გარე დაკვირვებაზე 2 330 მასწავლებელი დარეგისტრირდა

გარე დაკვირვების გასავლელად 2 330 მასწავლებელი დარეგისტრირდა. როგორც მასწავლებელთა პროფესიული განვითარების ეროვნული ცენტრის უფროსის მოადგილე, მანანა რატიანი „ბათუმელებთან“ ამბობს, პედაგოგებს, ვინც გარედაკვირვებაზე დარეგისტრირდნენ, სასწავლო წლის ბოლომდე განესაზღვრებათ გაკვეთილის ჩატარების თარიღები.

„რეგისტრაცია დასრულდა და ერთი თვის ვადაში ამ მასწავლებლებლებს დაუნაწილდებათ ვადები, თუ ვის როდის დააკვირდებიან. კონკრეტული ვადა აისახება eshool-ის ელექტრონულ სისტემაში და გამოუჩნდებათ კალენდარზე“.

როგორც მანანა რატიანი გვეუბნება, გარე დაკვირვების გაკვეთილს ერთი ადამიანი აკვირდება, ეს არის ცენტრის მიერ გადამზადებული გარე დამკვირვებელი, რომელსაც აქვს სკოლაში მუშაობის გამოცდილება. „ამ ეტაპისთვის ასამდე დამკვირვებელი გვყავს გადამზადებული, შეიძლება დაგვჭირდეს დამატებაც კონკრეტული საგნების შემთხვევაში. ამიტომ დამატებით კიდევ შევარჩევთ და გადავამზადებთ დამკვირვებლებს“.

რატიანის თქმით, გარე დაკვირვებაზე რეგისტრირებულთა შორის ყველაზე მეტი ქართულის და მათემატიკის მასწავლებელია.

როგორც ცენტრში გვეუბნებიან, ამ პერიოდში მიმდინარეობდა სკოლებიდან სააპელაციო განაცხადების მიღებაც, რომელიც გუშინ დასრულდა. თუმცა რამდენი სააპელაციო განაცხადია შესული, ცენტრში არ აკონკრეტებენ. როგორც „ბათუმელებს“ უთხრეს, აპელაციებით ძირითადად სკოლების შიდა შეფასების ჯგუფის საქმიანობას აპროტესტებენ. „ერთი სკოლიდან შეიძლება იყოს 7-8 სააპელაციო განაცხადი, ამიტომ ეს განაცხადები დაითვლება და ზუსტი ციფრი, თუ რამდენი აპელაცია შემოვიდა, გვეცოდინება ერთ კვირაში“, – გვითხრეს ცენტრის პრესსამსახურში.

გარე დაკვირვება სავალდებულო აქტივობაა უფროსი მასწავლებლისთვის, რომელსაც 13 კრედიტქულა აქვს მოპოვებული და სურს, რომ წამყვანი მასწავლებლის სტატუსი მოიპოვოს.

განათლების სამინისტროს ინფორმაციით, 2018 წლიდან წამყვანი მასწავლებლის სახელფასო დანამატი სრული დატვირთვის შემთხვევაში 700 ლარი გახდა.

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com