ცირა ქობულაძე უფროსი მასწავლებელია. ის ათი წელი საჯარო სკოლაში მუშაობდა, ბოლო ოთხი წელია კი კერძო სკოლა „ევრო 2000“-ში ასწავლის. ცირა ქობულაძე არის განათლების საერთაშორისო აკადემიის (IAE) მიერ განხორციელებული საგანმანათლებლო ტრენინგების აქტიური მონაწილე, რომელიც გაიმართა სტამბულსა და ბაქოში.
„ბათუმელები“ ცირა ქობულაძეს მასწავლებლის პროფესიულ განვითარებასა და სქემით გათვალისწინებულ ვალდებულებებზე ესაუბრა.
ქალბატონო ცირა, სოციალურ ქსელებში ხშირად წერენ პედაგოგები, განათლების სფეროს წარმომადგენლები, რომ ე.წ „გარედაკვირვება“, რომელიც პედაგოგმა წამყვანი მასწავლებლის სტატუსის მისაღებად უნდა გაიაროს, არის ფორმალობა და რეალურად მსგავსი ტიპის დაკვირვებები ვერ ცვლის პედაგოგის კვალიფიკაციას. იზიარებთ ამ მოსაზრებას?
არ ვფიქრობ, რომ „გარედაკვირვება“ არ არის აუცილებელი, თუმცა ამ ერთი გაკვეთილით მასწავლებლის განათლების დონეს ნამდვილად ვერ ავამაღლებთ.
მე, პირადად, ჩემი პროფესიული წინსვლა დავინახე გადამზადების პროცესში, როცა გავიარე სხვადასხვა სახის ინოვაციური ტრენინგი. შეიძლება პედაგოგმა ხმამაღლა არ თქვას, მაგრამ ვიცით, რომ „გარედაკვირვება“ მაინც დადგმული, ხელოვნური გაკვეთილია – რადგან ამ ერთ გაკვეთილზეა დამოკიდებული მასწავლებლის კვალიფიკაციის შეფასება და სტატუსის მინიჭება. ამის გამო პედაგოგების გარკვეული ნაწილი სტრესის ქვეშაა.
მაგალითად, მე ბევრად კარგ გაკვეთილს ვატარებ, როცა მაქვს თავისუფლება. როცა ვიცი, რომ ამ ერთი გაკვეთილით უნდა გადაწყდეს, თუ როგორი პედაგოგი ვარ, ეს არის რთული. მექანიზმია არასწორი, რადგან მასწავლებელს უნდა აფასებდნენ იმით, თუ რამდენად ხარისხიანად ასწავლის ის მოსწავლეებს.
რამდენად უტყუარი საზომი იქნება მოსწავლეების დონის შეფასება ამისთვის, რადგან ვიცით, რომ თითქმის ყველა წარმატებული მოსწავლის უკან რეპეტიტორი დგას?
კლასში ყველა ბავშვი არ ემზადება, 35 მოსწავლიდან საშუალო მაჩვენებელი შეიძლება გამოვიყვანოთ.
მაშინ რა არის საჭირო იმისთვის, რომ პედაგოგმა პროფესიულ ზრდაზე იზრუნოს?
ჩვენ ვალდებულები უნდა ვიყოთ, რომ გავიაროთ გადამზადება. ტრენინგებზე მარტო სურვილის შემთხვევაში კი არ უნდა მიდიოდეს მასწავლებელი, ეს სავალდებულო უნდა იყოს.
ავიღოთ თუნდაც ბულინგის თემა. ძალიან საინტერესო ტრენინგები გავიარე, რომელიც მხოლოდ კლასის დამრიგებლებისთვის იყო. მართალია, ჩვენ გვაქვს ვალდებულება, რომ ჩვენს კოლეგებსაც გავუზიაროთ გამოცდილება, მაგრამ ყველა ასე აკეთებს? რჩებათ კი მასწავლებლებს ამის დრო? ამაშია საქმე, ამის მონიტორინგს არავინ არ აკეთებს.
