მთავარი,სიახლეები

სად და რა ფასად შეგიძლიათ გაიკეთოთ გრიპის ვაქცინა ბათუმში

31.10.2018 • 7813
სად და რა ფასად შეგიძლიათ გაიკეთოთ გრიპის ვაქცინა ბათუმში

„გრიპის ვირუსის საწინააღმდეგო ვაქცინაცია გრიპის პროფილაქტიკისთვის ერთადერთი საშუალებაა!“ – ვკითხულობთ დაავადებათა კონტროლისა და საზოგადოებრივი ჯანმრთელობის ვებგვერდზე. სეზონური გრიპისგან თავის დასაცავად ვაქცინაციისკენ საქართველოს მოსახლეობას საქართველოს ჯანდაცვის მინისტრმა, დავით სერგეენკომაც მოუწოდა 23 ოქტომბერს და აღნიშნა, რომ ოქტომბრის ბოლო კვირა და შემდეგი დღეები არის საუკეთესო პერიოდი სეზონური გრიპის აცრის გასაკეთებლად.

გრიპის ვაქცინა უფასოდ არის ხელმისაწვდომი გარკვეული რისკჯგუფის პირთათვის [დიაბეტით დაავადებული 18-წლამდე პირები; დიალიზზე მყოფი პირები და მათი მომვლელები; სამედიცინო დაწესებულებების თანამშრომლები; აივ/შიდსით ინფიცირებულები; ბავშვთა სახლებისა და მოხუცთა თავშესაფრების ბენეფიციარები და პერსონალი და ა.შ.]. როგორც აჭარის საზოგადოებრივი ჯანდაცვის ცენტრში განმარტავენ, თუ ბათუმში ცხოვრობთ, რისკჯგუფში არ ხართ და სეზონური გრიპისგან თავის დაცვა გსურთ, ვაქცინა თავად უნდა შეიძინოთ აფთიაქში და პოლიკლინიკას ან საოჯახო მედიცინის ცენტრს ეწვიოთ, სადაც ვაქცინას გაგიკეთებენ.

„მოქალაქემ, რომელსაც სურს გრიპზე აცრა, ვაქცინა უნდა შეიძინოს აფთიაქში და მიმართოს პოლიკლინიკას, რომელსაც აქვს ცივი ჯაჭვის პრინციპით აღჭურვილი აცრის კაბინეტი. იქ გაუკეთებენ მას აცრა-ვიზიტს, ჯერ გაესინჯება ექიმს, რომ მან მისცეს დაშვება აცრის გაკეთებაზე, უთხრას, შეიძლება თუ არა ამ მომენტში მისთვის აცრის გაკეთება [შეიძლება ადამიანს ჰქონდეს სურდო, გაციებული იყოს, ასეთ დროს არ კეთდება ვაქცინა]. ექიმის დადასტურების შემდეგ მას გაუკეთებენ მის მიერ მიტანილ ვაქცინას აცრის კაბინეტში. ეს არის ერთადერთი ვაქცინა, რომელიც თავისუფლად იყიდება აფთიაქებში. აცრა კეთდება მკლავზე, შესაძლებელია მსუბუქი სიწითლე და ოდნავ შესიება მოჰყვეს, მაგრამ ეს პათოლოგიად არ ითვლება,“ – განაცხადა „ბათუმელებთან“ რუსუდან შავიშვილმა, აჭარის საზოგადოებრივი ჯანდაცვის ცენტრის დირექტორმა.

გრიპის ვაქცინის გაკეთება ბავშვებისათვის 6 თვის ასაკიდან შეიძლება. ვაქცინის გაკეთება რეკომენდებულია, ასევე, ხანდაზმულებისთვის. გრიპის ვაქცინა რომ უსაფრთხოა, რუსუდან შავიშვილის თქმით, ამას ისიც მოწმობს, რომ ვაქცინა საჭიროა გაიკეთონ ორსულებმა და იგი უსაფრთხოა ორსულისა და ნაყოფისთვის.

რუსუდან შავიშვილი აღნიშნავს, რომ ბაზარზე ძირითადად ორი, ფრანგული და ჰოლანდიური წარმოების ვაქცინა გვხვდება და ორივეს აქვს არამხოლოდ მწარმოებლისგან მინიჭებული სერტიფიკატი, არამედ ჯანმოს [მსოფლიო ჯანდაცვის ორგანიზაცია] სერტიფიკატიც. ვაქცინა 2018 წელს უნდა იყოს გამოშვებული.

„ბათუმელებმა“ გადაამოწმა, რომელ აფთიაქშია შესაძლებელი გრიპის ვაქცინის შეძენა ბათუმში. „ჯიპისისა“ და „ფარმადეპოს“ ქსელში დაგვიდასტურეს, რომ ვაქცინა მათთან იყიდება და 31 ოქტომბრის მონაცემებით ფრანგული „ვაქსიგრიპის“ [4-ვალენტიანი ვაქცინა] ფასი ბათუმში 35 ლარია [იმ შემთხვევაში, თუ მოცემულ მომენტში ვაქცინა აფთიაქში არ იყიდება, შესაძლებელია გამოწერა თბილისიდან]. ასევე, „ავერსის“ ქსელში შესაძლებელია ჰოლანდიური „ინფლუვაკის“ [3-ვალენტიანი ვაქცინა] გამოწერა, მისი ფასი დაახლოებით 20 ლარია და ვაქცინას შეკვეთიდან რამდენიმე დღეში ჩამოიტანენ ბათუმში თბილისიდან, ხოლო „პსპ“-ეს ქსელის პრესსამსახურში გვითხრეს, რომ მათ ვაქცინა არ შემოაქვთ. ვაქცინა არ იყიდება არც „სახალხო აფთიაქში“.

სააფთიაქო ქსელებში განმარტავენ, რომ ვაქცინის შენახვასა და ტრანსპორტირებას განსაკუთრებული პირობები სჭირდება, ამიტომაც ამჯობინებენ მოთხოვნის მიხედვით ჩამოიტანონ ბათუმში.  თბილისსა და საქართველოს რამდენიმე რეგიონში ვაქცინას სააფთიაქო ქსელის ექსპრესკლინიკაშივე აკეთებენ და აცრა ვაქცინის ღირებულებაში შედის, თუმცა ასეთი ექსპრესკლინიკა ბათუმში არ არის.

მნიშვნელოვანია, ვაქცინა შეძენიდან იმავე დღეს, მოკლე ხანში გაკეთდეს. 

რაც შეეხება უკვე შეძენილი ვაქცინის გაკეთებას, როგორც ბათუმის საოჯახო მედიცინის ცენტრებსა და პოლიკლინიკებში ამბობენ, თუ აცრის გაკეთების მსურველი საყოველთაო ჯანდაცვის პროგრამის ფარგლებში მიმართავს საცხოვრებელი ადგილის მიხედვით იმ სამედიცინო დაწესებულებას, სადაც რეგისტრირებულია, ამ შემთხვევაში ექიმის კონსულტაცია და აცრა უფასოა, სხვა შემთხვევაში კი ექიმის კონსულტაციის თანხის გადახდა მოუწევს.

ექიმთან კონსულტაციის ფასს პოლიკლინიკები თავად ადგენენ, ამიტომაც ფასები განსხვავებულია, მაგალითად, ბათუმის  #1 პოლიკლინიკაში 40 ლარია, ბათუმის #4 პოლიკლინიკაში – 30 ლარი, თამარის დასახლებაში მდებარე საოჯახო მედიცინის ცენტრში კი – 20 ლარი.

სახელმწიფო პროგრამის ფარგლებში კი გრიპის ვაქცინა უფასოა შემდეგი ჯგუფებისათვის:

[checklist]

  • ორსულებისთვის
  • 18 წლამდე ასაკის დიაბეტით დაავადებულ პირთათვის
  • დიალიზზე მყოფ პირთათვის
  • ბავშვთა სახლებსა და მოხუცთა თავშესაფრებში მცხოვრებთათვის და მათი მომსახურე პერსონალისთვის
  • C ჰეპატიტით დაავადებული პირებისთვის, რომლებიც გადიან ჰეპატიტის საწინააღმდეგო მკურნალობის კურსს
  • აივ ინფიცირებული პირებისთვის
  • სამედიცინო დაწესებულებაში მომუშავე პერსონალისთვის, საზოგადოებრივი ჯანმრთელობის ცენტრების/სამსახურების თანამშრომლებისთვის

[/checklist]

სეზონური გრიპის ერთადერთ პრევენციულ ღონისძიებად ყოველწლიური ვაქცინაცია მიიჩნევა. სეზონური გრიპის ვაქცინა წელიწადში ერთხელ, ჩვეულებრივ, ოქტომბერში ან ნოემბერში კეთდება.

„გრიპის სეზონი გრძელდება შემოდგომიდან გაზაფხულამდე, ანუ მომდევნო წლის მეოცე კვირის ჩათვლით. სასურველია გრიპის ვაქცინის გაკეთება შემთხვევების გახშირებამდე, რადგან ვაქცინას ორი კვირა მაინც სჭირდება, რომ იმუნიტეტი გამომუშავდეს.

გრიპის ვაქცინის გაკეთების შედეგად შეიძლება ადამიანს აღენიშნებოდეს რესპირატორული სიმპტომები, გაციება და ა.შ. მაგრამ ეს არ იქნება გრიპი.

გრიპი ძალიან რთული დაავადებაა, ყველა გაციებას ადამიანები ეძახიან გრიპს, მაგრამ ეს ასე არ არის. გრიპის ყველაზე მთავარი სიმპტომი არის ცხელება, როცა სიცხე არის 38,5 და მეტი, კუნთების ტკივილი, ზოგადი სისუსტე, ხველა და ა.შ. ვაქცინა ნამდვილად არის ეფექტური, მაგრამ მნიშვნელოვანია ვაქცინის გაკეთების დროს ადამიანს არ ჰქონდეს ტემპერატურა, არ ახველებდეს და ა.შ. ეს რამდენიმედღიანი პერიოდია, სჯობს გავიდეს ეს პერიოდი და შემდეგ გაკეთდეს ვაქცინა,“ – ამბობს რუსუდან შავიშვილი.

 

გადაბეჭდვის წესი


ასევე: