4,4 მილიონი ლარი 60 პიკაპისთვის – შს სამინისტროს დავების საბჭოში უჩივიან



შსს-მ „უსაფუძვლოდ შეზღუდა ყველა იმ მეწარმე სუბიექტის კანონიერი უფლება მონაწილეობა მიიღოს სახელმწიფო შესყიდვებში, რომელიც არ წარმოადგენს რომელიმე ავტოსატრანსპორტო საშუალების მწარმოებელი კომპანიის ოფიციალურ წარმომადგენელს, მაგრამ აქვს ყველა რესურსი იმისთვის, რომ ჯეროვნად, დროულად და მაღალი ხარისხით გაუწიოს შემსყიდველს მომსახურება“ – აღნიშნულია „თეგეტა მოტორსის“ საჩივარში.

კომპანიამ საჩივრით შესყიდვების სააგენტოს დავების საბჭოს იმ ტენდერის პირობების გამო მიმართა, რომლითაც შსს 60 ერთეული მაღალი გამავლობის პიკაპის ტიპის ავტოსატრანსპორტო საშუალების შესყიდვას გეგმავს. ავტომობილების შესაძენად შსს-ს მაქსიმუმ 4 მილიონ 425 ათასი ლარი აქვს გათვალისწინებული.

„თეგეტა მოტორსი“ სამინისტროს სატენდერო კომისიის მიერ დამტკიცებულ რამდენიმე პირობას ხდის სადავოს, რაც „ხელოვნურად უქმნის ბარიერს შპს „თეგეტა მოტორსს“, როგორც შესყიდვებში მონაწილეობის მსურველს, მიიღოს მონაწილეობა სახელმწიფო შესყიდვაში, რაც იწვევს კომპანიის საქმიანობაში პირდაპირ ჩარევას და თანასწორუფლებიანობის პრინციპის დარღვევას,“ – აღნიშნულია საჩივარში.

სადავო პირობის მიხედვით, „პრეტენდენტი უნდა იყოს შემოთავაზებული ავტომანქანის მწარმოებლის ოფიციალური დილერი“.

„ამ პირობების საფუძველზე ტენდერში მონაწილეობის მიღებას შეძლებენ მხოლოდ ავტოსატრანსპორტო საშუალების მწარმოებელი კომპანიების ოფიციალური დილერები, რაც სახელმწიფო შესყიდვებისას გაწეული ხარჯების მხოლოდ ამ ტიპის კომპანიებში თავმოყრას გამოიწვევს, ამის შედეგად კი ოფიციალური დილერები უდიდეს კონკურენტულ უპირატესობას მოიპოვებენ, რაც ბუნებრივია, არსებითად გააუარესებს აღნიშნულ ბაზარზე არსებული კონკურენციის ხარისხს, რაც საბოლოო ჯამში, გავლენას მოახდენს სახელმწიფო ინტერესზეც და ვერ იქნება მიღწეული „სახელმწიფო შესყიდვების შესახებ“ საქართველოს კანონით განსაზრვრული მიზანი, რაც სახელმწიფო შესყიდვებისათვის განკუთვნილი ფულადი სახსრების რაციონალური ხარჯვის უზრუნველყოფაა, რადგან რაც უფრო ცოტა პრეტენდენტი მიიღებს მონაწილეობას სახელამწიფო შესყიდვაში, მით მეტია იმის ალბათობა, რომ შესყიდვა იმაზე მეტ ფასში განხორციელდეს, ვიდრე ეს იყო მოსალოდნელი მრავალი პრეტენდენტის არსებობის პირობებში.“ – აღნიშნულია „თეგეტა მოტორსის“ საჩივარში.

კომპანია სადავოს ხდის სხვა პირობებსაც. მათ შორის იმას, რომ „მიმწოდებელი ვალდებულია, ჰქონდეს ავტორიზებული სერვისცენტრი, სადაც უნდა განხორციელდეს სარეგლამენტო მომსახურება… ამასთან, შემსყიდველის მიერ მოთხოვნილია ისეთი დოკუმენტების წარმოდგენა, რომლის მიღებაც შეუძლია მხოლოდ მწარმოებლის ოფიციალურ დილერს საქართველოში, შესაბამისად, ყველა ზემოაღნიშნული სადავო პირობა საქართველოს კანონმდებლობას ეწინააღმდეგება სწორედ იმ საფუძვლით, რომ აღნიშნული ჩანაწერებით იზღუდება კონკურენცია და ქმნის საფრთხეს ჯანსაღი კონკურენტული გარემოსთვის,“ – აღნიშნულია საჩივარში.

„თეგეტა მოტორსი“ შსს-ს სატენდერო პირობებში ცვლილებების შეტანას და სადავო პირობების იმდაგვარად ფორმულირებას მოითხოვს, რომ „არ შეეზღუდოს სახელმწიფო შესყიდვაში მონაწილეობის მიღების უფლება ისეთ კომპანიებს, რომლებიც არ წარმოადგენენ ავტომანქანის მწარმოებლის ოფიციალურ დილერს საქართველოში“.

კომპანიის საჩივარი დავების საბჭომ 2018 წლის 29 ოქტომბერს უნდა განიხილოს.

პარალელურად, შესაბამის ტენდერში წინადადებების მიღება მეორე დღეა დაწყებულია და მიმდინარე წლის 23 ოქტომბერს უნდა დასრულდეს.

შსს, გარდა აღნიშნული 60 ავტომობილისა, ამჯერად, დამატებით 88 ერთეულ ჰეჩბეკის ტიპის მსუბუქ ავტომობილსაც შეიძენს, რაზედაც ცალკე ტენდერი აქვს გამოცხადებული.

ამ თემაზე:

შსს 148 ავტომობილს ყიდულობს – სატენდერო თანხა 8,6 მილიონი ლარია

ფოტო: police.ge
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com