რესტორან „ხალაგრანდში“ 140-კაციანი სამთავრობო სუფრა 6300 ლარი დაჯდა. ამ ეტაპზე უცნობია, ვინ გადაიხადა ვახშმის თანხა, რომელსაც საქართველოს პარალმენტის წევრები – ფატი ხალვაში, მუხრან ვახტანგაძე, კობა ნაკაიძე და აჭარის მთავრობის თავმჯდომარე თორნიკე რიჟვაძე ესწრებოდნენ.
„ბათუმელებისთვის“ მოწოდებული ინფორმაციით, 22 ოქტომბერს რესტორანში გამართულ სუფრაზე „ქართული ოცნების“ პარტიული აქტივი იყო შეკრებილი, ვახშმის თანხა კი ბიუჯეტიდან გადაიხადეს. „ბათუმელების“ ზარებს არ უპასუხა ქობულეთის საკრებულოს თავმჯდომარემ, ქობულეთის მერმა კი გვითხრა, რომ შეხვედრაზეა და „როგორც კი გათავისუფლდება, დაგვირეკავს“.
საქართველოს პარლამენტის წევრმა, კობა ნაკაიძემ „ბათუმელებს“ უთხრა, რომ „ხალაგრანდში“ სუფრა რჩეული ქობულეთელებისთვის გაიმართა.
„ეს იყო ცნობილი ქობულეთელების შეხვედრა. არავითარი პარტიული, არავითარი პოლიტიკური შეხვედრა არ ყოფილა. ეს ყოველწლიურად ტარდება ხოლმე შემოდგომაზე. გადაამოწმეთ, შარშანაც იყო, შარშანწინაც იყო. მომავალ წელს არჩევნები არაა და მომავალ წელსაც იქნება. იქ პარტიული მუშაკები არ იყვნენ. პენსიონერები იყვნენ, ახალგაზრდებიც იყვნენ, შუა თაობაც იყო.
ბატონო კობა, რა ნიშნით შეარჩია მასპინძელმა ის ადამიანები, ვინც სუფრაზე მოხვდნენ?
„რჩეული ქობულეთელები“ არის ესეთი დაჯილდოება, რომელსაც რამდენიმე წელია „აჭარა პს“-ის ჯემალ მეგრელიძე ხელმძღვანელობს. ირჩევა ყოველ წელს ათი რჩეული ქობულეთელი. შემდეგ არიან დამსახურებული მოღვაწეები, შრომის ვეტერანები, აღიარებული სპორტსმენები. ვინც არის, ასე ვთქვათ, რჩეული ქობულეთელები, სამ-სამი თაობის.
აჭარის მთავრობის თავმჯდომარეც იყო ამ სუფრაზე, როგორც ვიცი…
თორნიკე რიჟვაძეს იმ დღეს ჰქონდა ჩაქვის მოსალხეობასთან შეხვედრა. ჯერ იყო ოჩხამურში შეხვედრა, შემდეგ იყო ჩაქვში და, უბრალოდ, მერმა სთხოვა, თუ დრო გექნებათ, დაგპატიჟებთო და ცოტა ხნით ამოვიდა. დიდხანს არ გაჩერებულა, წავიდა.
სუფრა რა დაჯდა?
მაგას ვერ გეტყვით, ლოჯისტიკის საკითხებში მე ჩართული არ ვიყავი.
ვინ გადაიხადა თანხა?
ვერ გეტყვით. მე სამი წელია მპატიჟებენ და თანხა არ ვიცი, დაგიზუსტებთ. მე არ გადამიხდია ვიცი და ვინ იხდის ამ სუფრებს, არ ვიცი. ალბათ არიან ბიზნესმენები, როგორ ხდება მაგის გადახდა, არ ვიცი. საერთოდ, ქობულეთის მერმა დაგვპატიჟა ყველა, ალბათ მერს ეცოდინება. მე მერმა [მირიან ქათამაძე] დამპატიჟა.
კიდევ ვინ იყო თქვენ გარდა სუფრაზე?
ფატი ხალვაში იყო, მუხრან ვახტანგაძე და პარლამენტარებიდან ჩვენ ვიყავით. დანარჩენი ახლა, ცნობილი სახეები – სულიკო ინაიშვილი, ოთარ მჟავანაძე ძველი თაობიდან. ნუგზარ გოგიტიძე. იმ ათი რჩეული ქობულეთელიდან ყველა იყო.
მთავარი ფოტო: newsweekadjara.com
