ბათუმის ბულვარში ზღვაში შესასვლელი პანდუსის მოწყობა იგეგმება

ბათუმის ბულვარი 2019 წლისთვის სანაპირზო ზოლზე ადაპტირებული ინფრასტრუქტურის, კერძოდ პლაჟზე გადასასვლელების მოწყობასაც გეგმავს. ასევე იგეგმება ადაპტირებული საშხაპეების, გასახდელებისა და ატრაქციონების მოწყობაც. როგორც ბათუმის ბულვარში გვითხრეს, მომავალი წლისთვის, პირველად საქართველოში ეტლით მოსარგებლე პირებისთვის – ზღვაში შესასვლელი პანდუსის მოწყობაცაა დაგეგმილი.

“გარდა ინკლუზიური ტურიზმის ხელშეწყობისა, 2019 წლისთვის ვგეგმავთ, რომ სანაპირო ზოლი (რაც ბათუმის ბულვარის ზედამხედველობის ქვეშაა) გახდეს მაქსიმალურად ადაპტირებული, მომავალი წლიდან ვაპიებთ, რომ გვქონდეს  მაქსიმალურად ადაპტირებული გარემო შშმ პირთათვის და მშობლებისათვისაც, ვისაც ეტლით უწევს პლაჟზე გადაადგილება,” – ამბობს ბათუმის ბულვარის პრესსამსახურის უფროსი, მაგდა ჯაიანი.

რაც შეეხება ზღვაში შესასვლელ პანდუსს, ბათუმის ბულვარში ამბობენ, რომ ეს იქნება ზღვაში გარკვეულ სიღმეზე შეჭრილი პანდუსი, რომლითაც ელით მოსარგებლე პირები შეძლებენ არათუ ზღვასთან მისვლას, არამედ ზღვაში შესვლას. როგორი დიზაინის იქნება ზღვაში შეჭრილი პანდუსი, ჯერ უცნობია.

20 ოქტომბერს, 18 საათზე, ბათუმის ბულვარში, სასტუმრო „ინტურისტის“ მოპირდაპირე სკვერში გაიმართება ადაპტირებული ინფრასტრუქტურისა და სანაპირო ზოლის მოწყობის პროექტების კონცეფციის საჯარო პრეზენტაცია. შეხვედრის ფარგლებში მოეწყობა სწორედ ამ პროექტების განხილვა და დისკუსია.

“ჩვენ გამოვაცხადეთ ტენდერი, უკვე არის გამარჯვებული კომპანია, რომელიც გააკეთებს ხარჯთაღრიცხვას ცალკეული პროექტების  და ამის შემდგომ, თითოეულ პროექტზე, როგორიცაა ადაპტირებული გასახდელები, საშხაპეები, გადასასვლელები, ასევე ადაპტირებული საპირფარეშოები და ატრაქციონები, უკვე ცალკე ტენდერებს გამოვაცხადებთ,” – ამბობს მაგდა ჯაიანი.

ზღვაში შეჭრილი პანდუსი კვიპროსის პლაჟზე.

ღონისძიების პროგრამა:
18:00 – შეკრება ბათუმის ბულვარში სასტუმრო „ინტურისტის“ მოპირდაპირე მხარეს
18:50 – პროექტის პრეზენტაცია, ბულვარის ადმინისტრაციისა და შემსრულებელი კომპანიის მიერ
დისკუსია;
სამუშაო ჯგუფის შექმნა;
19:30 – ფილმის ჩვენება

 

მთავარ ფოტოზე: ზღვაში შეჭრილი პანდუსი კვიპროსის პლაჟზე.

 

ნეტგაზეთის მასალების სხვა გამოცემებში გადაბეჭდვის წესი


ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან