სექტემბერში რუსეთიდან ვიზიტორების რაოდენობა 26 პროცენტით გაიზარდა

შს სამინისტროს საინფორმაციო-ანალიტიკური დეპარტამენტის ინფორმაციით, 2018 წლის სექტემბერში რუსეთიდან საქართველოში შემოსული ვიზიტორების რაოდენობა გასული წლის სექტემბერთან შედარებით 26 პროცენტითაა გაზრდილი.

სექტემბერში საქართველოში სულ 814 871 უცხოეთის მოქალაქე შემოვიდა, მათგან 428 633 ადამიანი საქართველოში 24 საათზე მეტ ხანს ხანს დარჩა, 197 885 კი ტრანზიტით იმყოფებოდა.

სექტემბერში უცხო ქვეყნის მოქალაქეებიდან საქართველოში ყველაზე მეტი, 198 453 რუსეთის მოქალაქე შემოვიდა.

ვიზიტორთა რაოდენობით მეორე ადგილზეა აზერბაიჯანი – ამ ქვეყნიდან სექტემბერში 166 707 ვიზიტორი შემოვიდა.

მესამე ადგილზეა სომხეთი – 147 919 ვიზიტორი.

სექტემბერში შემოსული ვიზიტორების სტატისტიკის თანახმად მეოთხე ადგილზეა თურქეთი – 103 731 ვიზიტორი. გასული წლის სექტემბერთან შედარებით ამ ქვეყნიდან ვიზიტორების 13-პროცენტიანი კლება აღინიშნება.

მეხუთე ადგილზეა ევროკავშირის ქვეყნების მოქალაქეები – 58 338, მეექვსე ადგილზეა ირანი – 31 321 ვიზიტორი [გასული წლის სექტემბერთან შედარებით აღინიშნება 40-პროცენტიანი კლება], მეშვიდე ადგილზე კი უკრაინაა – 23 159 ვიზიტორი.

აღსანიშნავია, რომ გასული წლის სექტემბერთან შედარებით წელს ევროკავშირის ქვეყნებიდან ვიზიტორების რაოდენობა 38 პროცენტითაა გაზრდილი.

რაც შეეხება სექტემბერში აჭარაში სამივე ადმინისტრაციული საზღვრის კვეთის მონაცემებს, 2018 წლის ზაფხულში, სამი თვის მონაცემების თანახმად, აჭარაში სულ 759 415 ვიზიტორი შემოვიდა. აჭარის ტურიზმისა და კურორტების დეპარტამენტის ცნობით, 2018 წლის 9 თვის მონაცემების თანახმად აჭარაში შემოსული უცხო ქვეყნის მოქალაქეების სტატისტიკა ასე ნაწილდება:

  • თურქეთი – 680 672 ვიზიტორი
  • აზერბაიჯანი – 171 646 ვიზიტორი
  • რუსეთი – 103 980 ვიზიტორი
  • ისრაელი – 57 170 ვიზიტორი
  • უკრაინა – 39 904 ვიზიტორი 

აჭარის ტურიზმის დეპარტამენტის ცნობით, ტურისტების პროცენტული მატება აღინიშნება სამიზნე ევროპული ქვეყნებიდან. ყველაზე მეტი, 102-პროცენტიანი მატებაა ესტონეთიდან. წელს ამ ქვეყნიდან აჭარაში 1204 ვიზიტორი შემოვიდა, გასულ წელთან შედარებით 91-პროცენტიანი მატებაა გერმანიიდან – 5871 ვიზიტორი და 54-პროცენტიანი – ისრაელიდან – 57 170 ვიზიტი.

_____________

მთავარ ფოტოზე: ტურისტები ბათუმში. ლელა დუმბაძის ფოტო 

 

ნეტგაზეთის მასალების სხვა გამოცემებში გადაბეჭდვის წესი


ავტორი
ნანა კვაჭაძე, ჟურნალისტი ელფოსტა: kvachadze.n@gmail.com