ბინის ქურდობაზე გირაოთი გათავისუფლებულმა სხვა ბინა გაქურდა

„არ მსურს დავესწრო სასამართლო პროცესს,“ – ეს წერილი ქურდობაში ბრალდებულმა მერაბ ს.-მ მოსამართლეს ციხიდან გამოუგზავნა. წერილის შინაარსი სხდომის დაწყებისთანავე თავად მოსამართლემ წაიკითხა.

ბათუმში რამდენიმე ბინის გაქურდვაში ბრალდებულს არც ადვოკატი ჰყავს. გამოძიების ვერსიით, მერაბ ს. სხვადასხვა „მორგებულ გასაღებს“ ამზადებდა და ბინებს ქურდავდა.

ქურდობის ბოლო შემთხვევა 9 სექტემბერს მოხდა. პროკურატურის ვერსიით, მერაბ ს.-მ ტურისტების მიერ რუსთაველის ქუჩაზე ნაქირავებ ბინაში „მორგებული გასაღებით“ შეაღწია. ბინიდან ბრალდებულმა ძვირფასეულობა და ფული წაიღო, დაახლოებით 7 ათასი ლარი. მერაბ ს.-ს პოლიციელები ბინაშივე დაადგნენ თავს, როცა ის ძვირფასეულობას პარკში ალაგებდა.  11 სექტემბერს მერაბ ს.-ს სასამართლომ აღკვეთი ღონისძიების სახით პატიმრობა შეუფარდა.

რუსთაველის ქუჩაზე ბინის გაქურვის დროს მერაბ ს. სასამართლოს მანამდე ორი თვით ადრე ჩადენილი ქურდობის ფაქტზე გირაოთი ჰყავდა გათავისუფლებული. 2018 წლის ივლისში იგივე მერაბ ს. სხვა ბინაში შეღწევას კიდევ ერთ პირთან ერთად ცდილობდა. პოლიციელებმა ჯგუფი ოპერატიული ინფორმაციის საფუძველზე ადგილზე დააკავა, ვიდრე მერაბ ს. ბინის გაქურდვას დაიწყებდა.

ამჟამად მერაბ ს.-ს წინააღმდეგ ორი საქმე ერთდროულად მიმდინარეობს. ივლისში ჩადენილ ქურდობას მოსამართლე ვიოლეტა ფორჩხიძე განიხილავს, სექტემბერში მომხდარს – თამარ ბეჟანიშვილი, თუმცა არსებითი განხილვა ჯერ არ დაწყებულა. ამ მოსამართლემ დღევანდელ პროცესზე ბრალდებულს სავალდებულო წესით ადვოკატი დაუნიშნა.

რადგან ბრალდებული სასამართლო სხდომაზე არ მოვიდა და არც ადვოკატი ჰყავს, მოსმართლე თამარ ბეჟანიშვილმა დღეს მხოლოდ აღკვეთი ღონისძიების შეფარდების შეცვლის საკითხი განიხილა. პროკურორმა ოლღა მერებაშვილმა მოსამართლეს უთხრა, რომ ბრალდებულის გათავისუფლების საფუძველი არ არსებობს.

„პირიქით, ახლადაღმოჩენილი გარემოებაა ის, რომ ის წარსულში ორჯერ იყო ნასამართლევი საკუთრების წინააღმდეგ დანაშაულებისთვის. ის იდენტური ხასიათის დანაშაულს ახორციელებს. შესაბამისად, ჩვენ ბრალი დავამძიმეთ,“ – აღნიშნა პროკურორმა.

მერაბ ს.-ს ახლა უკვე ედავებიან ქურდობას მე-4 მუხლის გ ქვეპუნქტის შესაბამისად, რაც გულისხმობს ქურდობის ჩადენას იმ პირის მიერ, ვინც ორჯერ ან მეტჯერ იყო ნასამართლევი სხვისი ნივთის მართლსაწინააღმდეგო მისაკუთრებისთვის. ბრალის დადასტურების შემთხვევაში, მერაბ ს.-ს 6-დან 10 წლამდე პატიმრობა ელის.

მერაბ ს. ბოლოს ქურდობისთვის 2006 წელს გაასამართლეს, თუმცა მან 2016 წელს ამნისტიით მოახერხა ციხიდან გამოსვლა. პროკურატურის ვერსიით, მერაბ ს.-მ პატიმრობის შემდეგ რამდენიმე ბინა გაქურდა ბათუმში „მორგებული გასაღებით“, თუმცა ბოლო შემთხვევაში გამოძიება ბრალდებულს მხოლოდ ერთი ბინის გაქურდვას ედავება.

 

ნეტგაზეთის მასალების სხვა გამოცემებში გადაბეჭდვის წესი


ავტორი