სულიკო თებიძის განმარტება, თუ რატომ შეუზღუდეს მოქალაქეებს კითხვის დასმის უფლება

„ღია კარის“ სხდომა ბათუმის საკრებულოში, რომელიც მუშაობას დღეს, 19 ოქტომბერს, 11 საათზე შეუდგა, სულიკო თებიძის განმარტებით დაიწყო. საკრებულოს თავმჯდომარე გამოეხმაურა „ბათუმელების“ მიერ გუშინ გამოქვეყნებულ ერთ-ერთ სტატიას, სადაც საიას იურისტი კრიტიკულად აფასებდა საკრებულოს ღია კარის დღეზე მოქალაქეებისთვის კითხვის დასმის უფლების შეზღუდვას. დღევანდელ სხდომაზე კითხვებს მხოლოდ საკრებულოს თავმჯდომარე დასვამს.

სულიკო თებიძემ სხდომის დაწყებისთანავე განმარტა, რომ მან ამ საკითხზე კონსულტაცია გაიარა საკრებულოს იურისტებთან, რომლებმაც დაუდასტურეს, რომ ეს ფორმა – სხდომაზე მოქალაქეებისთვის კითხვის დასმის უფლების შეზღუდვა, შეესაბამება რეგლამენტს.

„რეგლამენტის დაცვა კი ჩემი მოვალეობაა“, – დასძინა სულიკო თებიძემ.

სულიკო თებიძე არ შეხებია საიას იურისტის კრიტიკის იმ ნაწილს, რომ საკრებულოს ნებისმიერ დროს შეუძლია მის მიერ მიღებული რეგლამენტის შეცვლა, თუ ამის სურვილი ექნება. მით უფრო, რომ კანონი „ადგილობრივი თვითმმართველობის შესახებ“ საკრებულოს საჯაროობისა და ანგარიშვალდებულების პრინციპის დაცვას ავალდებულებს.

დღევანდელ ღია კარის სხდომაზე დასასწრებად რეგისტრაცია 25-მა მოქალაქემ გაიარა. რეგლამენტის თანახმად, თითოეულ მოქალაქეს თავისი მოსაზრების დაფიქსირებისთვის 5 წუთი აქვს. ამ რეჟიმში მოქალაქეები ძირითადად ინფრასტრუქტურულ პრობლემებზე საუბრობენ – ეზოების მოწესრიგება, გაუმართავი საკანალიზაციო სისტემა და ასე შემდეგ.

სულიკო თებიძე ყველა გამომსვლელის მოთხოვნას ინიშნავს და პირობას დებს, რომ ამ პრობლემებს მოაგვარებენ.

ღია კარის სხდომის ჩატარებას წელიწადში ოთხჯერ საკრებულოს კანონმდებლობა ავალდებულებს.

ნეტგაზეთის მასალების სხვა გამოცემებში გადაბეჭდვის წესი


ავტორი