მაშინ, როცა ძალიან დიდი თანხა იხარჯება ტრენინგებზე, თუმცა ყველა მასწავლებელი არ ან ვერ დადის.
მე, პირადად, ერთი წლის განმავლობაში ძალიან ბევრი ტრენინგი გავიარე და დავინახე ჩემი პროფესიული ზრდა. მივხვდი, რომ ეს აუცილებელი იყო ჩემთვის და არა მხოლოდ შიდა ან გარე შეფასება, რომელსაც ერთხელ გაივლი და მორჩა. ამიტომ ვამბობ, რომ გადამზადება ბევრად მნიშვნელოვანია მასწავლებლისთვის.
როგორ მზადდება „გარედაკვირვება“, ბევრ დროს ითხოვს მასწავლებლისგან?
მე ჯერ არ გამივლია, თუმცა, როგორც ვიცი, მზადდება ხუთი გაკვეთილის გეგმა, რომელიც საკმაოდ შრომატევადია და ბევრ ფურცელთან გიწევს მუშაობა. შემდეგ ამ გეგმებს წარუდგენ გარედაკვირვების ჯგუფს და აქედან ერთ-ერთ გაკვეთილს დაესწრებიან და შეაფასებენ.
ჩემი აზრით, ბევრად მნიშვნელოვანია მასწავლებელს სასწავლო რესურსები ჰქონდეს კლასში და მას არ უწევდეს ამ რესურსების შექმნა. მასწავლებლის წიგნში მოცემულია დავალებები, თუ რა რესურსი უნდა გამოვიყენო გაკვეთილზე. მე, პირადად, ჩემი ფინანსებით ვქმნი ამ რესურსებს, მიუხედავად იმისა, რომ კერძო სკოლაში ვარ და იქ ბევრად მეტი შესაძლებლობა არსებობს.
მასწავლებელს, რომელსაც 300-400 ლარი აქვს ხელფასი, ყოველთვის თავისი ხარჯებით ამას ვერ გააკეთებს.
განათლების სამინისტრო ამბობს, რომ ყველა რესურსი შექმნილია და ხელმისაწვდომია ელექტრონულად. არ იყენებთ ამ რესურსებს?
რა თქმა უნდა, ვიყენებ და ბევრ სხვა მასალასაც ვპოულობ ინტერნეტში, მაგრამ კლასში ბეჭდური რესურსებიც ხშირად გვჭირდება. თვალსაჩინოება არის საჭირო და ასე შემდეგ.
კიდევ რა არის ისეთი, რაც, თქვენი აზრით, მსჯელობას საჭიროებს?
მაგალითად, კონკრეტული სტატუსის მისაღებად 19 კრედიტქულა იყო საჭირო, მე მქონდა 26 ქულა. როცა ახალ სტატუსს იღებ, ის ზედმეტი ქულები გიუქმდება. ამ ქულების მისაღებად კი პედაგოგი საკმაოდ ბევრს შრომობს. ეს ასე არ უნდა იყოს.
ყველა ახალი მინისტრი ამბობს, რომ ძირეული რეფორმებია საჭირო განათლების ხარისხის ასამაღლებლად. თქვენი აზრით, საიდან უნდა დაიწყოს რეფორმა?
მე ის ვიცი, რომ მხოლოდ სტატუსი და ფორმალური სერტიფიკატი ვერ შეცვლის ვერაფერს. მე თუ კლასთან მუშაობა მინდა, სტატუსის გარეშეც ვმუშაობ და სხვა აქტივობებს იმიტომ ვაკეთებ, რომ ჩემი ხელფასი კარიერულ ზრდაზეა დამოკიდებული. ფინანსური მდგრადობა ძალიან მნიშვნელოვანი კომპონენტია იმისთვის, რომ სწავლის ხარისხი გაუმჯობესდეს. ჩემი აზრით, მასწავლებლის საბაზო ხელფასი ათასი ლარი უნდა იყოს, რომ ნორმალურად შეძლოს ადამიანმა პრობლემების მოგვარება.
