მთავარი,სიახლეები

მოქალაქე 2019 წლის ბათუმის ბიუჯეტში სმენის არმქონე პირებისთვის პროგრამას ითხოვს

19.10.2018 • 3097
მოქალაქე 2019 წლის ბათუმის ბიუჯეტში სმენის არმქონე პირებისთვის პროგრამას ითხოვს

მოქალაქე პალინა ჯაღათაშვილი, რომელიც სმენის არმქონე ბავშვთა და მოზარდთა პრობლემებზე მუშაობს, ბათუმის მერიას მომავალი წლის ბიუჯეტში სპეციალური პროგრამის ჩასმას სთხოვს. პროგრამა დაინტერესებულ მოქალაქეებს ჟესტური ენის შესწავლის შესაძლებლობას მისცემს. პალინა მიიჩნევს, რომ ასე მერია სმენის არმქონე ბავშვთა და მოზარდთა საზოგადოებაში ინტეგრირებას შეუწყობს ხელს:

„თქვენ თანაბრად უნდა შეგეძლოთ ამ ადამიანების მოსმენა, ისევე, როგორც სხვებს უსმენთ, რადგან ბევრი პრობლემა გვაქვს. ქალაქში იბადებიან და იზრდებიან სმენის არმქონე ბავშვები, რომლებიც მხოლოდ სოციალური დახმარების ამარა არიან და მათი საზოგადოებაში ინტეგრირება არ ხდება, მათზე არ ზრუნავენ შესაბამისი უწყებები. თარჯიმანი, რომ არ მეხმარებოდეს, ალბათ, ვერასდროს გაიგებდით ახლა მე თქვენ რას გეუბნებით. მე მინდა სმენის არმქონე ადამიანების პრობლემებზე ვისაუბრო“, – მიმართა დღეს 19 ოქტომბერს მოქალაქე პალინა ჯაღათაშვილმა ბათუმის საკრებულოს წევრებს ღია კარის სხდომაზე. სიტყვით გამოსვლისას პალინას თან ახლდა სურდო თარჯიმანი, რომელიც მის ჟესტურ ენას ახმოვანებდა.

პალინა მიიჩნევს, რომ სმენის არმქონე პირებს დღეს კომუნიკაციის პრობლემა აქვთ და რაც მეტ ახალგაზრდას ეცოდინება ჟესტური ენა, მით უფრო მეტად გაუმარტივდებათ მათ ურთერთობა საზოგადოებასთან. მან ისაუბრა ასევე სმენის არმქონე ბავშვებისთვის ადრეული და სასკოლო განათლების მიღების შესაძლებლობაზე:

„ჩვენ ასეთ ბავშვებს თითქოს ვერ ვხედავთ. მათთვის მიუღწეველია თუნდაც ადრეული განათლება. ისინი რეალურად ბაღებში არ დადიან, მათ არავინ ასწავლის და აქედან იწყება მათი საზოგადოებისგან გარიყვა. რჩებიან აბსოლუტურად მარტონი, არც სკოლამდელ განათლებაში გვაქვს ცვლილება.“

ამ დროისთვის საქართველოში სმენის არმქონე ბავშვებისთვის არ არსებობს საკმარისი სკოლები. ბავშვებს, ძირითადად, ქუთასისა და თბილისის სმენის არმქონე პირთა სკოლა-პანსიონებში უწევთ წასვლა, ამიტომაც ისინი სწავლის პერიოდში საკუთარ ოჯახებს მოწყვეტილები არიან, ბევრი კი მანძილის ბარიერის გამო სწავლას საერთოდ ვერ ახერხებს.

ამ პროცესის სირთულის გასააზრებლად პალინამ საკრებულოს წევრებს სთხოვა ეს ყველაფერი საკუთარ თავთან მიმართებაში წარმოიდგინონ:

„განსაკუთრებული პრობლემაა რაიონებიდან ჩასული ბავშვების საკითხი. აბა თქვენს თავზე წარმოიდგინეთ საკუთარი შვილი გააგზავნოთ სადღაც, დაგიბრუნდებათ აბსოლუტურად გაუცხოებული ბავშვი, ჟისტური ენით მოსაუბრე. ამ დროს თქვენ არ იცით ჟესტური ენა, შესაბამისად, თქვენ შორის კომუნიკაციაც ვერ შედგება“.

პალინა ითხოვს გაიხსნას ადაპტირებული კლასები სკოლებში სმენის არმქონე ბავშვებისთვის, ისე როგორც ეს კანონმდებლობითაა გათვალისწინებული, ხოლო სახელმწიფომ იზრუნოს იმაზე, რომ სერვისები, ას ინფორმაცია, რომელსაც, მაგალითად, ბათუმის მერიაში გასცემენ, სმენის არმქონე პირებისთვისაც იყოს მისაწვდომი.

მთავარი ფოტო: სურდო თარჯიმანი და პალინა ჯაღათაშვილი

გადაბეჭდვის წესი


ასევე: