ბათუმში ყინულის სასახლე ადგილს იცვლის

ბათუმშიარსებული ყინულის სასახლის დემონტაჟი  მალე დაიწყება. სად გადაიტანენ ყინულის სასახლის კონსტრუქციას და რა სპორტული სახეობისთვის იქნება ის განკუთვნილი, ჯერ გადაწყვეტილი არ არის. არსებული სასახლის ადგილზე კი საცურაო აუზი აშენდება. იქვე არსებული დარბაზი, რომელიც ახლა აშენდა და სადაც მსოფლიო საჭადრაკო ოლიმპიადა ჩატარდა, ყინულის არენად გადაკეთდება. დღეს ბათუმის ყინულის სასახლეში 700-მდე სხვადასხვა ასაკის მოციგურავე, ჰოკეისტი თუ მოყვარული დადის, ძირითადად ბავშვები.

„ნოემბრის თვეში უნდა დაიწყოს ყინულის სასახლის დემონტაჟი. ჯერ გადაწყვეტილება არ არის მიღებული, თუმცა მთავრობა დაგვპირდა, რომ არსებულ მოედანს სხვაგან გადაიტანენ და ახალიც აშენდება. შესაძლოა ისე მოხდეს, რომ ორი ყინულის მოედანი გვქონდეს. გადატანას მინიმუმ სამი თვე მაინც დასჭირდება,“ – განაცხადა „ბათუმელებთან“ ბადრი აბაშიძემ, ბათუმის სპორტული ცენტრის დირექტორის მოადგილემ. მისივე თქმით, იმ სამი თვე ბათუმში ყინულის მოედანი არ იქნება.

აჭარის ფინანსთა და ეკონომიკის სამინისტროს პრესსამსახურის ინფორმაციით, ყინულის არსებული სასახლის კონსტრუქციას სხვა ტერიტორიაზე გადაიტანენ, რომელშიც აუცილებლად განთავსდება სპორტული ობიექტი. იმის შესახებ, თუ სად გადაიტანენ ამ კონსტრუქციას და განთავსდება თუ არა მასში ყინულის მოედანი, სამინისტროში აცხადებენ, რომ ეს ჯერ გადაწყვეტილი არ არის:  „დემონტაჟის დაწყებამდე იქნება მიღებული გადაწყვეტილება, თუ სად გადაიტანენ, ასევე სპეციალისტებთან ერთად გადაწყდება სპორტის რა სახეობა განთავსდება ამ ობიექტში“.

ბათუმში, ლადო ასათიანის ქუჩაზე, N27-ში, ყინულის არენისა და საცურაო აუზის მშენებლობა მიმდინარე წლის თებერვალში გადაწყდა. სამუშაოების ღირებულება 19 990 002 აშშ დოლარია. ხელშეკრულება შპს „სტადიონმა“ კანადურ კომპანია Westincor Limited-თან ტენდერის გარეშე გააფორმა. „მკაცრი პირობაა, რომ პირველ სექტემბრამდე მოეწყოს ისეთი კონსტრუქცია და იმ ფორმით, რომ მასში საჭადრაკო ოლიმპიადის ჩატარება იყოს შესაძლებელი. ოლიმპიადის შემდეგ, გაგრძელდება მშენებლობა და დასრულებულ სახეს მიიღებს 2020 წლის ბოლოს. რაც შეეხება თანხას, კომპანიას საწყის ეტაპზე გადავუხდით საბოლოო ღირებულების 20%-ს, ხოლო დანარჩენ თანხას დავფარავთ მომდევნო ოთხი წლის განმავლობაში,“ – გვითხრეს მაშინ შპს „სტადიონში“.

კანადურმა კომპანიამ ქვეკონტრაქტორად შპს „ანაგი“ დაიქირავა, რომელმაც ააშენა დარბაზი, სადაც საჭადრაკო ოლიმპიადა ჩატარდა. მშენებლობას კვლავ „ანაგი“ გააგრძელებს, რომელიც ბათუმში საფეხბურთო სტადიონსაც აშენებს.

„ახლა ვემზადებით, რომ დავიწყოთ სამუშაოების მორიგი ეტაპი – საცურაო აუზის მშენებლობა და არსებული დარბაზის გადაკეთება ყინულის არენად. ის ინვენტარი, რაც ოლიმპიადის ჩასატარებლად იქნა შეძენილი, გამოსადეგარია ყინულის არენისთვის და დამატებით კიდევ იქ მოეწყობა ყინულის მოედნის ტრიბუნები – ჯამში 1500 კაცზე. ყინულის არენა უნდა დასრულდეს 2019 წლის პირველი აპრილისთვის, ხოლო საცურაო აუზი 2020 წლის პირველი აპრილისთვის. ამ დროისთვის არც პროექტი შეცვლილა და არც თანხის ოდენობა“, – გვითხრა მირზა ბოლქვაძემ, შპს „სტადიონის“ ინჟინერ-კონსტრუქტორმა.

თავის დროზე საუბარი იყო იმაზე, რომ ახალი საცურაო აუზი და ყინულის არენა ბათუმის მუნიციპალიტეტს გადაეცემოდა. აჭარის ფინანსთა და ეკონომიკის სამინისტროში დღეს გვითხრეს, რომ „სამშენებლო პროცესის დასრულებამდე მიღებული იქნება გადაწყვეტილება, ვინ განახორციელებს ამ სპორტული ობიექტების მოვლა-პატრონობას“.

ყინულის არენისა და საცურაო აუზის მშენებლობის ეტაპების დასრულების დადასტურების საექსპერტო მომსახურებაზე შპს „სტადიონმა“ 2018 წლის 23 ოქტომბერს ტენდერი გამოაცხადა. სატენდერო თანხა 23 ათასი ლარია. ძირითადი სამუშაოები 23 ეტაპისგან შედგება. მირზა ბოლქვაძის თქმით, ჯერ არც ერთი ეტაპი არ არის დასრულებული.

—————

ბათუმის ყინულის სასახლე გასართობ-გამაჯანსაღებელი ცენტრის სტატუსით 2007 წელს დაფუძნდა. თავდაპირველად ყინულის სასახლე გოგებაშვილის ქუჩაზე იყო განთავსებული, შემდეგ ახალ ბულვართან, მოგვიანებით კი ლადო ასათიანის ქუჩა N27-ში გადაიტანეს. 2014 წლის 31 იანვარს ბათუმში, ყინულის სასახლის ბაზაზე, შეიქმნა სპორტულ-ახალგაზრდული ცენტრი. ამჟამად ყინულის სასახლეს მერიის დაქვემდებარებაში მყოფი ა(ა)იპ ბათუმის სპორტული ცენტრის სარგებლობაშია.

ამავე თემაზე: 

15 ათასი ლარი ყინულის სასახლის მემბრანის გასარეცხად

მთავარი ფოტო: ბათუმის ახალი ყინულის არენის ვიზუალი / ფოტო შესყიდვების ვებგვერდიდან
ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com