ბათუმის მუნიციპალიტეტის საკრებულოს ლუკა ასათიანის სახელობის სხდომათა დარბაზში „ღია კარის“ სხდომა, მოქალაქეთა მოსმენა გაიმართა. სხდომის მონაწილე მოქალაქეებს დღეს საშუალება ჰქონდათ თავიანთი წინადადებები და პრობლემური საკითხები ერთდროულად გაეცნოთ როგორც ქალაქის წარმომადგენლობითი ორგანოს წევრებისთვის, ასევე, აღმასრულებელი ხელისუფლების წარმომადგენლებისათვის.
მოქალაქეებმა „ღია კარის“ სხდომაზე, ძირითადად, ეზოების კეთიმოწყობაზე, ინფრასტრუქტურაზე, საქალაქო ტრანსპორტის პრობლემებზე, შშმ პირთა საჭიროებებზე, ბათუმის ურბანული განვითარების სტრატეგიაზე, ახალგაზრდულ და კულტურულ პროგრამებზე, ველოტრანსპორტის განვითარებასა და ქალაქის გამწვანების პოლიტიკაზე გაამახვილეს ყურადღება.
ბათუმის საკრებულოს თავმჯდომარის განცხადებით, მოქალაქეების მიერ სხდომაზე დასმული საკითხები აღირიცხება სხდომის ოქმში და წარედგინება საკრებულოს ბიუროს უახლოეს სხდომას, რომელიც თავის მხრივ, განიხილავს და მიიღებს გადაწყვეტილებას წარდგენილი საკითხების შესაბამისი კომისიისთვის ან/და მერისთვის განსახილველად გადაცემის შესახებ. მისივე თქმით, დასმული საკითხების განხილვის მიმდინარეობას საკრებულო გააკონტროლებს და მიღებულ გადაწყვეტილებას გააცნობს როგორც მოქალაქეს, ასევე, საზოგადოებას.
ბათუმის მუნიციპალიტეტის საკრებულოში „ღია კარის“ სხდომის გამართვის შესახებ ბრძანება საკრებულოს თავმჯდომარემ 11 ოქტომბერს გამოსცა. საკრებულოს კანცელარიაში შემოსული შესაბამისი განცხადებების მიხედვით, „ღია კარის“ სხდომაში მონაწილეობის სურვილი გამოთქვა 24-მა (ოცდაოთხმა) ბათუმში რეგისტრირებულმა მოქალაქემ.
„ღია კარის“ სხდომას საკრებულოს თავმჯდომარე სულიკო თებიძე უძღვებოდა.
