მიეცეს თუ არა „რივიერას“ ტერიტორიაზე გეგმარებითი დავალება კომპანიას – მოსაზრებების წარდგენის ვადა იწურება 

ადმინისტრაციული წარმოების ვადა საკითხზე – მიეცეს თუ არა კერძო კომპანიას ბათუმის იახტკლუბის მიმდებარე ტერიტორიასთან დაკავშირებით გეგმარებითი დავალება, იწურება. ადმინისტრაციული წარმოება 29 სექტემბერს დაიწყო და მოსაზრებების წარდგენა მერიაში ნებისმიერ დაინტერესებულ პირს შეეძლო. როგორც მერიაში „ბათუმელებს“ უთხრეს, კომპანიისთვის გეგმარებითი დავალების მიცემა-არმიცემის საკითხს ქალაქის საკრებულო უახლოეს სხდომაზე გადაწყვეტს.

„მანამდე კი, დაინტერესებულ პირებს შეუძლიათ აღნიშნულთან დაკავშირებით თავიანთი მოსაზრებები მერიაში წარმოადგინონ. ჯერ კიდევ არის დრო, რომლის ამოწურვის შემდეგ მერია შესაბამის პროექტს გადაუგზავნის ბათუმის საკრებულოს,“ – გვითხრეს ბათუმის მერიაში.

ადმინისტრაციული წარმოების მასალების გაცნობა ბათუმის მერიის ქალაქგანვითარებისა და ურბანული პოლიტიკის სამსახურშია შესაძლებელი [მის: ქ. ბათუმი, ლუკა ასათიანის ქ.№25, პირველი სართული, ტელ: 27 26 28].

განკარგულების პროექტის თაობაზე მოსაზრებების წარდგენის 20-დღიანი ვადა კი დღეს, 18 ოქტომბერს, იწურება. მერიაში ამბობენ, რომ ეს არის მინიმალური ვადა და განკარგულების პროექტი საკრებულოში ჯერ გადაგზავნილი არ არის.

ბათუმის საკრებულოს მორიგი სხდომის ჩატარების თარიღი კი, როგორც საკრებულოში გვითხრეს, გადაწყვეტილი არ არის: „ამ თვეში აუცილებლად ჩატარდება სხდომა, თუმცა თარიღს ბიურო დაადგენს“.

ბათუმის იახტკლუბისა და ანბანის კოშკის მიმდებარე ტერიტორიაზე ნიადაგის გეოლოგიური კვლევა დაწყებულია. ეს ტერიტორია, სადაც 6 შენობის აშენებაა დაგეგმილი, „სილქ როუდის“ შვილობილი კომპანიის – „ბათუმი რივიერას“ საკუთრებაშია. ექვსი შენობიდან ყველაზე მაღალი – „სილქ თაუერი“, სავარაუდოდ, 42-სართულიანი იქნება. პროექტის განხორციელება ბიძინა ივანიშვილის მიერ დაფუძნებული თანაინვესტირების ფონდის ფინანსური თანამონაწილეობით იგეგმება.

ტერიტორიის განვითარების კონცეფცია „სილქ როუდის“ დაკვეთით „ჩეპმენ ტეილორმა“ მოამზადა. ტერიტორიის განაშენიანების რეგულირების გეგმის [გრგ] გეგმარებითი დავალების მისაღებად კი ბათუმის მერიას „სილქ როუდის“ მიერ დაქირავებულმა კომპანია „მულტივერს არქიტექტურამ“ მიმართა.

ამ თემაზე:

„ტრამპ თაუერი“ 44 სართული, „სილქ თაუერი“ – 42? -„რივიერას“ ტერიტორიაზე გეოლოგიური კვლევა დაიწყო

 

 

 

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com