აკრძალული ცელოფნის პარკების ქსელიდან ამოღებაზე ბათუმში 759 ობიექტია გაფრთხილებული

ბათუმის მერიის მუნიციპალური სერვისების სააგენტოს ინფორმაციით, პირველი ოქტომბრიდან დღემდე პერიოდში, მონიტორინგის ჯგუფმა აკრძალული ცელოფნის პარკების ქსელიდან ამოღების შესახებ ბათუმში 759 ობიექტი გააფრთხილა.

„ამჯერად ვაგრძელებთ ობიექტების გაფრთხილებას. გაფრთხილებული ობიექტების ხელახლა შემოწმებას კი, ალბათ, 2018 წლის პირველი ნოემბრიდან დავიწყებთ. ობიექტი, სადაც გაფრთხილების მიუხედავად აკრძალული პარკები მაინც იქნება რეალიზაციაში, კანონის შესაბამისად დაჯარიმდება,“ – გვითხრეს მუნიციპალური სერვისების სააგენტოში.

მაღაზიის მესაკუთრე ვალდებულია გაფრთხილებიდან 10 დღის განმავლობაში ამოიღოს ქსელიდან აკრძალული პარკები. წინააღმდეგ შემთხვევაში ის 500 ლარით დაჯარიმდება და მოხდება შესაბამისი პროდუქციის კონფისკაცია. დარღვევის განმეორების შემთხვევაში, მეწარმე სუბიექტი დაჯარიმდება 1 000 ლარის ოდენობით და ასევე მოხდება შესაბამისი პროდუქციის კონფისკაცია.

საქართველოში 2018 წლის პირველი ოქტომბრიდან მხოლოდ 15 მიკრონზე ნაკლები სისქის პლასტიკის პარკების [ერთჯერადი, თხელი ცელოფნის პარკების] რეალიზაცია აიკრძალა. სხვა სახის ცელოფნის პარკების რეალიზაცია კი არ არის აკრძალული და ის 2019 წლის პირველი აპრილიდან აიკრძალება.

პლასტიკის პარკების მთლიანად აკრძალვა არ ნიშნავს იმას, რომ მაღაზიებში, ზოგადად სავაჭრო ქსელში 2019 წლის აპრილიდან ცელოფნის პარკები არ იქნება. პლასტიკის პარკები მომავალი წლის აპრილიდანაც იქნება რეალიზაციაში, თუმცა დაშვებულია მხოლოდ ბიოდეგრადირებადი და კომპოსტირებადი პარკები, შესაბამისი წარწერით.

აკრძალული ცელოფნის პარკების კონტროლი და შესაბამისი რეაგირების მოხდენა „მუნიციპალური სერვისების სააგენტოს“ ინფორმაციით, ბათუმში დაეკისრათ:

  • თავად ა(ა)იპ „მუნიციპალური სერვისების სააგენტოს“
  • ბათუმის მერიის მუნიციპალური ქონების და სერვისების მართვის სამსახურს
  • შპს „სანდასუფთავებას“
  • ა(ა)იპ „ბათუმის ბოტანიკურ ბაღს“, ა(ა)იპ „საქალაქო ინფრასტრუქტურისა და კეთილმოწყობის სამმართველოს“, სსიპ „ბათუმის ბულვარსა“ და შპს „შავი ზღვის ფლორისა და ფაუნის შემსწავლელი სამეცნიერო-კვლევითი ცენტრის“ თანამშრომლებს, მხოლოდ მათ საკუთრებაში ან სარგებლობაში არსებულ ან/და მოვლა-პატრონობისათვის განსაზღვრულ ტერიტორიებზე.

პლასტიკისა თუ ბიოდეგრადირებადი პარკების კონტროლს ქვეყნის მასშტაბით შემდეგი უწყებები ახორციელებენ:

  • პარკების წარმოებისას – საქართველოს გარემოს დაცვისა და სოფლის მეურნეობის სამინისტროს სახელმწიფო საქვეუწყებო დაწესებულება – გარემოსდაცვითი ზედამხედველობის დეპარტამენტი
  • პარკების იმპორტისას – საქართველოს ფინანსთა სამინისტრო
  • პარკების რეალიზაციისას – ადგილობრივი თვითმმართველობის ორგანო

 

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com