართვის სამსახურის უკვე ყოფილი უფროსი ამბობს, რომ „აბსურდული სიტუაცია“ პირველი ოქტომბრიდან შეიქმნა, როცა სასტუმრო მართვის უფლებით ახალმა კომპანიამ აიღო და ე.წ. რეორგანიზაცია გამოაცხადა. გათავისუფლების ბრძანებები ამ დრომდე ყოფილ თანამშრომლებს არ ჩაჰბარებიათ, მათთვის არც კომპენსაცია მიუციათ. რამდენიმე მათგანი დავას სასამართლოში აპირებს.
„ინტურისტი“ კომპანია „მეტროს“ ეკუთვნის, მაგრამ ყოველწლიურად სამართავად სხვადასხვა კომპანია შემოდის. მეხუთე წელია თანამშრომლებს გამოსაცდელი ვადით გვიფორმებენ ხელშეკრულებებს… ახლაც, ოქტომბერში გვითხრეს, რომ ახალი კომპანია შემოვიდა და დაგაკვირდებითო. მერე დაგვიბარეს თითოეული ცალ-ცალკე და გვითხრეს, რომ, სამწუხაროდ, ვეღარ გააგრძელებდნენ ჩვენთან თანამშრომლობას.
ჩემთან ვადიანი ხელშეკრულება ჰქონდათ გაფორმებული. ჩვენ მოგვთხოვეს დაგვეწერა განცხადება თანამდებობიდან წასვლის შესახებ. ასე იყო წინა წლებშიც, ვწერდით გათავისუფლებაზე განცხადებას და იმავე დღეს ვწერდით განცხადებას დასაქმებაზე. ამ შემთხვევაში გვითხრეს, რომ ვეღარ აგვიყვანდნენ ვერც გამოსაცდელი ვადით. სასტუმროში დაახლოებით 150 ადამიანი მუშაობდა, აქედან 50 გაუშვეს. მნიშვნელოვანია ისიც, რომ ახლები აიყვანეს. რეალურად თუ შემცირებაა, რაც გათავისუფლების მიზეზად დაგვისახელეს, ახალი არ უნდა აეყვანათ,“ – გვიყვება თამარ მრევლიშვილი.
თამარ მრევლიშვილი სასამართლო დავას არ აპირებს, რადგან საქმის მოგების პერსპექტივას ვერ ხედავს. „ძალიან ჩახლართული სიტუაციაა. თანაც მესაკუთრე უცხო ქვეყნის მოქალაქეა. რთული იქნება რაიმეს გარკვევა,“ – დასძენს იგი.
გათავისუფლებული თანამშრომლებიდან რამდენიმემ კონსულტაცია ადვოკატ ნატო გოგმაჩაძესთან გაიარა. გათავისუფლებულებს ჯერ არ აქვთ გადაწყვეტილი, მიმართავენ თუ არა სასამართლოს.
ნატო გოგმაჩაძე, ადვოკატი:„ამ პროცესს დამსაქმებელმა ,,რეორგანიზაცია“ უწოდა, თუმცა, ჩემი შეფასებით, რეორგანიზაცია ამ სახით არ ტარდება. მას აქვს სამართლებრივი ფორმა და საფუძველი. გათავისუფლებული თანამშრომლების ნაცვლად, სხვა კადრები აჰყავთ. გათავისუფლებულებს, როგორც ვიცი, შეუწყვიტეს ვადიანი ხელშეკრულებები ისე, რომ არც შეწყვეტის საფუძველი უცნობებიათ, არც შესაბამისი გათავისუფლების ბრძანება ჩაუბარებიათ მათთვის და არც კომპენსაცია გაუციათ, რასაც ითვალისწინებს კანონმდებლობა. ეს არის სწორედ ,,იმ მონური შრომის“ მოდელი, რაც დღეს დამკვიდრებულია ქართულ რეალობაში. დღეს გვყავს უუფლებო დასაქმებულები და დამსაქმებლები, რომელთაც მიაჩნიათ, რომ ყველაფრის უფლება აქვთ“.
კომპანია „მეტროში“ ამ ეტაპზე კომენტარს არ აკეთებენ.
